অধ্যায় 6

6.1

বৈশংপায়ন উবাচ
সংপূজ্যাথাভ্যনুজ্ঞাতো মহর্ষের্বচনাত্পরম্
প্রত্যুবাচানুপূর্ব্যেণ ধর্মরাজো যুধিষ্ঠিরঃ

ভগবন্ন্যায্যমাহৈতং যথাবদ্ধর্মনিশ্চয়ম্
যথাশক্তি যথান্যায়ং ক্রিয়তেঽয়ং বিধির্ময়া

রাজভির্যদ্যথা কার্যং পুরা তত্তন্ন সংশয়ঃ
যথান্যায়োপনীতার্থং কৃতং হেতুমদর্থবৎ

বয়ং তু সত্পথং তেষাং যাতুমিচ্ছামহে প্রভো
ন তু শক্যং তথা গন্তুং যথা তৈর্নিয়তাত্মভিঃ

এবমুক্ত্বা স ধর্মাত্মা বাক্যং তদভিপূজ্য চ
মুহূর্তাত্প্রাপ্তকালং চ দৃষ্ট্বা লোকচরং মুনিম্

নারদং স্বস্থমাসীনমুপাসীনো যুধিষ্ঠিরঃ
অপৃচ্ছত্পাণ্ডবস্তত্র রাজমধ্যে মহামতিঃ

ভবান্সংচরতে লোকান্সদা নানাবিধান্বহূন্
ব্রহ্মণা নির্মিতান্পূর্বং প্রেক্ষমাণো মনোজবঃ

ঈদৃশী ভবতা কাচিদ্দৃষ্টপূর্বা সভা ক্বচিৎ
ইতো বা শ্রেয়সী ব্রহ্মংস্তন্মমাচক্ষ্ব পৃচ্ছতঃ

তচ্ছ্রুত্বা নারদস্তস্য ধর্মরাজস্য ভাষিতম্
পাণ্ডবং প্রত্যুবাচেদং স্ময়ন্মধুরয়া গিরা

মানুষেষু ন মে তাত দৃষ্টপূর্বা ন চ শ্রুতা
সভা মণিময়ী রাজন্যথেয়ং তব ভারত

সভাং তু পিতৃরাজস্য বরুণস্য চ ধীমতঃ
কথয়িষ্যে তথেন্দ্রস্য কৈলাসনিলয়স্য চ

ব্রহ্মণশ্চ সভাং দিব্যাং কথয়িষ্যে গতক্লমাম্
যদি তে শ্রবণে বুদ্ধির্বর্ততে ভরতর্ষভ

নারদেনৈবমুক্তস্তু ধর্মরাজো যুধিষ্ঠিরঃ
প্রাঞ্জলির্ভ্রাতৃভিঃ সার্ধং তৈশ্চ সর্বৈর্নৃপৈর্বৃতঃ

নারদং প্রত্যুবাচেদং ধর্মরাজো মহামনাঃ
সভাঃ কথয় তাঃ সর্বাঃ শ্রোতুমিচ্ছামহে বয়ম্

কিংদ্রব্যাস্তাঃ সভা ব্রহ্মন্কিংবিস্তারাঃ কিমায়তাঃ
পিতামহং চ কে তস্যাং সভায়াং পর্যুপাসতে

বাসবং দেবরাজং চ যমং বৈবস্বতং চ কে
বরুণং চ কুবেরং চ সভায়াং পর্যুপাসতে

এতত্সর্বং যথাতত্ত্বং দেবর্ষে বদতস্তব
শ্রোতুমিচ্ছাম সহিতাঃ পরং কৌতূহলং হি নঃ

এবমুক্তঃ পাণ্ডবেন নারদঃ প্রত্যুবাচ তম্
ক্রমেণ রাজন্দিব্যাস্তাঃ শ্রূয়ন্তামিহ নঃ সভাঃ