অধ্যায় 10

10.1

নারদ উবাচ
সভা বৈশ্রবণী রাজঞ্শতয়োজনমায়তা
বিস্তীর্ণা সপ্ততিশ্চৈব যোজনানি সিতপ্রভা

তপসা নির্মিতা রাজন্স্বয়ং বৈশ্রবণেন সা
শশিপ্রভা খেচরীণাং কৈলাসশিখরোপমা

গুহ্যকৈরুহ্যমানা সা খে বিষক্তেব দৃশ্যতে
দিব্যা হেমময়ৈরুচ্চৈঃ পাদপৈরুপশোভিতা

রশ্মিবতী ভাস্বরা চ দিব্যগন্ধা মনোরমা
সিতাভ্রশিখরাকারা প্লবমানেব দৃশ্যতে

তস্যাং বৈশ্রবণো রাজা বিচিত্রাভরণাম্বরঃ
স্ত্রীসহস্রাবৃতঃ শ্রীমানাস্তে জ্বলিতকুণ্ডলঃ

দিবাকরনিভে পুণ্যে দিব্যাস্তরণসংবৃতে
দিব্যপাদোপধানে চ নিষণ্ণঃ পরমাসনে

মন্দারাণামুদারাণাং বনানি সুরভীণি চ
সৌগন্ধিকানাং চাদায় গন্ধান্গন্ধবহঃ শুচিঃ

নলিন্যাশ্চালকাখ্যায়াশ্চন্দনানাং বনস্য চ
মনোহৃদয়সংহ্লাদী বায়ুস্তমুপসেবতে

তত্র দেবাঃ সগন্ধর্বা গণৈরপ্সরসাং বৃতাঃ
দিব্যতানেন গীতানি গান্তি দিব্যানি ভারত

মিশ্রকেশী চ রম্ভা চ চিত্রসেনা শুচিস্মিতা
চারুনেত্রা ঘৃতাচী চ মেনকা পুঞ্জিকস্থলা

বিশ্বাচী সহজন্যা চ প্রম্লোচা উর্বশী ইরা
বর্গা চ সৌরভেয়ী চ সমীচী বুদ্বুদা লতা

এতাঃ সহস্রশশ্চান্যা নৃত্তগীতবিশারদাঃ
উপতিষ্ঠন্তি ধনদং পাণ্ডবাপ্সরসাং গণাঃ

অনিশং দিব্যবাদিত্রৈর্নৃত্তৈর্গীতৈশ্চ সা সভা
অশূন্যা রুচিরা ভাতি গন্ধর্বাপ্সরসাং গণৈঃ

কিংনরা নাম গন্ধর্বা নরা নাম তথাপরে
মণিভদ্রোঽথ ধনদঃ শ্বেতভদ্রশ্চ গুহ্যকঃ

কশেরকো গণ্ডকণ্ডুঃ প্রদ্যোতশ্চ মহাবলঃ
কুস্তুম্বুরুঃ পিশাচশ্চ গজকর্ণো বিশালকঃ

বরাহকর্ণঃ সান্দ্রোষ্ঠঃ ফলভক্ষঃ ফলোদকঃ
অঙ্গচূডঃ শিখাবর্তো হেমনেত্রো বিভীষণঃ

পুষ্পাননঃ পিঙ্গলকঃ শোণিতোদঃ প্রবালকঃ
বৃক্ষবাস্যনিকেতশ্চ চীরবাসাশ্চ ভারত

এতে চান্যে চ বহবো যক্ষাঃ শতসহস্রশঃ
সদা ভগবতী চ শ্রীস্তথৈব নলকূবরঃ

অহং চ বহুশস্তস্যাং ভবন্ত্যন্যে চ মদ্বিধাঃ
আচার্যাশ্চাভবংস্তত্র তথা দেবর্ষয়োঽপরে

ভগবান্ভূতসংঘৈশ্চ বৃতঃ শতসহস্রশঃ
উমাপতিঃ পশুপতিঃ শূলধৃগ্ভগনেত্রহা

ত্র্যম্বকো রাজশার্দূল দেবী চ বিগতক্লমা
বামনৈর্বিকটৈঃ কুব্জৈঃ ক্ষতজাক্ষৈর্মনোজবৈঃ

মাংসমেদোবসাহারৈরুগ্রশ্রবণদর্শনৈঃ
নানাপ্রহরণৈর্ঘোরৈর্বাতৈরিব মহাজবৈঃ
বৃতঃ সখায়মন্বাস্তে সদৈব ধনদং নৃপ

সা সভা তাদৃশী রাজন্ময়া দৃষ্টান্তরিক্ষগা
পিতামহসভাং রাজন্কথয়িষ্যে গতক্লমাম্