Utshovঅধ্যায় 3
3.1
বৈশংপায়ন উবাচ
অথাব্রবীন্ময়ঃ পার্থমর্জুনং জয়তাং বরম্
আপৃচ্ছে ত্বাং গমিষ্যামি ক্ষিপ্রমেষ্যামি চাপ্যহম্
3.2
উত্তরেণ তু কৈলাসং মৈনাকং পর্বতং প্রতি
যক্ষ্যমাণেষু সর্বেষু দানবেষু তদা ময়া
কৃতং মণিময়ং ভাণ্ডং রম্যং বিন্দুসরঃ প্রতি
3.3
সভায়াং সত্যসংধস্য যদাসীদ্বৃষপর্বণঃ
আগমিষ্যামি তদ্গৃহ্য যদি তিষ্ঠতি ভারত
3.4
ততঃ সভাং করিষ্যামি পাণ্ডবায় যশস্বিনে
মনঃপ্রহ্লাদিনীং চিত্রাং সর্বরত্নবিভূষিতাম্
3.5
অস্তি বিন্দুসরস্যেব গদা শ্রেষ্ঠা কুরূদ্বহ
নিহিতা যৌবনাশ্বেন রাজ্ঞা হত্বা রণে রিপূন্
সুবর্ণবিন্দুভিশ্চিত্রা গুর্বী ভারসহা দৃঢা
3.6
সা বৈ শতসহস্রস্য সংমিতা সর্বঘাতিনী
অনুরূপা চ ভীমস্য গাণ্ডীবং ভবতো যথা
3.7
বারুণশ্চ মহাশঙ্খো দেবদত্তঃ সুঘোষবান্
সর্বমেতত্প্রদাস্যামি ভবতে নাত্র সংশয়ঃ
ইত্যুক্ত্বা সোঽসুরঃ পার্থং প্রাগুদীচীমগাদ্দিশম্
3.8
উত্তরেণ তু কৈলাসং মৈনাকং পর্বতং প্রতি
হিরণ্যশৃঙ্গো ভগবান্মহামণিময়ো গিরিঃ
3.9
রম্যং বিন্দুসরো নাম যত্র রাজা ভগীরথঃ
দৃষ্ট্বা ভাগীরথীং গঙ্গামুবাস বহুলাঃ সমাঃ
3.10
যত্রেষ্ট্বা সর্বভূতানামীশ্বরেণ মহাত্মনা
আহৃতাঃ ক্রতবো মুখ্যাঃ শতং ভরতসত্তম
3.11
যত্র যূপা মণিময়াশ্চিত্যাশ্চাপি হিরণ্ময়াঃ
শোভার্থং বিহিতাস্তত্র ন তু দৃষ্টান্ততঃ কৃতাঃ
3.12
যত্রেষ্ট্বা স গতঃ সিদ্ধিং সহস্রাক্ষঃ শচীপতিঃ
যত্র ভূতপতিঃ সৃষ্ট্বা সর্বলোকান্সনাতনঃ
উপাস্যতে তিগ্মতেজা বৃতো ভূতৈঃ সহস্রশঃ
3.13
নরনারায়ণৌ ব্রহ্মা যমঃ স্থাণুশ্চ পঞ্চমঃ
উপাসতে যত্র সত্রং সহস্রয়ুগপর্যয়ে
3.14
যত্রেষ্টং বাসুদেবেন সত্রৈর্বর্ষসহস্রকৈঃ
শ্রদ্দধানেন সততং শিষ্টসংপ্রতিপত্তয়ে
3.15
সুবর্ণমালিনো যূপাশ্চিত্যাশ্চাপ্যতিভাস্বরাঃ
দদৌ যত্র সহস্রাণি প্রয়ুতানি চ কেশবঃ
3.16
তত্র গত্বা স জগ্রাহ গদাং শঙ্খং চ ভারত
স্ফাটিকং চ সভাদ্রব্যং যদাসীদ্বৃষপর্বণঃ
কিংকরৈঃ সহ রক্ষোভিরগৃহ্ণাত্সর্বমেব তৎ
3.17
তদাহৃত্য তু তাং চক্রে সোঽসুরোঽপ্রতিমাং সভাম্
বিশ্রুতাং ত্রিষু লোকেষু দিব্যাং মণিময়ীং শুভাম্
3.18
গদাং চ ভীমসেনায় প্রবরাং প্রদদৌ তদা
দেবদত্তং চ পার্থায় দদৌ শঙ্খমনুত্তমম্
3.19
সভা তু সা মহারাজ শাতকুম্ভময়দ্রুমা
দশ কিষ্কুসহস্রাণি সমন্তাদায়তাভবৎ
3.20
যথা বহ্নের্যথার্কস্য সোমস্য চ যথৈব সা
ভ্রাজমানা তথা দিব্যা বভার পরমং বপুঃ
3.21
প্রতিঘ্নতীব প্রভয়া প্রভামর্কস্য ভাস্বরাম্
প্রবভৌ জ্বলমানেব দিব্যা দিব্যেন বর্চসা
3.22
নগমেঘপ্রতীকাশা দিবমাবৃত্য বিষ্ঠিতা
আয়তা বিপুলা শ্লক্ষ্ণা বিপাপ্মা বিগতক্লমা
3.23
উত্তমদ্রব্যসংপন্না মণিপ্রাকারমালিনী
বহুরত্না বহুধনা সুকৃতা বিশ্বকর্মণা
3.24
ন দাশার্হী সুধর্মা বা ব্রহ্মণো বাপি তাদৃশী
আসীদ্রূপেণ সংপন্না যাং চক্রেঽপ্রতিমাং ময়ঃ
3.25
তাং স্ম তত্র ময়েনোক্তা রক্ষন্তি চ বহন্তি চ
সভামষ্টৌ সহস্রাণি কিংকরা নাম রাক্ষসাঃ
3.26
অন্তরিক্ষচরা ঘোরা মহাকায়া মহাবলাঃ
রক্তাক্ষাঃ পিঙ্গলাক্ষাশ্চ শুক্তিকর্ণাঃ প্রহারিণঃ
3.27
তস্যাং সভায়াং নলিনীং চকারাপ্রতিমাং ময়ঃ
বৈডূর্যপত্রবিততাং মণিনালময়াম্বুজাম্
3.28
পদ্মসৌগন্ধিকবতীং নানাদ্বিজগণায়ুতাম্
পুষ্পিতৈঃ পঙ্কজৈশ্চিত্রাং কূর্মমত্স্যৈশ্চ শোভিতাম্
3.29
সূপতীর্থামকলুষাং সর্বর্তুসলিলাং শুভাম্
মারুতেনৈব চোদ্ধূতৈর্মুক্তাবিন্দুভিরাচিতাম্
3.30
মণিরত্নচিতাং তাং তু কেচিদভ্যেত্য পার্থিবাঃ
দৃষ্ট্বাপি নাভ্যজানন্ত তেঽজ্ঞানাত্প্রপতন্ত্যুত
3.31
তাং সভামভিতো নিত্যং পুষ্পবন্তো মহাদ্রুমাঃ
আসন্নানাবিধা নীলাঃ শীতচ্ছায়া মনোরমাঃ
3.32
কাননানি সুগন্ধীনি পুষ্করিণ্যশ্চ সর্বশঃ
হংসকারণ্ডবয়ুতাশ্চক্রবাকোপশোভিতাঃ
3.33
জলজানাং চ মাল্যানাং স্থলজানাং চ সর্বশঃ
মারুতো গন্ধমাদায় পাণ্ডবান্স্ম নিষেবতে
3.34
ঈদৃশীং তাং সভাং কৃত্বা মাসৈঃ পরিচতুর্দশৈঃ
নিষ্ঠিতাং ধর্মরাজায় ময়ো রাজ্ঞে ন্যবেদয়ৎ