Utshovঅধ্যায় 299
299.1
বৈশংপায়ন উবাচ
ধর্মেণ তেঽভ্যনুজ্ঞাতাঃ পাণ্ডবাঃ সত্যবিক্রমাঃ
অজ্ঞাতবাসং বত্স্যন্তশ্ছন্না বর্ষং ত্রয়োদশম্
উপোপবিশ্য বিদ্বাংসঃ সহিতাঃ সংশিতব্রতাঃ
299.2
যে তদ্ভক্তা বসন্তি স্ম বনবাসে তপস্বিনঃ
তানব্রুবন্মহাত্মানঃ শিষ্টাঃ প্রাঞ্জলয়স্তদা
অভ্যনুজ্ঞাপয়িষ্যন্তস্তং নিবাসং ধৃতব্রতাঃ
299.3
বিদিতং ভবতাং সর্বং ধার্তরাষ্ট্রৈর্যথা বয়ম্
ছদ্মনা হৃতরাজ্যাশ্চ নিঃস্বাশ্চ বহুশঃ কৃতাঃ
299.4
উষিতাশ্চ বনে কৃচ্ছ্রং যত্র দ্বাদশ বত্সরান্
অজ্ঞাতবাসসময়ং শেষং বর্ষং ত্রয়োদশম্
তদ্বত্স্যামো বয়ং ছন্নাস্তদনুজ্ঞাতুমর্হথ
299.5
সুয়োধনশ্চ দুষ্টাত্মা কর্ণশ্চ সহসৌবলঃ
জানন্তো বিষমং কুর্যুরস্মাস্বত্যন্তবৈরিণঃ
যুক্তাচারাশ্চ যুক্তাশ্চ পৌরস্য স্বজনস্য চ
299.6
অপি নস্তদ্ভবেদ্ভূয়ো যদ্বয়ং ব্রাহ্মণৈঃ সহ
সমস্তাঃ স্বেষু রাষ্ট্রেষু স্বরাজ্যস্থা ভবেমহি
299.7
ইত্যুক্ত্বা দুঃখশোকার্তঃ শুচির্ধর্মসুতস্তদা
সংমূর্ছিতোঽভবদ্রাজা সাশ্রুকণ্ঠো যুধিষ্ঠিরঃ
299.8
তমথাশ্বাসয়ন্সর্বে ব্রাহ্মণা ভ্রাতৃভিঃ সহ
অথ ধৌম্যোঽব্রবীদ্বাক্যং মহার্থং নৃপতিং তদা
299.9
রাজন্বিদ্বান্ভবান্দান্তঃ সত্যসংধো জিতেন্দ্রিয়ঃ
নৈবংবিধাঃ প্রমুহ্যন্তি নরাঃ কস্যাংচিদাপদি
299.10
দেবৈরপ্যাপদঃ প্রাপ্তাশ্ছন্নৈশ্চ বহুশস্তথা
তত্র তত্র সপত্নানাং নিগ্রহার্থং মহাত্মভিঃ
299.11
ইন্দ্রেণ নিষধান্প্রাপ্য গিরিপ্রস্থাশ্রমে তদা
ছন্নেনোষ্য কৃতং কর্ম দ্বিষতাং বলনিগ্রহে
299.12
বিষ্ণুনাশ্বশিরঃ প্রাপ্য তথাদিত্যাং নিবত্স্যতা
গর্ভে বধার্থং দৈত্যানামজ্ঞাতেনোষিতং চিরম্
299.13
প্রাপ্য বামনরূপেণ প্রচ্ছন্নং ব্রহ্মরূপিণা
বলের্যথা হৃতং রাজ্যং বিক্রমৈস্তচ্চ তে শ্রুতম্
299.14
ঔর্বেণ বসতা ছন্নমূরৌ ব্রহ্মর্ষিণা তদা
যত্কৃতং তাত লোকেষু তচ্চ সর্বং শ্রুতং ত্বয়া
299.15
প্রচ্ছন্নং চাপি ধর্মজ্ঞ হরিণা বৃত্রনিগ্রহে
বজ্রং প্রবিশ্য শক্রস্য যত্কৃতং তচ্চ তে শ্রুতম্
299.16
হুতাশনেন যচ্চাপঃ প্রবিশ্য ছন্নমাসতা
বিবুধানাং কৃতং কর্ম তচ্চ সর্বং শ্রুতং ত্বয়া
299.17
এবং বিবস্বতা তাত ছন্নেনোত্তমতেজসা
নির্দগ্ধাঃ শত্রবঃ সর্বে বসতা ভুবি সর্বশঃ
299.18
বিষ্ণুনা বসতা চাপি গৃহে দশরথস্য বৈ
দশগ্রীবো হতশ্ছন্নং সংয়ুগে ভীমকর্মণা
299.19
এবমেতে মহাত্মানঃ প্রচ্ছন্নাস্তত্র তত্র হ
অজয়ঞ্শাত্রবান্যুদ্ধে তথা ত্বমপি জেষ্যসি
299.20
তথা ধৌম্যেন ধর্মজ্ঞো বাক্যৈঃ সংপরিতোষিতঃ
শাস্ত্রবুদ্ধ্যা স্ববুদ্ধ্যা চ ন চচাল যুধিষ্ঠিরঃ
299.21
অথাব্রবীন্মহাবাহুর্ভীমসেনো মহাবলঃ
রাজানং বলিনাং শ্রেষ্ঠো গিরা সংপরিহর্ষয়ন্
299.22
অবেক্ষয়া মহারাজ তব গাণ্ডীবধন্বনা
ধর্মানুগতয়া বুদ্ধ্যা ন কিংচিত্সাহসং কৃতম্
299.23
সহদেবো ময়া নিত্যং নকুলশ্চ নিবারিতৌ
শক্তৌ বিধ্বংসনে তেষাং শত্রুঘ্নৌ ভীমবিক্রমৌ
299.24
ন বয়ং তত্প্রহাস্যামো যস্মিন্যোক্ষ্যতি নো ভবান্
ভবান্বিধত্তাং তত্সর্বং ক্ষিপ্রং জেষ্যামহে পরান্
299.25
ইত্যুক্তে ভীমসেনেন ব্রাহ্মণাঃ পরমাশিষঃ
প্রয়ুজ্যাপৃচ্ছ্য ভরতান্যথাস্বান্স্বান্যয়ুর্গৃহান্
299.26
সর্বে বেদবিদো মুখ্যা যতয়ো মুনয়স্তথা
আশীরুক্ত্বা যথান্যায়ং পুনর্দর্শনকাঙ্ক্ষিণঃ
299.27
সহ ধৌম্যেন বিদ্বাংসস্তথা তে পঞ্চ পাণ্ডবাঃ
উত্থায় প্রয়য়ুর্বীরাঃ কৃষ্ণামাদায় ভারত
299.28
ক্রোশমাত্রমতিক্রম্য তস্মাদ্দেশান্নিমিত্ততঃ
শ্বোভূতে মনুজব্যাঘ্রাশ্ছন্নবাসার্থমুদ্যতাঃ
299.29
পৃথক্শাস্ত্রবিদঃ সর্বে সর্বে মন্ত্রবিশারদাঃ
সংধিবিগ্রহকালজ্ঞা মন্ত্রায় সমুপাবিশন্