Chapter 257

257.1

जनमेजय उवाच
एवं हृतायां कृष्णायां प्राप्य क्लेशमनुत्तमम्
अत ऊर्ध्वं नरव्याघ्राः किमकुर्वत पाण्डवाः

Janamejaya uvacha
Evam hritayam krishnayam prapya kleshamanuttamam
Ata urdhvam naravyaghrah kimakurvata pandavah

वैशंपायन उवाच
एवं कृष्णां मोक्षयित्वा विनिर्जित्य जयद्रथम्
आसां चक्रे मुनिगणैर्धर्मराजो युधिष्ठिरः

Vaishampayana uvacha
Evam krishnam mokshayitva vinirjitya jayadratham
Asam chakre muniganairdharmarajo yudhishthirah

तेषां मध्ये महर्षीणां शृण्वतामनुशोचताम्
मार्कण्डेयमिदं वाक्यमब्रवीत्पाण्डुनन्दनः

Tesham madhye maharshinam shrinvatamanushochatam
Markandeyamidam vakyamabravitpandunandanah

मन्ये कालश्च बलवान्दैवं च विधिनिर्मितम्
भवितव्यं च भूतानां यस्य नास्ति व्यतिक्रमः

Manye kalashcha balavandaivam cha vidhinirmitam
Bhavitavyam cha bhutanam yasya nasti vyatikramah

कथं हि पत्नीमस्माकं धर्मज्ञां धर्मचारिणीम्
संस्पृशेदीदृशो भावः शुचिं स्तैन्यमिवानृतम्

Katham hi patnimasmakam dharmagyam dharmacharinim
Sansprishedidrisho bhavah shuchim stainyamivanritam

न हि पापं कृतं किंचित्कर्म वा निन्दितं क्वचित्
द्रौपद्या ब्राह्मणेष्वेव धर्मः सुचरितो महान्

Na hi papam kritam kinchitkarma va ninditam kvachit
Draupadya brahmaneshveva dharmah sucharito mahan

तां जहार बलाद्राजा मूढबुद्धिर्जयद्रथः
तस्याः संहरणात्प्राप्तः शिरसः केशवापनम्
पराजयं च संग्रामे ससहायः समाप्तवान्

Tam jahara baladraja mudhabuddhirjayadrathah
Tasyah sanharanatpraptah shirasah keshavapanam
Parajayam cha sangrame sasahayah samaptavan

प्रत्याहृता तथास्माभिर्हत्वा तत्सैन्धवं बलम्
तद्दारहरणं प्राप्तमस्माभिरवितर्कितम्

Pratyahrita tathasmabhirhatva tatsaindhavam balam
Taddaraharanam praptamasmabhiravitarkitam

दुःखश्चायं वने वासो मृगयायां च जीविका
हिंसा च मृगजातीनां वनौकोभिर्वनौकसाम्
ज्ञातिभिर्विप्रवासश्च मिथ्या व्यवसितैरयम्

Duhkhashchayam vane vaso mrigayayam cha jivika
Hinsa cha mrigajatinam vanaukobhirvanaukasam
Gyatibhirvipravasashcha mithya vyavasitairayam

अस्ति नूनं मया कश्चिदल्पभाग्यतरो नरः
भवता दृष्टपूर्वो वा श्रुतपूर्वोऽपि वा भवेत्

Asti nunam maya kashchidalpabhagyataro narah
Bhavata drishtapurvo va shrutapurvopi va bhavet