UtshovChapter 285
285.1
सूर्य उवाच
माहितं कर्ण कार्षीस्त्वमात्मनः सुहृदां तथा
पुत्राणामथ भार्याणामथो मातुरथो पितुः
Surya uvacha
Mahitam karna karshistvamatmanah suhridam tatha
Putranamatha bharyanamatho maturatho pituh
285.2
शरीरस्याविरोधेन प्राणिनां प्राणभृद्वर
इष्यते यशसः प्राप्तिः कीर्तिश्च त्रिदिवे स्थिरा
Sharirasyavirodhena praninam pranabhridvara
Ishyate yashasah praptih kirtishcha tridive sthira
285.3
यस्त्वं प्राणविरोधेन कीर्तिमिच्छसि शाश्वतीम्
सा ते प्राणान्समादाय गमिष्यति न संशयः
Yastvam pranavirodhena kirtimichchhasi shashvatim
Sa te pranansamadaya gamishyati na sanshayah
285.4
जीवतां कुरुते कार्यं पिता माता सुतास्तथा
ये चान्ये बान्धवाः केचिल्लोकेऽस्मिन्पुरुषर्षभ
राजानश्च नरव्याघ्र पौरुषेण निबोध तत्
Jivatam kurute karyam pita mata sutastatha
Ye chanye bandhavah kechillokesminpurusharshabha
Rajanashcha naravyaghra paurushena nibodha tat
285.5
कीर्तिश्च जीवतः साध्वी पुरुषस्य महाद्युते
मृतस्य कीर्त्या किं कार्यं भस्मीभूतस्य देहिनः
मृतः कीर्तिं न जानाति जीवन्कीर्तिं समश्नुते
Kirtishcha jivatah sadhvi purushasya mahadyute
Mritasya kirtya kim karyam bhasmibhutasya dehinah
Mritah kirtim na janati jivankirtim samashnute
285.6
मृतस्य कीर्तिर्मर्त्यस्य यथा माला गतायुषः
अहं तु त्वां ब्रवीम्येतद्भक्तोऽसीति हितेप्सया
Mritasya kirtirmartyasya yatha mala gatayushah
Aham tu tvam bravimyetadbhaktositi hitepsaya
285.7
भक्तिमन्तो हि मे रक्ष्या इत्येतेनापि हेतुना
भक्तोऽयं परया भक्त्या मामित्येव महाभुज
ममापि भक्तिरुत्पन्ना स त्वं कुरु वचो मम
Bhaktimanto hi me rakshya ityetenapi hetuna
Bhaktoyam paraya bhaktya mamityeva mahabhuja
Mamapi bhaktirutpanna sa tvam kuru vacho mama
285.8
अस्ति चात्र परं किंचिदध्यात्मं देवनिर्मितम्
अतश्च त्वां ब्रवीम्येतत्क्रियतामविशङ्कया
Asti chatra param kinchidadhyatmam devanirmitam
Atashcha tvam bravimyetatkriyatamavishankaya
285.9
देवगुह्यं त्वया ज्ञातुं न शक्यं पुरुषर्षभ
तस्मान्नाख्यामि ते गुह्यं काले वेत्स्यति तद्भवान्
Devaguhyam tvaya gyatum na shakyam purusharshabha
Tasmannakhyami te guhyam kale vetsyati tadbhavan
285.10
पुनरुक्तं च वक्ष्यामि त्वं राधेय निबोध तत्
मास्मै ते कुण्डले दद्या भिक्षवे वज्रपाणये
Punaruktam cha vakshyami tvam radheya nibodha tat
Masmai te kundale dadya bhikshave vajrapanaye
285.11
शोभसे कुण्डलाभ्यां हि रुचिराभ्यां महाद्युते
विशाखयोर्मध्यगतः शशीव विमलो दिवि
Shobhase kundalabhyam hi ruchirabhyam mahadyute
Vishakhayormadhyagatah shashiva vimalo divi
285.12
कीर्तिश्च जीवतः साध्वी पुरुषस्येति विद्धि तत्
प्रत्याख्येयस्त्वया तात कुण्डलार्थे पुरंदरः
Kirtishcha jivatah sadhvi purushasyeti viddhi tat
Pratyakhyeyastvaya tata kundalarthe purandarah
285.13
शक्या बहुविधैर्वाक्यैः कुण्डलेप्सा त्वयानघ
विहन्तुं देवराजस्य हेतुयुक्तैः पुनः पुनः
Shakya bahuvidhairvakyaih kundalepsa tvayanagha
Vihantum devarajasya hetuyuktaih punah punah
285.14
उपपत्त्युपपन्नार्थैर्माधुर्यकृतभूषणैः
पुरंदरस्य कर्ण त्वं बुद्धिमेतामपानुद
Upapattyupapannarthairmadhuryakritabhushanaih
Purandarasya karna tvam buddhimetamapanuda
285.15
त्वं हि नित्यं नरव्याघ्र स्पर्धसे सव्यसाचिना
सव्यसाची त्वया चैव युधि शूरः समेष्यति
Tvam hi nityam naravyaghra spardhase savyasachina
Savyasachi tvaya chaiva yudhi shurah sameshyati
285.16
न तु त्वामर्जुनः शक्तः कुण्डलाभ्यां समन्वितम्
विजेतुं युधि यद्यस्य स्वयमिन्द्रः शरो भवेत्
Na tu tvamarjunah shaktah kundalabhyam samanvitam
Vijetum yudhi yadyasya svayamindrah sharo bhavet
285.17
तस्मान्न देये शक्राय त्वयैते कुण्डले शुभे
संग्रामे यदि निर्जेतुं कर्ण कामयसेऽर्जुनम्
Tasmanna deye shakraya tvayaite kundale shubhe
Sangrame yadi nirjetum karna kamayaserjunam