Utshovঅধ্যায় 4
4.1
বৈশংপায়ন উবাচ
ততঃ প্রবেশনং চক্রে তস্যাং রাজা যুধিষ্ঠিরঃ
অয়ুতং ভোজয়ামাস ব্রাহ্মণানাং নরাধিপঃ
4.2
ঘৃতপায়সেন মধুনা ভক্ষ্যৈর্মূলফলৈস্তথা
অহতৈশ্চৈব বাসোভির্মাল্যৈরুচ্চাবচৈরপি
4.3
দদৌ তেভ্যঃ সহস্রাণি গবাং প্রত্যেকশঃ প্রভুঃ
পুণ্যাহঘোষস্তত্রাসীদ্দিবস্পৃগিব ভারত
4.4
বাদিত্রৈর্বিবিধৈর্গীতৈর্গন্ধৈরুচ্চাবচৈরপি
পূজয়িত্বা কুরুশ্রেষ্ঠো দৈবতানি নিবেশ্য চ
4.5
তত্র মল্লা নটা ঝল্লাঃ সূতা বৈতালিকাস্তথা
উপতস্থুর্মহাত্মানং সপ্তরাত্রং যুধিষ্ঠিরম্
4.6
তথা স কৃত্বা পূজাং তাং ভ্রাতৃভিঃ সহ পাণ্ডবঃ
তস্যাং সভায়াং রম্যায়াং রেমে শক্রো যথা দিবি
4.7
সভায়ামৃষয়স্তস্যাং পাণ্ডবৈঃ সহ আসতে
আসাং চক্রুর্নরেন্দ্রাশ্চ নানাদেশসমাগতাঃ
4.8
অসিতো দেবলঃ সত্যঃ সর্পমালী মহাশিরাঃ
অর্বাবসুঃ সুমিত্রশ্চ মৈত্রেয়ঃ শুনকো বলিঃ
4.9
বকো দাল্ভ্যঃ স্থূলশিরাঃ কৃষ্ণদ্বৈপায়নঃ শুকঃ
সুমন্তুর্জৈমিনিঃ পৈলো ব্যাসশিষ্যাস্তথা বয়ম্
4.10
তিত্তিরির্যাজ্ঞবল্ক্যশ্চ সসুতো লোমহর্ষণঃ
অপ্সুহোম্যশ্চ ধৌম্যশ্চ আণীমাণ্ডব্যকৌশিকৌ
4.11
দামোষ্ণীষস্ত্রৈবণিশ্চ পর্ণাদো ঘটজানুকঃ
মৌঞ্জায়নো বায়ুভক্ষঃ পারাশর্যশ্চ সারিকৌ
4.12
বলবাকঃ শিনীবাকঃ সুত্যপালঃ কৃতশ্রমঃ
জাতূকর্ণঃ শিখাবাংশ্চ সুবলঃ পারিজাতকঃ
4.13
পর্বতশ্চ মহাভাগো মার্কণ্ডেয়স্তথা মুনিঃ
পবিত্রপাণিঃ সাবর্ণির্ভালুকির্গালবস্তথা
4.14
জঙ্ঘাবন্ধুশ্চ রৈভ্যশ্চ কোপবেগশ্রবা ভৃগুঃ
হরিবভ্রুশ্চ কৌণ্ডিন্যো বভ্রুমালী সনাতনঃ
4.15
কক্ষীবানৌশিজশ্চৈব নাচিকেতোঽথ গৌতমঃ
পৈঙ্গো বরাহঃ শুনকঃ শাণ্ডিল্যশ্চ মহাতপাঃ
কর্করো বেণুজঙ্ঘশ্চ কলাপঃ কঠ এব চ
4.16
মুনয়ো ধর্মসহিতা ধৃতাত্মানো জিতেন্দ্রিয়াঃ
এতে চান্যে চ বহবো বেদবেদাঙ্গপারগাঃ
4.17
উপাসতে মহাত্মানং সভায়ামৃষিসত্তমাঃ
কথয়ন্তঃ কথাঃ পুণ্যা ধর্মজ্ঞাঃ শুচয়োঽমলাঃ
4.18
তথৈব ক্ষত্রিয়শ্রেষ্ঠা ধর্মরাজমুপাসতে
শ্রীমান্মহাত্মা ধর্মাত্মা মুঞ্জকেতুর্বিবর্ধনঃ
4.19
সংগ্রামজিদ্দুর্মুখশ্চ উগ্রসেনশ্চ বীর্যবান্
কক্ষসেনঃ ক্ষিতিপতিঃ ক্ষেমকশ্চাপরাজিতঃ
কাম্বোজরাজঃ কমলঃ কম্পনশ্চ মহাবলঃ
4.20
সততং কম্পয়ামাস যবনানেক এব যঃ
যথাসুরান্কালকেয়ান্দেবো বজ্রধরস্তথা
4.21
জটাসুরো মদ্রকান্তশ্চ রাজা; কুন্তিঃ কুণিন্দশ্চ কিরাতরাজঃ
তথাঙ্গবঙ্গৌ সহ পুণ্ড্রকেণ; পাণ্ড্যোড্ররাজৌ সহ চান্ধ্রকেণ
4.22
কিরাতরাজঃ সুমনা যবনাধিপতিস্তথা
চাণূরো দেবরাতশ্চ ভোজো ভীমরথশ্চ যঃ
4.23
শ্রুতায়ুধশ্চ কালিঙ্গো জয়ত্সেনশ্চ মাগধঃ
সুশর্মা চেকিতানশ্চ সুরথোঽমিত্রকর্ষণঃ
4.24
কেতুমান্বসুদানশ্চ বৈদেহোঽথ কৃতক্ষণঃ
সুধর্মা চানিরুদ্ধশ্চ শ্রুতায়ুশ্চ মহাবলঃ
4.25
অনূপরাজো দুর্ধর্ষঃ ক্ষেমজিচ্চ সুদক্ষিণঃ
শিশুপালঃ সহসুতঃ করূষাধিপতিস্তথা
4.26
বৃষ্ণীনাং চৈব দুর্ধর্ষাঃ কুমারা দেবরূপিণঃ
আহুকো বিপৃথুশ্চৈব গদঃ সারণ এব চ
4.27
অক্রূরঃ কৃতবর্মা চ সাত্যকিশ্চ শিনেঃ সুতঃ
ভীষ্মকোঽথাহৃতিশ্চৈব দ্যুমত্সেনশ্চ বীর্যবান্
কেকয়াশ্চ মহেষ্বাসা যজ্ঞসেনশ্চ সৌমকিঃ
4.28
অর্জুনং চাপি সংশ্রিত্য রাজপুত্রা মহাবলাঃ
অশিক্ষন্ত ধনুর্বেদং রৌরবাজিনবাসসঃ
4.29
তত্রৈব শিক্ষিতা রাজন্কুমারা বৃষ্ণিনন্দনাঃ
রৌক্মিণেয়শ্চ সাম্বশ্চ যুয়ুধানশ্চ সাত্যকিঃ
4.30
এতে চান্যে চ বহবো রাজানঃ পৃথিবীপতে
ধনংজয়সখা চাত্র নিত্যমাস্তে স্ম তুম্বুরুঃ
4.31
চিত্রসেনঃ সহামাত্যো গন্ধর্বাপ্সরসস্তথা
গীতবাদিত্রকুশলাঃ শম্যাতালবিশারদাঃ
4.32
প্রমাণেঽথ লয়স্থানে কিংনরাঃ কৃতনিশ্রমাঃ
সংচোদিতাস্তুম্বুরুণা গন্ধর্বাঃ সহিতা জগুঃ
4.33
গায়ন্তি দিব্যতানৈস্তে যথান্যায়ং মনস্বিনঃ
পাণ্ডুপুত্রানৃষীংশ্চৈব রময়ন্ত উপাসতে
4.34
তস্যাং সভায়ামাসীনাঃ সুব্রতাঃ সত্যসংগরাঃ
দিবীব দেবা ব্রহ্মাণং যুধিষ্ঠিরমুপাসতে