অধ্যায় 7

7.1

নারদ উবাচ
শক্রস্য তু সভা দিব্যা ভাস্বরা কর্মভির্জিতা
স্বয়ং শক্রেণ কৌরব্য নির্মিতার্কসমপ্রভা

7.2

বিস্তীর্ণা যোজনশতং শতমধ্যর্ধমায়তা
বৈহায়সী কামগমা পঞ্চয়োজনমুচ্ছ্রিতা

7.3

জরাশোকক্লমাপেতা নিরাতঙ্কা শিবা শুভা
বেশ্মাসনবতী রম্যা দিব্যপাদপশোভিতা

7.4

তস্যাং দেবেশ্বরঃ পার্থ সভায়াং পরমাসনে
আস্তে শচ্যা মহেন্দ্রাণ্যা শ্রিয়া লক্ষ্ম্যা চ ভারত

7.5

বিভ্রদ্বপুরনির্দেশ্যং কিরীটী লোহিতাঙ্গদঃ
বিরজোম্বরশ্চিত্রমাল্যো হ্রীকীর্তিদ্যুতিভিঃ সহ

7.6

তস্যামুপাসতে নিত্যং মহাত্মানং শতক্রতুম্
মরুতঃ সর্বতো রাজন্সর্বে চ গৃহমেধিনঃ
সিদ্ধা দেবর্ষয়শ্চৈব সাধ্যা দেবগণাস্তথা

7.7

এতে সানুচরাঃ সর্বে দিব্যরূপাঃ স্বলংকৃতাঃ
উপাসতে মহাত্মানং দেবরাজমরিংদমম্

7.8

তথা দেবর্ষয়ঃ সর্বে পার্থ শক্রমুপাসতে
অমলা ধূতপাপ্মানো দীপ্যমানা ইবাগ্নয়ঃ
তেজস্বিনঃ সোময়ুজো বিপাপা বিগতক্লমাঃ

7.9

পরাশরঃ পর্বতশ্চ তথা সাবর্ণিগালবৌ
শঙ্খশ্চ লিখিতশ্চৈব তথা গৌরশিরা মুনিঃ

7.10

দুর্বাসাশ্চ দীর্ঘতপা যাজ্ঞবল্ক্যোঽথ ভালুকিঃ
উদ্দালকঃ শ্বেতকেতুস্তথা শাট্যায়নঃ প্রভুঃ

7.11

হবিষ্মাংশ্চ গবিষ্ঠশ্চ হরিশ্চন্দ্রশ্চ পার্থিবঃ
হৃদ্যশ্চোদরশাণ্ডিল্যঃ পারাশর্যঃ কৃষীবলঃ

7.12

বাতস্কন্ধো বিশাখশ্চ বিধাতা কাল এব চ
অনন্তদন্তস্ত্বষ্টা চ বিশ্বকর্মা চ তুম্বুরুঃ

7.13

অয়োনিজা যোনিজাশ্চ বায়ুভক্ষা হুতাশিনঃ
ঈশানং সর্বলোকস্য বজ্রিণং সমুপাসতে

7.14

সহদেবঃ সুনীথশ্চ বাল্মীকিশ্চ মহাতপাঃ
সমীকঃ সত্যবাংশ্চৈব প্রচেতাঃ সত্যসংগরঃ

7.15

মেধাতিথির্বামদেবঃ পুলস্ত্যঃ পুলহঃ ক্রতুঃ
মরুত্তশ্চ মরীচিশ্চ স্থাণুশ্চাত্রির্মহাতপাঃ

7.16

কক্ষীবান্গৌতমস্তার্ক্ষ্যস্তথা বৈশ্বানরো মুনিঃ
মুনিঃ কালকবৃক্ষীয় আশ্রাব্যোঽথ হিরণ্যদঃ
সংবর্তো দেবহব্যশ্চ বিষ্বক্সেনশ্চ বীর্যবান্

7.17

দিব্যা আপস্তথৌষধ্যঃ শ্রদ্ধা মেধা সরস্বতী
অর্থো ধর্মশ্চ কামশ্চ বিদ্যুতশ্চাপি পাণ্ডব

7.18

জলবাহাস্তথা মেঘা বায়বঃ স্তনয়িত্নবঃ
প্রাচী দিগ্যজ্ঞবাহাশ্চ পাবকাঃ সপ্তবিংশতিঃ

7.19

অগ্নীষোমৌ তথেন্দ্রাগ্নী মিত্রোঽথ সবিতার্যমা
ভগো বিশ্বে চ সাধ্যাশ্চ শুক্রো মন্থী চ ভারত

7.20

যজ্ঞাশ্চ দক্ষিণাশ্চৈব গ্রহাঃ স্তোভাশ্চ সর্বশঃ
যজ্ঞবাহাশ্চ যে মন্ত্রাঃ সর্বে তত্র সমাসতে

7.21

তথৈবাপ্সরসো রাজন্গন্ধর্বাশ্চ মনোরমাঃ
নৃত্যবাদিত্রগীতৈশ্চ হাস্যৈশ্চ বিবিধৈরপি
রময়ন্তি স্ম নৃপতে দেবরাজং শতক্রতুম্

7.22

স্তুতিভির্মঙ্গলৈশ্চৈব স্তুবন্তঃ কর্মভিস্তথা
বিক্রমৈশ্চ মহাত্মানং বলবৃত্রনিষূদনম্

7.23

ব্রহ্মরাজর্ষয়ঃ সর্বে সর্বে দেবর্ষয়স্তথা
বিমানৈর্বিবিধৈর্দিব্যৈর্ভ্রাজমানৈরিবাগ্নিভিঃ

7.24

স্রগ্বিণো ভূষিতাশ্চান্যে যান্তি চায়ান্তি চাপরে
বৃহস্পতিশ্চ শুক্রশ্চ তস্যামায়য়তুঃ সহ

7.25

এতে চান্যে চ বহবো যতাত্মানো যতব্রতাঃ
বিমানৈশ্চন্দ্রসংকাশৈঃ সোমবত্প্রিয়দর্শনাঃ
ব্রহ্মণো বচনাদ্রাজন্ভৃগুঃ সপ্তর্ষয়স্তথা

7.26

এষা সভা ময়া রাজন্দৃষ্টা পুষ্করমালিনী
শতক্রতোর্মহারাজ যাম্যাং শৃণু মমানঘ

Contains text from DharmicData, made available under the Open Database License (ODbL). Simple meanings are written by AI and can contain mistakes.