Utshovঅধ্যায় 8
8.1
নারদ উবাচ
কথয়িষ্যে সভাং দিব্যাং যুধিষ্ঠির নিবোধ তাম্
বৈবস্বতস্য যামর্থে বিশ্বকর্মা চকার হ
8.2
তৈজসী সা সভা রাজন্বভূব শতয়োজনা
বিস্তারায়ামসংপন্না ভূয়সী চাপি পাণ্ডব
8.3
অর্কপ্রকাশা ভ্রাজিষ্ণুঃ সর্বতঃ কামচারিণী
নৈবাতিশীতা নাত্যুষ্ণা মনসশ্চ প্রহর্ষিণী
8.4
ন শোকো ন জরা তস্যাং ক্ষুত্পিপাসে ন চাপ্রিয়ম্
ন চ দৈন্যং ক্লমো বাপি প্রতিকূলং ন চাপ্যুত
8.5
সর্বে কামাঃ স্থিতাস্তস্যাং যে দিব্যা যে চ মানুষাঃ
রসবচ্চ প্রভূতং চ ভক্ষ্যভোজ্যমরিংদম
8.6
পুণ্যগন্ধাঃ স্রজস্তত্র নিত্যপুষ্পফলদ্রুমাঃ
রসবন্তি চ তোয়ানি শীতান্যুষ্ণানি চৈব হ
8.7
তস্যাং রাজর্ষয়ঃ পুণ্যাস্তথা ব্রহ্মর্ষয়োঽমলাঃ
যমং বৈবস্বতং তাত প্রহৃষ্টাঃ পর্যুপাসতে
8.8
যয়াতির্নহুষঃ পূরুর্মান্ধাতা সোমকো নৃগঃ
ত্রসদস্যুশ্চ তুরয়ঃ কৃতবীর্যঃ শ্রুতশ্রবাঃ
8.9
অরিপ্রণুত্সুসিংহশ্চ কৃতবেগঃ কৃতির্নিমিঃ
প্রতর্দনঃ শিবির্মত্স্যঃ পৃথ্বক্ষোঽথ বৃহদ্রথঃ
8.10
ঐডো মরুত্তঃ কুশিকঃ সাংকাশ্যঃ সাংকৃতির্ভবঃ
চতুরশ্বঃ সদশ্বোর্মিঃ কার্তবীর্যশ্চ পার্থিবঃ
8.11
ভরতস্তথা সুরথঃ সুনীথো নৈষধো নলঃ
দিবোদাসোঽথ সুমনা অম্বরীষো ভগীরথঃ
8.12
ব্যশ্বঃ সদশ্বো বধ্র্যশ্বঃ পঞ্চহস্তঃ পৃথুশ্রবাঃ
রুষদ্গুর্বৃষসেনশ্চ ক্ষুপশ্চ সুমহাবলঃ
8.13
রুষদশ্বো বসুমনাঃ পুরুকুত্সো ধ্বজী রথী
আর্ষ্টিষেণো দিলীপশ্চ মহাত্মা চাপ্যুশীনরঃ
8.14
ঔশীনরঃ পুণ্ডরীকঃ শর্যাতিঃ শরভঃ শুচিঃ
অঙ্গোঽরিষ্টশ্চ বেনশ্চ দুঃষন্তঃ সংজয়ো জয়ঃ
8.15
ভাঙ্গাস্বরিঃ সুনীথশ্চ নিষধোঽথ ত্বিষীরথঃ
করংধমো বাহ্লিকশ্চ সুদ্যুম্নো বলবান্মধুঃ
8.16
কপোতরোমা তৃণকঃ সহদেবার্জুনৌ তথা
রামো দাশরথিশ্চৈব লক্ষ্মণোঽথ প্রতর্দনঃ
8.17
অলর্কঃ কক্ষসেনশ্চ গয়ো গৌরাশ্ব এব চ
জামদগ্ন্যোঽথ রামোঽত্র নাভাগসগরৌ তথা
8.18
ভূরিদ্যুম্নো মহাশ্বশ্চ পৃথ্বশ্বো জনকস্তথা
বৈন্যো রাজা বারিষেণঃ পুরুজো জনমেজয়ঃ
8.19
ব্রহ্মদত্তস্ত্রিগর্তশ্চ রাজোপরিচরস্তথা
ইন্দ্রদ্যুম্নো ভীমজানুর্গয়ঃ পৃষ্ঠো নয়োঽনঘঃ
8.20
পদ্মোঽথ মুচুকুন্দশ্চ ভূরিদ্যুম্নঃ প্রসেনজিৎ
অরিষ্টনেমিঃ প্রদ্যুম্নঃ পৃথগশ্বোঽজকস্তথা
8.21
শতং মত্স্যা নৃপতয়ঃ শতং নীপাঃ শতং হয়াঃ
ধৃতরাষ্ট্রাশ্চৈকশতমশীতির্জনমেজয়াঃ
8.22
শতং চ ব্রহ্মদত্তানামীরিণাং বৈরিণাং শতম্
শংতনুশ্চৈব রাজর্ষিঃ পাণ্ডুশ্চৈব পিতা তব
8.23
উশদ্গবঃ শতরথো দেবরাজো জয়দ্রথঃ
বৃষাদর্ভিশ্চ রাজর্ষির্ধাম্না সহ সমন্ত্রিণা
8.24
অথাপরে সহস্রাণি যে গতাঃ শশবিন্দবঃ
ইষ্ট্বাশ্বমেধৈর্বহুভির্মহদ্ভির্ভূরিদক্ষিণৈঃ
8.25
এতে রাজর্ষয়ঃ পুণ্যাঃ কীর্তিমন্তো বহুশ্রুতাঃ
তস্যাং সভায়াং রাজর্ষে বৈবস্বতমুপাসতে
8.26
অগস্ত্যোঽথ মতঙ্গশ্চ কালো মৃত্যুস্তথৈব চ
যজ্বানশ্চৈব সিদ্ধাশ্চ যে চ যোগশরীরিণঃ
8.27
অগ্নিষ্বাত্তাশ্চ পিতরঃ ফেনপাশ্চোষ্মপাশ্চ যে
স্বধাবন্তো বর্হিষদো মূর্তিমন্তস্তথাপরে
8.28
কালচক্রং চ সাক্ষাচ্চ ভগবান্হব্যবাহনঃ
নরা দুষ্কৃতকর্মাণো দক্ষিণায়নমৃত্যবঃ
8.29
কালস্য নয়নে যুক্তা যমস্য পুরুষাশ্চ যে
তস্যাং শিংশপপালাশাস্তথা কাশকুশাদয়ঃ
উপাসতে ধর্মরাজং মূর্তিমন্তো নিরাময়াঃ
8.30
এতে চান্যে চ বহবঃ পিতৃরাজসভাসদঃ
অশক্যাঃ পরিসংখ্যাতুং নামভিঃ কর্মভিস্তথা
8.31
অসংবাধা হি সা পার্থ রম্যা কামগমা সভা
দীর্ঘকালং তপস্তপ্ত্বা নির্মিতা বিশ্বকর্মণা
8.32
প্রভাসন্তী জ্বলন্তীব তেজসা স্বেন ভারত
তামুগ্রতপসো যান্তি সুব্রতাঃ সত্যবাদিনঃ
8.33
শান্তাঃ সংন্যাসিনঃ সিদ্ধাঃ পূতাঃ পুণ্যেন কর্মণা
সর্বে ভাস্বরদেহাশ্চ সর্বে চ বিরজোম্বরাঃ
8.34
চিত্রাঙ্গদাশ্চিত্রমাল্যাঃ সর্বে জ্বলিতকুণ্ডলাঃ
সুকৃতৈঃ কর্মভিঃ পুণ্যৈঃ পরিবর্হৈর্বিভূষিতাঃ
8.35
গন্ধর্বাশ্চ মহাত্মানঃ শতশশ্চাপ্সরোগণাঃ
বাদিত্রং নৃত্তগীতং চ হাস্যং লাস্যং চ সর্বশঃ
8.36
পুণ্যাশ্চ গন্ধাঃ শব্দাশ্চ তস্যাং পার্থ সমন্ততঃ
দিব্যানি মাল্যানি চ তামুপতিষ্ঠন্তি সর্বশঃ
8.37
শতং শতসহস্রাণি ধর্মিণাং তং প্রজেশ্বরম্
উপাসতে মহাত্মানং রূপয়ুক্তা মনস্বিনঃ
8.38
ঈদৃশী সা সভা রাজন্পিতৃরাজ্ঞো মহাত্মনঃ
বরুণস্যাপি বক্ষ্যামি সভাং পুষ্করমালিনীম্