Utshovঅধ্যায় 9
9.1
নারদ উবাচ
যুধিষ্ঠির সভা দিব্যা বরুণস্য সিতপ্রভা
প্রমাণেন যথা যাম্যা শুভপ্রাকারতোরণা
9.2
অন্তঃসলিলমাস্থায় বিহিতা বিশ্বকর্মণা
দিব্যরত্নময়ৈর্বৃক্ষৈঃ ফলপুষ্পপ্রদৈর্যুতা
9.3
নীলপীতাসিতশ্যামৈঃ সিতৈর্লোহিতকৈরপি
অবতানৈস্তথা গুল্মৈঃ পুষ্পমঞ্জরিধারিভিঃ
9.4
তথা শকুনয়স্তস্যাং নানারূপা মৃদুস্বরাঃ
অনির্দেশ্যা বপুষ্মন্তঃ শতশোঽথ সহস্রশঃ
9.5
সা সভা সুখসংস্পর্শা ন শীতা ন চ ঘর্মদা
বেশ্মাসনবতী রম্যা সিতা বরুণপালিতা
9.6
যস্যামাস্তে স বরুণো বারুণ্যা সহ ভারত
দিব্যরত্নাম্বরধরো ভূষণৈরুপশোভিতঃ
9.7
স্রগ্বিণো ভূষিতাশ্চাপি দিব্যমাল্যানুকর্ষিণঃ
আদিত্যাস্তত্র বরুণং জলেশ্বরমুপাসতে
9.8
বাসুকিস্তক্ষকশ্চৈব নাগশ্চৈরাবতস্তথা
কৃষ্ণশ্চ লোহিতশ্চৈব পদ্মশ্চিত্রশ্চ বীর্যবান্
9.9
কম্বলাশ্বতরৌ নাগৌ ধৃতরাষ্ট্রবলাহকৌ
মণিমান্কুণ্ডলধরঃ কর্কোটকধনংজয়ৌ
9.10
প্রহ্লাদো মূষিকাদশ্চ তথৈব জনমেজয়ঃ
পতাকিনো মণ্ডলিনঃ ফণবন্তশ্চ সর্বশঃ
9.11
এতে চান্যে চ বহবঃ সর্পাস্তস্যাং যুধিষ্ঠির
উপাসতে মহাত্মানং বরুণং বিগতক্লমাঃ
9.12
বলির্বৈরোচনো রাজা নরকঃ পৃথিবীংজয়ঃ
প্রহ্লাদো বিপ্রচিত্তিশ্চ কালখঞ্জাশ্চ সর্বশঃ
9.13
সুহনুর্দুর্মুখঃ শঙ্খঃ সুমনাঃ সুমতিঃ স্বনঃ
ঘটোদরো মহাপার্শ্বঃ ক্রথনঃ পিঠরস্তথা
9.14
বিশ্বরূপঃ সুরূপশ্চ বিরূপোঽথ মহাশিরাঃ
দশগ্রীবশ্চ বালী চ মেঘবাসা দশাবরঃ
9.15
কৈটভো বিটটূতশ্চ সংহ্রাদশ্চেন্দ্রতাপনঃ
দৈত্যদানবসংঘাশ্চ সর্বে রুচিরকুণ্ডলাঃ
9.16
স্রগ্বিণো মৌলিনঃ সর্বে তথা দিব্যপরিচ্ছদাঃ
সর্বে লব্ধবরাঃ শূরাঃ সর্বে বিগতমৃত্যবঃ
9.17
তে তস্যাং বরুণং দেবং ধর্মপাশস্থিতাঃ সদা
উপাসতে মহাত্মানং সর্বে সুচরিতব্রতাঃ
9.18
তথা সমুদ্রাশ্চত্বারো নদী ভাগীরথী চ যা
কালিন্দী বিদিশা বেণ্ণা নর্মদা বেগবাহিনী
9.19
বিপাশা চ শতদ্রুশ্চ চন্দ্রভাগা সরস্বতী
ইরাবতী বিতস্তা চ সিন্ধুর্দেবনদস্তথা
9.20
গোদাবরী কৃষ্ণবেণ্ণা কাবেরী চ সরিদ্বরা
এতাশ্চান্যাশ্চ সরিতস্তীর্থানি চ সরাংসি চ
9.21
কূপাশ্চ সপ্রস্রবণা দেহবন্তো যুধিষ্ঠির
পল্বলানি তডাগানি দেহবন্ত্যথ ভারত
9.22
দিশস্তথা মহী চৈব তথা সর্বে মহীধরাঃ
উপাসতে মহাত্মানং সর্বে জলচরাস্তথা
9.23
গীতবাদিত্রবন্তশ্চ গন্ধর্বাপ্সরসাং গণাঃ
স্তুবন্তো বরুণং তস্যাং সর্ব এব সমাসতে
9.24
মহীধরা রত্নবন্তো রসা যেষু প্রতিষ্ঠিতাঃ
সর্বে বিগ্রহবন্তস্তে তমীশ্বরমুপাসতে
9.25
এষা ময়া সংপততা বারুণী ভরতর্ষভ
দৃষ্টপূর্বা সভা রম্যা কুবেরস্য সভাং শৃণু