Chapter 269

269.1

मार्कण्डेय उवाच
ततो निविशमानांस्तान्सैनिकान्रावणानुगाः
अभिजग्मुर्गणानेके पिशाचक्षुद्ररक्षसाम्

Markandeya uvacha
Tato nivishamananstansainikanravananugah
Abhijagmurgananeke pishachakshudrarakshasam

पर्वणः पूतनो जम्भः खरः क्रोधवशो हरिः
प्ररुजश्चारुजश्चैव प्रघसश्चैवमादयः

Parvanah putano jambhah kharah krodhavasho harih
Prarujashcharujashchaiva praghasashchaivamadayah

ततोऽभिपततां तेषामदृश्यानां दुरात्मनाम्
अन्तर्धानवधं तज्ज्ञश्चकार स विभीषणः

Tatobhipatatam teshamadrishyanam duratmanam
Antardhanavadham tajgyashchakara sa vibhishanah

ते दृश्यमाना हरिभिर्बलिभिर्दूरपातिभिः
निहताः सर्वशो राजन्महीं जग्मुर्गतासवः

Te drishyamana haribhirbalibhirdurapatibhih
Nihatah sarvasho rajanmahim jagmurgatasavah

अमृष्यमाणः सबलो रावणो निर्ययावथ
व्यूह्य चौशनसं व्यूहं हरीन्सर्वानहारयत्

Amrishyamanah sabalo ravano niryayavatha
Vyuhya chaushanasam vyuham harinsarvanaharayat

राघवस्त्वभिनिर्याय व्यूढानीकं दशाननम्
बार्हस्पत्यं विधिं कृत्वा प्रत्यव्यूहन्निशाचरम्

Raghavastvabhiniryaya vyudhanikam dashananam
Barhaspatyam vidhim kritva pratyavyuhannishacharam

समेत्य युयुधे तत्र ततो रामेण रावणः
युयुधे लक्ष्मणश्चैव तथैवेन्द्रजिता सह

Sametya yuyudhe tatra tato ramena ravanah
Yuyudhe lakshmanashchaiva tathaivendrajita saha

विरूपाक्षेण सुग्रीवस्तारेण च निखर्वटः
तुण्डेन च नलस्तत्र पटुशः पनसेन च

Virupakshena sugrivastarena cha nikharvatah
Tundena cha nalastatra patushah panasena cha

विषह्यं यं हि यो मेने स स तेन समेयिवान्
युयुधे युद्धवेलायां स्वबाहुबलमाश्रितः

Vishahyam yam hi yo mene sa sa tena sameyivan
Yuyudhe yuddhavelayam svabahubalamashritah

स संप्रहारो ववृधे भीरूणां भयवर्धनः
लोमसंहर्षणो घोरः पुरा देवासुरे यथा

Sa sampraharo vavridhe bhirunam bhayavardhanah
Lomasanharshano ghorah pura devasure yatha

रावणो राममानर्छच्छक्तिशूलासिवृष्टिभिः
निशितैरायसैस्तीक्ष्णै रावणं चापि राघवः

Ravano ramamanarchhachchhaktishulasivrishtibhih
Nishitairayasaistikshnai ravanam chapi raghavah

तथैवेन्द्रजितं यत्तं लक्ष्मणो मर्मभेदिभिः
इन्द्रजिच्चापि सौमित्रिं बिभेद बहुभिः शरैः

Tathaivendrajitam yattam lakshmano marmabhedibhih
Indrajichchapi saumitrim bibheda bahubhih sharaih

विभीषणः प्रहस्तं च प्रहस्तश्च विभीषणम्
खगपत्रैः शरैस्तीक्ष्णैरभ्यवर्षद्गतव्यथः

Vibhishanah prahastam cha prahastashcha vibhishanam
Khagapatraih sharaistikshnairabhyavarshadgatavyathah

तेषां बलवतामासीन्महास्त्राणां समागमः
विव्यथुः सकला येन त्रयो लोकाश्चराचराः

Tesham balavatamasinmahastranam samagamah
Vivyathuh sakala yena trayo lokashcharacharah