UtshovChapter 3
3.1
वैशंपायन उवाच
अथाब्रवीन्मयः पार्थमर्जुनं जयतां वरम्
आपृच्छे त्वां गमिष्यामि क्षिप्रमेष्यामि चाप्यहम्
Vaishampayana uvacha
Athabravinmayah parthamarjunam jayatam varam
Aprichchhe tvam gamishyami kshiprameshyami chapyaham
3.2
उत्तरेण तु कैलासं मैनाकं पर्वतं प्रति
यक्ष्यमाणेषु सर्वेषु दानवेषु तदा मया
कृतं मणिमयं भाण्डं रम्यं बिन्दुसरः प्रति
Uttarena tu kailasam mainakam parvatam prati
Yakshyamaneshu sarveshu danaveshu tada maya
Kritam manimayam bhandam ramyam bindusarah prati
3.3
सभायां सत्यसंधस्य यदासीद्वृषपर्वणः
आगमिष्यामि तद्गृह्य यदि तिष्ठति भारत
Sabhayam satyasandhasya yadasidvrishaparvanah
Agamishyami tadgrihya yadi tishthati bharata
3.4
ततः सभां करिष्यामि पाण्डवाय यशस्विने
मनःप्रह्लादिनीं चित्रां सर्वरत्नविभूषिताम्
Tatah sabham karishyami pandavaya yashasvine
Manahprahladinim chitram sarvaratnavibhushitam
3.5
अस्ति बिन्दुसरस्येव गदा श्रेष्ठा कुरूद्वह
निहिता यौवनाश्वेन राज्ञा हत्वा रणे रिपून्
सुवर्णबिन्दुभिश्चित्रा गुर्वी भारसहा दृढा
Asti bindusarasyeva gada shreshtha kurudvaha
Nihita yauvanashvena ragya hatva rane ripun
Suvarnabindubhishchitra gurvi bharasaha dridha
3.6
सा वै शतसहस्रस्य संमिता सर्वघातिनी
अनुरूपा च भीमस्य गाण्डीवं भवतो यथा
Sa vai shatasahasrasya sammita sarvaghatini
Anurupa cha bhimasya gandivam bhavato yatha
3.7
वारुणश्च महाशङ्खो देवदत्तः सुघोषवान्
सर्वमेतत्प्रदास्यामि भवते नात्र संशयः
इत्युक्त्वा सोऽसुरः पार्थं प्रागुदीचीमगाद्दिशम्
Varunashcha mahashankho devadattah sughoshavan
Sarvametatpradasyami bhavate natra sanshayah
Ityuktva sosurah partham pragudichimagaddisham
3.8
उत्तरेण तु कैलासं मैनाकं पर्वतं प्रति
हिरण्यशृङ्गो भगवान्महामणिमयो गिरिः
Uttarena tu kailasam mainakam parvatam prati
Hiranyashringo bhagavanmahamanimayo girih
3.9
रम्यं बिन्दुसरो नाम यत्र राजा भगीरथः
दृष्ट्वा भागीरथीं गङ्गामुवास बहुलाः समाः
Ramyam bindusaro nama yatra raja bhagirathah
Drishtva bhagirathim gangamuvasa bahulah samah
3.10
यत्रेष्ट्वा सर्वभूतानामीश्वरेण महात्मना
आहृताः क्रतवो मुख्याः शतं भरतसत्तम
Yatreshtva sarvabhutanamishvarena mahatmana
Ahritah kratavo mukhyah shatam bharatasattama
3.11
यत्र यूपा मणिमयाश्चित्याश्चापि हिरण्मयाः
शोभार्थं विहितास्तत्र न तु दृष्टान्ततः कृताः
Yatra yupa manimayashchityashchapi hiranmayah
Shobhartham vihitastatra na tu drishtantatah kritah
3.12
यत्रेष्ट्वा स गतः सिद्धिं सहस्राक्षः शचीपतिः
यत्र भूतपतिः सृष्ट्वा सर्वलोकान्सनातनः
उपास्यते तिग्मतेजा वृतो भूतैः सहस्रशः
Yatreshtva sa gatah siddhim sahasrakshah shachipatih
Yatra bhutapatih srishtva sarvalokansanatanah
Upasyate tigmateja vrito bhutaih sahasrashah
3.13
नरनारायणौ ब्रह्मा यमः स्थाणुश्च पञ्चमः
उपासते यत्र सत्रं सहस्रयुगपर्यये
Naranarayanau brahma yamah sthanushcha panchamah
Upasate yatra satram sahasrayugaparyaye
3.14
यत्रेष्टं वासुदेवेन सत्रैर्वर्षसहस्रकैः
श्रद्दधानेन सततं शिष्टसंप्रतिपत्तये
Yatreshtam vasudevena satrairvarshasahasrakaih
Shraddadhanena satatam shishtasampratipattaye
3.15
सुवर्णमालिनो यूपाश्चित्याश्चाप्यतिभास्वराः
ददौ यत्र सहस्राणि प्रयुतानि च केशवः
Suvarnamalino yupashchityashchapyatibhasvarah
Dadau yatra sahasrani prayutani cha keshavah
3.16
तत्र गत्वा स जग्राह गदां शङ्खं च भारत
स्फाटिकं च सभाद्रव्यं यदासीद्वृषपर्वणः
किंकरैः सह रक्षोभिरगृह्णात्सर्वमेव तत्
Tatra gatva sa jagraha gadam shankham cha bharata
Sphatikam cha sabhadravyam yadasidvrishaparvanah
Kinkaraih saha rakshobhiragrihnatsarvameva tat
3.17
तदाहृत्य तु तां चक्रे सोऽसुरोऽप्रतिमां सभाम्
विश्रुतां त्रिषु लोकेषु दिव्यां मणिमयीं शुभाम्
Tadahritya tu tam chakre sosuropratimam sabham
Vishrutam trishu lokeshu divyam manimayim shubham
3.18
गदां च भीमसेनाय प्रवरां प्रददौ तदा
देवदत्तं च पार्थाय ददौ शङ्खमनुत्तमम्
Gadam cha bhimasenaya pravaram pradadau tada
Devadattam cha parthaya dadau shankhamanuttamam
3.19
सभा तु सा महाराज शातकुम्भमयद्रुमा
दश किष्कुसहस्राणि समन्तादायताभवत्
Sabha tu sa maharaja shatakumbhamayadruma
Dasha kishkusahasrani samantadayatabhavat
3.20
यथा वह्नेर्यथार्कस्य सोमस्य च यथैव सा
भ्राजमाना तथा दिव्या बभार परमं वपुः
Yatha vahneryatharkasya somasya cha yathaiva sa
Bhrajamana tatha divya babhara paramam vapuh
3.21
प्रतिघ्नतीव प्रभया प्रभामर्कस्य भास्वराम्
प्रबभौ ज्वलमानेव दिव्या दिव्येन वर्चसा
Pratighnativa prabhaya prabhamarkasya bhasvaram
Prababhau jvalamaneva divya divyena varchasa
3.22
नगमेघप्रतीकाशा दिवमावृत्य विष्ठिता
आयता विपुला श्लक्ष्णा विपाप्मा विगतक्लमा
Nagameghapratikasha divamavritya vishthita
Ayata vipula shlakshna vipapma vigataklama
3.23
उत्तमद्रव्यसंपन्ना मणिप्राकारमालिनी
बहुरत्ना बहुधना सुकृता विश्वकर्मणा
Uttamadravyasampanna maniprakaramalini
Bahuratna bahudhana sukrita vishvakarmana
3.24
न दाशार्ही सुधर्मा वा ब्रह्मणो वापि तादृशी
आसीद्रूपेण संपन्ना यां चक्रेऽप्रतिमां मयः
Na dasharhi sudharma va brahmano vapi tadrishi
Asidrupena sampanna yam chakrepratimam mayah
3.25
तां स्म तत्र मयेनोक्ता रक्षन्ति च वहन्ति च
सभामष्टौ सहस्राणि किंकरा नाम राक्षसाः
Tam sma tatra mayenokta rakshanti cha vahanti cha
Sabhamashtau sahasrani kinkara nama rakshasah
3.26
अन्तरिक्षचरा घोरा महाकाया महाबलाः
रक्ताक्षाः पिङ्गलाक्षाश्च शुक्तिकर्णाः प्रहारिणः
Antarikshachara ghora mahakaya mahabalah
Raktakshah pingalakshashcha shuktikarnah praharinah
3.27
तस्यां सभायां नलिनीं चकाराप्रतिमां मयः
वैडूर्यपत्रविततां मणिनालमयाम्बुजाम्
Tasyam sabhayam nalinim chakarapratimam mayah
Vaiduryapatravitatam maninalamayambujam
3.28
पद्मसौगन्धिकवतीं नानाद्विजगणायुताम्
पुष्पितैः पङ्कजैश्चित्रां कूर्ममत्स्यैश्च शोभिताम्
Padmasaugandhikavatim nanadvijaganayutam
Pushpitaih pankajaishchitram kurmamatsyaishcha shobhitam
3.29
सूपतीर्थामकलुषां सर्वर्तुसलिलां शुभाम्
मारुतेनैव चोद्धूतैर्मुक्ताबिन्दुभिराचिताम्
Supatirthamakalusham sarvartusalilam shubham
Marutenaiva choddhutairmuktabindubhirachitam
3.30
मणिरत्नचितां तां तु केचिदभ्येत्य पार्थिवाः
दृष्ट्वापि नाभ्यजानन्त तेऽज्ञानात्प्रपतन्त्युत
Maniratnachitam tam tu kechidabhyetya parthivah
Drishtvapi nabhyajananta tegyanatprapatantyuta
3.31
तां सभामभितो नित्यं पुष्पवन्तो महाद्रुमाः
आसन्नानाविधा नीलाः शीतच्छाया मनोरमाः
Tam sabhamabhito nityam pushpavanto mahadrumah
Asannanavidha nilah shitachchhaya manoramah
3.32
काननानि सुगन्धीनि पुष्करिण्यश्च सर्वशः
हंसकारण्डवयुताश्चक्रवाकोपशोभिताः
Kananani sugandhini pushkarinyashcha sarvashah
Hansakarandavayutashchakravakopashobhitah
3.33
जलजानां च माल्यानां स्थलजानां च सर्वशः
मारुतो गन्धमादाय पाण्डवान्स्म निषेवते
Jalajanam cha malyanam sthalajanam cha sarvashah
Maruto gandhamadaya pandavansma nishevate
3.34
ईदृशीं तां सभां कृत्वा मासैः परिचतुर्दशैः
निष्ठितां धर्मराजाय मयो राज्ञे न्यवेदयत्
Idrishim tam sabham kritva masaih parichaturdashaih
Nishthitam dharmarajaya mayo ragye nyavedayat