Utshovঅধ্যায় 5
5.1
বৈশংপায়ন উবাচ
তথা তত্রোপবিষ্টেষু পাণ্ডবেষু মহাত্মসু
মহত্সু চোপবিষ্টেষু গন্ধর্বেষু চ ভারত
5.2
লোকাননুচরন্সর্বানাগমত্তাং সভামৃষিঃ
নারদঃ সুমহাতেজা ঋষিভিঃ সহিতস্তদা
5.3
পারিজাতেন রাজেন্দ্র রৈবতেন চ ধীমতা
সুমুখেন চ সৌম্যেন দেবর্ষিরমিতদ্যুতিঃ
সভাস্থান্পাণ্ডবান্দ্রষ্টুং প্রীয়মাণো মনোজবঃ
5.4
তমাগতমৃষিং দৃষ্ট্বা নারদং সর্বধর্মবিৎ
সহসা পাণ্ডবশ্রেষ্ঠঃ প্রত্যুত্থায়ানুজৈঃ সহ
অভ্যবাদয়ত প্রীত্যা বিনয়াবনতস্তদা
5.5
তদর্হমাসনং তস্মৈ সংপ্রদায় যথাবিধি
অর্চয়ামাস রত্নৈশ্চ সর্বকামৈশ্চ ধর্মবিৎ
5.6
সোঽর্চিতঃ পাণ্ডবৈঃ সর্বৈর্মহর্ষির্বেদপারগঃ
ধর্মকামার্থসংয়ুক্তং পপ্রচ্ছেদং যুধিষ্ঠিরম্
5.7
নারদ উবাচ
কচ্চিদর্থাশ্চ কল্পন্তে ধর্মে চ রমতে মনঃ
সুখানি চানুভূয়ন্তে মনশ্চ ন বিহন্যতে
5.8
কচ্চিদাচরিতাং পূর্বৈর্নরদেব পিতামহৈঃ
বর্তসে বৃত্তিমক্ষীণাং ধর্মার্থসহিতাং নৃষু
5.9
কচ্চিদর্থেন বা ধর্মং ধর্মেণার্থমথাপি বা
উভৌ বা প্রীতিসারেণ ন কামেন প্রবাধসে
5.10
কচ্চিদর্থং চ ধর্মং চ কামং চ জয়তাং বর
বিভজ্য কালে কালজ্ঞ সদা বরদ সেবসে
5.11
কচ্চিদ্রাজগুণৈঃ ষড্ভিঃ সপ্তোপায়াংস্তথানঘ
বলাবলং তথা সম্যক্চতুর্দশ পরীক্ষসে
5.12
কচ্চিদাত্মানমন্বীক্ষ্য পরাংশ্চ জয়তাং বর
তথা সংধায় কর্মাণি অষ্টৌ ভারত সেবসে
5.13
কচ্চিত্প্রকৃতয়ঃ ষট্তে ন লুপ্তা ভরতর্ষভ
আঢ্যাস্তথাব্যসনিনঃ স্বনুরক্তাশ্চ সর্বশঃ
5.14
কচ্চিন্ন তর্কৈর্দূতৈর্বা যে চাপ্যপরিশঙ্কিতাঃ
ত্বত্তো বা তব বামাত্যৈর্ভিদ্যতে জাতু মন্ত্রিতম্
5.15
কচ্চিত্সংধিং যথাকালং বিগ্রহং চোপসেবসে
কচ্চিদ্বৃত্তিমুদাসীনে মধ্যমে চানুবর্তসে
5.16
কচ্চিদাত্মসমা বুদ্ধ্যা শুচয়ো জীবিতক্ষমাঃ
কুলীনাশ্চানুরক্তাশ্চ কৃতাস্তে বীর মন্ত্রিণঃ
5.17
বিজয়ো মন্ত্রমূলো হি রাজ্ঞাং ভবতি ভারত
সুসংবৃতো মন্ত্রধনৈরমাত্যৈঃ শাস্ত্রকোবিদৈঃ
5.18
কচ্চিন্নিদ্রাবশং নৈষি কচ্চিত্কালে বিবুধ্যসে
কচ্চিচ্চাপররাত্রেষু চিন্তয়স্যর্থমর্থবিৎ
5.19
কচ্চিন্মন্ত্রয়সে নৈকঃ কচ্চিন্ন বহুভিঃ সহ
কচ্চিত্তে মন্ত্রিতো মন্ত্রো ন রাষ্ট্রমনুধাবতি
5.20
কচ্চিদর্থান্বিনিশ্চিত্য লঘুমূলান্মহোদয়ান্
ক্ষিপ্রমারভসে কর্তুং ন বিঘ্নয়সি তাদৃশান্
5.21
কচ্চিন্ন সর্বে কর্মান্তাঃ পরোক্ষাস্তে বিশঙ্কিতাঃ
সর্বে বা পুনরুত্সৃষ্টাঃ সংসৃষ্টং হ্যত্র কারণম্
5.22
কচ্চিদ্রাজন্কৃতান্যেব কৃতপ্রায়াণি বা পুনঃ
বিদুস্তে বীর কর্মাণি নানবাপ্তানি কানিচিৎ
5.23
কচ্চিত্কারণিকাঃ সর্বে সর্বশাস্ত্রেষু কোবিদাঃ
কারয়ন্তি কুমারাংশ্চ যোধমুখ্যাংশ্চ সর্বশঃ
5.24
কচ্চিত্সহস্রৈর্মূর্খাণামেকং ক্রীণাসি পণ্ডিতম্
পণ্ডিতো হ্যর্থকৃচ্ছ্রেষু কুর্যান্নিঃশ্রেয়সং পরম্
5.25
কচ্চিদ্দুর্গাণি সর্বাণি ধনধান্যায়ুধোদকৈঃ
যন্ত্রৈশ্চ পরিপূর্ণানি তথা শিল্পিধনুর্ধরৈঃ
5.26
একোঽপ্যমাত্যো মেধাবী শূরো দান্তো বিচক্ষণঃ
রাজানং রাজপুত্রং বা প্রাপয়েন্মহতীং শ্রিয়ম্
5.27
কচ্চিদষ্টাদশান্যেষু স্বপক্ষে দশ পঞ্চ চ
ত্রিভিস্ত্রিভিরবিজ্ঞাতৈর্বেত্সি তীর্থানি চারকৈঃ
5.28
কচ্চিদ্দ্বিষামবিদিতঃ প্রতিয়ত্তশ্চ সর্বদা
নিত্যয়ুক্তো রিপূন্সর্বান্বীক্ষসে রিপুসূদন
5.29
কচ্চিদ্বিনয়সংপন্নঃ কুলপুত্রো বহুশ্রুতঃ
অনসূয়ুরনুপ্রষ্টা সত্কৃতস্তে পুরোহিতঃ
5.30
কচ্চিদগ্নিষু তে যুক্তো বিধিজ্ঞো মতিমানৃজুঃ
হুতং চ হোষ্যমাণং চ কালে বেদয়তে সদা
5.31
কচ্চিদঙ্গেষু নিষ্ণাতো জ্যোতিষাং প্রতিপাদকঃ
উত্পাতেষু চ সর্বেষু দৈবজ্ঞঃ কুশলস্তব
5.32
কচ্চিন্মুখ্যা মহত্স্বেব মধ্যমেষু চ মধ্যমাঃ
জঘন্যাশ্চ জঘন্যেষু ভৃত্যাঃ কর্মসু যোজিতাঃ
5.33
অমাত্যানুপধাতীতান্পিতৃপৈতামহাঞ্শুচীন্
শ্রেষ্ঠাঞ্শ্রেষ্ঠেষু কচ্চিত্ত্বং নিয়োজয়সি কর্মসু
5.34
কচ্চিন্নোগ্রেণ দণ্ডেন ভৃশমুদ্বেজিতপ্রজাঃ
রাষ্ট্রং তবানুশাসন্তি মন্ত্রিণো ভরতর্ষভ
5.35
কচ্চিত্ত্বাং নাবজানন্তি যাজকাঃ পতিতং যথা
উগ্রপ্রতিগ্রহীতারং কাময়ানমিব স্ত্রিয়ঃ
5.36
কচ্চিদ্ধৃষ্টশ্চ শূরশ্চ মতিমান্ধৃতিমাঞ্শুচিঃ
কুলীনশ্চানুরক্তশ্চ দক্ষঃ সেনাপতিস্তব
5.37
কচ্চিদ্বলস্য তে মুখ্যাঃ সর্বে যুদ্ধবিশারদাঃ
দৃষ্টাপদানা বিক্রান্তাস্ত্বয়া সত্কৃত্য মানিতাঃ
5.38
কচ্চিদ্বলস্য ভক্তং চ বেতনং চ যথোচিতম্
সংপ্রাপ্তকালং দাতব্যং দদাসি ন বিকর্ষসি
5.39
কালাতিক্রমণাদ্ধ্যেতে ভক্তবেতনয়োর্ভৃতাঃ
ভর্তুঃ কুপ্যন্তি দৌর্গত্যাত্সোঽনর্থঃ সুমহান্স্মৃতঃ
5.40
কচ্চিত্সর্বেঽনুরক্তাস্ত্বাং কুলপুত্রাঃ প্রধানতঃ
কচ্চিত্প্রাণাংস্তবার্থেষু সংত্যজন্তি সদা যুধি
5.41
কচ্চিন্নৈকো বহূনর্থান্সর্বশঃ সাংপরায়িকান্
অনুশাস্সি যথাকামং কামাত্মা শাসনাতিগঃ
5.42
কচ্চিত্পুরুষকারেণ পুরুষঃ কর্ম শোভয়ন্
লভতে মানমধিকং ভূয়ো বা ভক্তবেতনম্
5.43
কচ্চিদ্বিদ্যাবিনীতাংশ্চ নরাঞ্জ্ঞানবিশারদান্
যথার্হং গুণতশ্চৈব দানেনাভ্যবপদ্যসে
5.44
কচ্চিদ্দারান্মনুষ্যাণাং তবার্থে মৃত্যুমেয়ুষাম্
ব্যসনং চাভ্যুপেতানাং বিভর্ষি ভরতর্ষভ
5.45
কচ্চিদ্ভয়াদুপনতং ক্লীবং বা রিপুমাগতম্
যুদ্ধে বা বিজিতং পার্থ পুত্রবত্পরিরক্ষসি
5.46
কচ্চিত্ত্বমেব সর্বস্যাঃ পৃথিব্যাঃ পৃথিবীপতে
সমশ্চ নাভিশঙ্ক্যশ্চ যথা মাতা যথা পিতা
5.47
কচ্চিদ্ব্যসনিনং শত্রুং নিশম্য ভরতর্ষভ
অভিয়াসি জবেনৈব সমীক্ষ্য ত্রিবিধং বলম্
5.48
পার্ষ্ণিমূলং চ বিজ্ঞায় ব্যবসায়ং পরাজয়ম্
বলস্য চ মহারাজ দত্ত্বা বেতনমগ্রতঃ
5.49
কচ্চিচ্চ বলমুখ্যেভ্যঃ পররাষ্ট্রে পরংতপ
উপচ্ছন্নানি রত্নানি প্রয়চ্ছসি যথার্হতঃ
5.50
কচ্চিদাত্মানমেবাগ্রে বিজিত্য বিজিতেন্দ্রিয়ঃ
পরাঞ্জিগীষসে পার্থ প্রমত্তানজিতেন্দ্রিয়ান্
5.51
কচ্চিত্তে যাস্যতঃ শত্রূন্পূর্বং যান্তি স্বনুষ্ঠিতাঃ
সাম দানং চ ভেদশ্চ দণ্ডশ্চ বিধিবদ্গুণাঃ
5.52
কচ্চিন্মূলং দৃঢং কৃত্বা যাত্রাং যাসি বিশাং পতে
তাংশ্চ বিক্রমসে জেতুং জিত্বা চ পরিরক্ষসি
5.53
কচ্চিদষ্টাঙ্গসংয়ুক্তা চতুর্বিধবলা চমূঃ
বলমুখ্যৈঃ সুনীতা তে দ্বিষতাং প্রতিবাধনী
5.54
কচ্চিল্লবং চ মুষ্টিং চ পররাষ্ট্রে পরংতপ
অবিহায় মহারাজ বিহংসি সমরে রিপূন্
5.55
কচ্চিত্স্বপররাষ্ট্রেষু বহবোঽধিকৃতাস্তব
অর্থান্সমনুতিষ্ঠন্তি রক্ষন্তি চ পরস্পরম্
5.56
কচ্চিদভ্যবহার্যাণি গাত্রসংস্পর্শকানি চ
ঘ্রেয়াণি চ মহারাজ রক্ষন্ত্যনুমতাস্তব
5.57
কচ্চিত্কোশং চ কোষ্ঠং চ বাহনং দ্বারমায়ুধম্
আয়শ্চ কৃতকল্যাণৈস্তব ভক্তৈরনুষ্ঠিতঃ
5.58
কচ্চিদাভ্যন্তরেভ্যশ্চ বাহ্যেভ্যশ্চ বিশাং পতে
রক্ষস্যাত্মানমেবাগ্রে তাংশ্চ স্বেভ্যো মিথশ্চ তান্
5.59
কচ্চিন্ন পানে দ্যূতে বা ক্রীডাসু প্রমদাসু চ
প্রতিজানন্তি পূর্বাহ্ণে ব্যয়ং ব্যসনজং তব
5.60
কচ্চিদায়স্য চার্ধেন চতুর্ভাগেন বা পুনঃ
পাদভাগৈস্ত্রিভির্বাপি ব্যয়ঃ সংশোধ্যতে তব
5.61
কচ্চিজ্জ্ঞাতীন্গুরূন্বৃদ্ধান্বণিজঃ শিল্পিনঃ শ্রিতান্
অভীক্ষ্ণমনুগৃহ্ণাসি ধনধান্যেন দুর্গতান্
5.62
কচ্চিদায়ব্যয়ে যুক্তাঃ সর্বে গণকলেখকাঃ
অনুতিষ্ঠন্তি পূর্বাহ্ণে নিত্যমায়ব্যয়ং তব
5.63
কচ্চিদর্থেষু সংপ্রৌঢান্হিতকামাননুপ্রিয়ান্
নাপকর্ষসি কর্মভ্যঃ পূর্বমপ্রাপ্য কিল্বিষম্
5.64
কচ্চিদ্বিদিত্বা পুরুষানুত্তমাধমমধ্যমান্
ত্বং কর্মস্বনুরূপেষু নিয়োজয়সি ভারত
5.65
কচ্চিন্ন লুব্ধাশ্চৌরা বা বৈরিণো বা বিশাং পতে
অপ্রাপ্তব্যবহারা বা তব কর্মস্বনুষ্ঠিতাঃ
5.66
কচ্চিন্ন লুব্ধৈশ্চৌরৈর্বা কুমারৈঃ স্ত্রীবলেন বা
ত্বয়া বা পীড্যতে রাষ্ট্রং কচ্চিত্পুষ্টাঃ কৃষীবলাঃ
5.67
কচ্চিদ্রাষ্ট্রে তডাগানি পূর্ণানি চ মহান্তি চ
ভাগশো বিনিবিষ্টানি ন কৃষির্দেবমাতৃকা
5.68
কচ্চিদ্বীজং চ ভক্তং চ কর্ষকায়াবসীদতে
প্রতিকং চ শতং বৃদ্ধ্যা দদাস্যৃণমনুগ্রহম্
5.69
কচ্চিত্স্বনুষ্ঠিতা তাত বার্ত্তা তে সাধুভির্জনৈঃ
বার্ত্তায়াং সংশ্রিতস্তাত লোকোঽয়ং সুখমেধতে
5.70
কচ্চিচ্ছুচিকৃতঃ প্রাজ্ঞাঃ পঞ্চ পঞ্চ স্বনুষ্ঠিতাঃ
ক্ষেমং কুর্বন্তি সংহত্য রাজঞ্জনপদে তব
5.71
কচ্চিন্নগরগুপ্ত্যর্থং গ্রামা নগরবত্কৃতাঃ
গ্রামবচ্চ কৃতা রক্ষা তে চ সর্বে তদর্পণাঃ
5.72
কচ্চিদ্বলেনানুগতাঃ সমানি বিষমাণি চ
পুরাণচৌরাঃ সাধ্যক্ষাশ্চরন্তি বিষয়ে তব
5.73
কচ্চিত্স্ত্রিয়ঃ সান্ত্বয়সি কচ্চিত্তাশ্চ সুরক্ষিতাঃ
কচ্চিন্ন শ্রদ্দধাস্যাসাং কচ্চিদ্গুহ্যং ন ভাষসে
5.74
কচ্চিচ্চারান্নিশি শ্রুত্বা তত্কার্যমনুচিন্ত্য চ
প্রিয়াণ্যনুভবঞ্শেষে বিদিত্বাভ্যন্তরং জনম্
5.75
কচ্চিদ্দ্বৌ প্রথমৌ যামৌ রাত্র্যাং সুপ্ত্বা বিশাং পতে
সংচিন্তয়সি ধর্মার্থৌ যাম উত্থায় পশ্চিমে
5.76
কচ্চিদ্দর্শয়সে নিত্যং মনুষ্যান্সমলংকৃতান্
উত্থায় কালে কালজ্ঞঃ সহ পাণ্ডব মন্ত্রিভিঃ
5.77
কচ্চিদ্রক্তাম্বরধরাঃ খড্গহস্তাঃ স্বলংকৃতাঃ
অভিতস্ত্বামুপাসন্তে রক্ষণার্থমরিংদম
5.78
কচ্চিদ্দণ্ড্যেষু যমবত্পূজ্যেষু চ বিশাং পতে
পরীক্ষ্য বর্তসে সম্যগপ্রিয়েষু প্রিয়েষু চ
5.79
কচ্চিচ্ছারীরমাবাধমৌষধৈর্নিয়মেন বা
মানসং বৃদ্ধসেবাভিঃ সদা পার্থাপকর্ষসি
5.80
কচ্চিদ্বৈদ্যাশ্চিকিত্সায়ামষ্টাঙ্গায়াং বিশারদাঃ
সুহৃদশ্চানুরক্তাশ্চ শরীরে তে হিতাঃ সদা
5.81
কচ্চিন্ন মানান্মোহাদ্বা কামাদ্বাপি বিশাং পতে
অর্থিপ্রত্যর্থিনঃ প্রাপ্তানপাস্যসি কথংচন
5.82
কচ্চিন্ন লোভান্মোহাদ্বা বিশ্রম্ভাত্প্রণয়েন বা
আশ্রিতানাং মনুষ্যাণাং বৃত্তিং ত্বং সংরুণত্সি চ
5.83
কচ্চিত্পৌরা ন সহিতা যে চ তে রাষ্ট্রবাসিনঃ
ত্বয়া সহ বিরুধ্যন্তে পরৈঃ ক্রীতাঃ কথংচন
5.84
কচ্চিত্তে দুর্বলঃ শত্রুর্বলেনোপনিপীডিতঃ
মন্ত্রেণ বলবান্কশ্চিদুভাভ্যাং বা যুধিষ্ঠির
5.85
কচ্চিত্সর্বেঽনুরক্তাস্ত্বাং ভূমিপালাঃ প্রধানতঃ
কচ্চিত্প্রাণাংস্ত্বদর্থেষু সংত্যজন্তি ত্বয়া হৃতাঃ
5.86
কচ্চিত্তে সর্ববিদ্যাসু গুণতোঽর্চা প্রবর্ততে
ব্রাহ্মণানাং চ সাধূনাং তব নিঃশ্রেয়সে শুভা
5.87
কচ্চিদ্ধর্মে ত্রয়ীমূলে পূর্বৈরাচরিতে জনৈঃ
বর্তমানস্তথা কর্তুং তস্মিন্কর্মণি বর্তসে
5.88
কচ্চিত্তব গৃহেঽন্নানি স্বাদূন্যশ্নন্তি বৈ দ্বিজাঃ
গুণবন্তি গুণোপেতাস্তবাধ্যক্ষং সদক্ষিণম্
5.89
কচ্চিত্ক্রতূনেকচিত্তো বাজপেয়াংশ্চ সর্বশঃ
পুণ্ডরীকাংশ্চ কার্ত্স্ন্যেন যতসে কর্তুমাত্মবান্
5.90
কচ্চিজ্জ্ঞাতীন্গুরূন্বৃদ্ধান্দৈবতাংস্তাপসানপি
চৈত্যাংশ্চ বৃক্ষান্কল্যাণান্ব্রাহ্মণাংশ্চ নমস্যসি
5.91
কচ্চিদেষা চ তে বুদ্ধির্বৃত্তিরেষা চ তেঽনঘ
আয়ুষ্যা চ যশস্যা চ ধর্মকামার্থদর্শিনী
5.92
এতয়া বর্তমানস্য বুদ্ধ্যা রাষ্ট্রং ন সীদতি
বিজিত্য চ মহীং রাজা সোঽত্যন্তং সুখমেধতে
5.93
কচ্চিদার্যো বিশুদ্ধাত্মা ক্ষারিতশ্চৌরকর্মণি
অদৃষ্টশাস্ত্রকুশলৈর্ন লোভাদ্বধ্যতে শুচিঃ
5.94
পৃষ্টো গৃহীতস্তত্কারী তজ্জ্ঞৈর্দৃষ্টঃ সকারণঃ
কচ্চিন্ন মুচ্যতে স্তেনো দ্রব্যলোভান্নরর্ষভ
5.95
ব্যুত্পন্নে কচ্চিদাঢ্যস্য দরিদ্রস্য চ ভারত
অর্থান্ন মিথ্যা পশ্যন্তি তবামাত্যা হৃতা ধনৈঃ
5.96
নাস্তিক্যমনৃতং ক্রোধং প্রমাদং দীর্ঘসূত্রতাম্
অদর্শনং জ্ঞানবতামালস্যং ক্ষিপ্তচিত্ততাম্
5.97
একচিন্তনমর্থানামনর্থজ্ঞৈশ্চ চিন্তনম্
নিশ্চিতানামনারম্ভং মন্ত্রস্যাপরিরক্ষণম্
5.98
মঙ্গল্যস্যাপ্রয়োগং চ প্রসঙ্গং বিষয়েষু চ
কচ্চিত্ত্বং বর্জয়স্যেতান্রাজদোষাংশ্চতুর্দশ
5.99
কচ্চিত্তে সফলা বেদাঃ কচ্চিত্তে সফলং ধনম্
কচ্চিত্তে সফলা দারাঃ কচ্চিত্তে সফলং শ্রুতম্
5.100
যুধিষ্ঠির উবাচ
কথং বৈ সফলা বেদাঃ কথং বৈ সফলং ধনম্
কথং বৈ সফলা দারাঃ কথং বৈ সফলং শ্রুতম্
5.101
নারদ উবাচ
অগ্নিহোত্রফলা বেদা দত্তভুক্তফলং ধনম্
রতিপুত্রফলা দারাঃ শীলবৃত্তফলং শ্রুতম্
5.102
বৈশংপায়ন উবাচ
এতদাখ্যায় স মুনির্নারদঃ সুমহাতপাঃ
পপ্রচ্ছানন্তরমিদং ধর্মাত্মানং যুধিষ্ঠিরম্
5.103
নারদ উবাচ
কচ্চিদভ্যাগতা দূরাদ্বণিজো লাভকারণাৎ
যথোক্তমবহার্যন্তে শুল্কং শুল্কোপজীবিভিঃ
5.104
কচ্চিত্তে পুরুষা রাজন্পুরে রাষ্ট্রে চ মানিতাঃ
উপানয়ন্তি পণ্যানি উপধাভিরবঞ্চিতাঃ
5.105
কচ্চিচ্ছৃণোষি বৃদ্ধানাং ধর্মার্থসহিতা গিরঃ
নিত্যমর্থবিদাং তাত তথা ধর্মানুদর্শিনাম্
5.106
কচ্চিত্তে কৃষিতন্ত্রেষু গোষু পুষ্পফলেষু চ
ধর্মার্থং চ দ্বিজাতিভ্যো দীয়তে মধুসর্পিষী
5.107
দ্রব্যোপকরণং কচ্চিত্সর্বদা সর্বশিল্পিনাম্
চাতুর্মাস্যাবরং সম্যঙ্নিয়তং সংপ্রয়চ্ছসি
5.108
কচ্চিত্কৃতং বিজানীষে কর্তারং চ প্রশংসসি
সতাং মধ্যে মহারাজ সত্করোষি চ পূজয়ন্
5.109
কচ্চিত্সূত্রাণি সর্বাণি গৃহ্ণাসি ভরতর্ষভ
হস্তিসূত্রাশ্বসূত্রাণি রথসূত্রাণি চাভিভো
5.110
কচ্চিদভ্যস্যতে শশ্বদ্গৃহে তে ভরতর্ষভ
ধনুর্বেদস্য সূত্রং চ যন্ত্রসূত্রং চ নাগরম্
5.111
কচ্চিদস্ত্রাণি সর্বাণি ব্রহ্মদণ্ডশ্চ তেঽনঘ
বিষয়োগাশ্চ তে সর্বে বিদিতাঃ শত্রুনাশনাঃ
5.112
কচ্চিদগ্নিভয়াচ্চৈব সর্পব্যালভয়াত্তথা
রোগরক্ষোভয়াচ্চৈব রাষ্ট্রং স্বং পরিরক্ষসি
5.113
কচ্চিদন্ধাংশ্চ মূকাংশ্চ পঙ্গূন্ব্যঙ্গানবান্ধবান্
পিতেব পাসি ধর্মজ্ঞ তথা প্রব্রজিতানপি
5.114
বৈশংপায়ন উবাচ
এতাঃ কুরূণামৃষভো মহাত্মা; শ্রুত্বা গিরো ব্রাহ্মণসত্তমস্য
প্রণম্য পাদাবভিবাদ্য হৃষ্টো; রাজাব্রবীন্নারদং দেবরূপম্
5.115
এবং করিষ্যামি যথা ত্বয়োক্তং; প্রজ্ঞা হি মে ভূয় এবাভিবৃদ্ধা
উক্ত্বা তথা চৈব চকার রাজা; লেভে মহীং সাগরমেখলাং চ
5.116
নারদ উবাচ
এবং যো বর্ততে রাজা চাতুর্বর্ণ্যস্য রক্ষণে
স বিহৃত্যেহ সুসুখী শক্রস্যৈতি সলোকতাম্