Utshovঅধ্যায় 11
11.1
নারদ উবাচ
পুরা দেবয়ুগে রাজন্নাদিত্যো ভগবান্দিবঃ
আগচ্ছন্মানুষং লোকং দিদৃক্ষুর্বিগতক্লমঃ
11.2
চরন্মানুষরূপেণ সভাং দৃষ্ট্বা স্বয়ংভুবঃ
সভামকথয়ন্মহ্যং ব্রাহ্মীং তত্ত্বেন পাণ্ডব
11.3
অপ্রমেয়প্রভাং দিব্যাং মানসীং ভরতর্ষভ
অনির্দেশ্যাং প্রভাবেন সর্বভূতমনোরমাম্
11.4
শ্রুত্বা গুণানহং তস্যাঃ সভায়াঃ পাণ্ডুনন্দন
দর্শনেপ্সুস্তথা রাজন্নাদিত্যমহমব্রুবম্
11.5
ভগবন্দ্রষ্টুমিচ্ছামি পিতামহসভামহম্
যেন সা তপসা শক্যা কর্মণা বাপি গোপতে
11.6
ঔষধৈর্বা তথা যুক্তৈরুত বা মায়য়া যয়া
তন্মমাচক্ষ্ব ভগবন্পশ্যেয়ং তাং সভাং কথম্
11.7
ততঃ স ভগবান্সূর্যো মামুপাদায় বীর্যবান্
অগচ্ছত্তাং সভাং ব্রাহ্মীং বিপাপাং বিগতক্লমাম্
11.8
এবংরূপেতি সা শক্যা ন নির্দেষ্টুং জনাধিপ
ক্ষণেন হি বিভর্ত্যন্যদনির্দেশ্যং বপুস্তথা
11.9
ন বেদ পরিমাণং বা সংস্থানং বাপি ভারত
ন চ রূপং ময়া তাদৃগ্দৃষ্টপূর্বং কদাচন
11.10
সুসুখা সা সভা রাজন্ন শীতা ন চ ঘর্মদা
ন ক্ষুত্পিপাসে ন গ্লানিং প্রাপ্য তাং প্রাপ্নুবন্ত্যুত
11.11
নানারূপৈরিব কৃতা সুবিচিত্রৈঃ সুভাস্বরৈঃ
স্তম্ভৈর্ন চ ধৃতা সা তু শাশ্বতী ন চ সা ক্ষরা
11.12
অতি চন্দ্রং চ সূর্যং চ শিখিনং চ স্বয়ংপ্রভা
দীপ্যতে নাকপৃষ্ঠস্থা ভাসয়ন্তীব ভাস্করম্
11.13
তস্যাং স ভগবানাস্তে বিদধদ্দেবমায়য়া
স্বয়মেকোঽনিশং রাজঁল্লোকাঁল্লোকপিতামহঃ
11.14
উপতিষ্ঠন্তি চাপ্যেনং প্রজানাং পতয়ঃ প্রভুম্
দক্ষঃ প্রচেতাঃ পুলহো মরীচিঃ কশ্যপস্তথা
11.15
ভৃগুরত্রির্বসিষ্ঠশ্চ গৌতমশ্চ তথাঙ্গিরাঃ
মনোঽন্তরিক্ষং বিদ্যাশ্চ বায়ুস্তেজো জলং মহী
11.16
শব্দঃ স্পর্শস্তথা রূপং রসো গন্ধশ্চ ভারত
প্রকৃতিশ্চ বিকারশ্চ যচ্চান্যত্কারণং ভুবঃ
11.17
চন্দ্রমাঃ সহ নক্ষত্রৈরাদিত্যশ্চ গভস্তিমান্
বায়বঃ ক্রতবশ্চৈব সংকল্পঃ প্রাণ এব চ
11.18
এতে চান্যে চ বহবঃ স্বয়ংভুবমুপস্থিতাঃ
অর্থো ধর্মশ্চ কামশ্চ হর্ষো দ্বেষস্তপো দমঃ
11.19
আয়ান্তি তস্যাং সহিতা গন্ধর্বাপ্সরসস্তথা
বিংশতিঃ সপ্ত চৈবান্যে লোকপালাশ্চ সর্বশঃ
11.20
শুক্রো বৃহস্পতিশ্চৈব বুধোঽঙ্গারক এব চ
শনৈশ্চরশ্চ রাহুশ্চ গ্রহাঃ সর্বে তথৈব চ
11.21
মন্ত্রো রথংতরশ্চৈব হরিমান্বসুমানপি
আদিত্যাঃ সাধিরাজানো নানাদ্বংদ্বৈরুদাহৃতাঃ
11.22
মরুতো বিশ্বকর্মা চ বসবশ্চৈব ভারত
তথা পিতৃগণাঃ সর্বে সর্বাণি চ হবীংষ্যথ
11.23
ঋগ্বেদঃ সামবেদশ্চ যজুর্বেদশ্চ পাণ্ডব
অথর্ববেদশ্চ তথা পর্বাণি চ বিশাং পতে
11.24
ইতিহাসোপবেদাশ্চ বেদাঙ্গানি চ সর্বশঃ
গ্রহা যজ্ঞাশ্চ সোমশ্চ দৈবতানি চ সর্বশঃ
11.25
সাবিত্রী দুর্গতরণী বাণী সপ্তবিধা তথা
মেধা ধৃতিঃ শ্রুতিশ্চৈব প্রজ্ঞা বুদ্ধির্যশঃ ক্ষমা
11.26
সামানি স্তুতিশস্ত্রাণি গাথাশ্চ বিবিধাস্তথা
ভাষ্যাণি তর্কয়ুক্তানি দেহবন্তি বিশাং পতে
11.27
ক্ষণা লবা মুহূর্তাশ্চ দিবা রাত্রিস্তথৈব চ
অর্ধমাসাশ্চ মাসাশ্চ ঋতবঃ ষট্চ ভারত
11.28
সংবত্সরাঃ পঞ্চয়ুগমহোরাত্রাশ্চতুর্বিধাঃ
কালচক্রং চ যদ্দিব্যং নিত্যমক্ষয়মব্যয়ম্
11.29
অদিতির্দিতির্দনুশ্চৈব সুরসা বিনতা ইরা
কালকা সুরভির্দেবী সরমা চাথ গৌতমী
11.30
আদিত্যা বসবো রুদ্রা মরুতশ্চাশ্বিনাবপি
বিশ্বেদেবাশ্চ সাধ্যাশ্চ পিতরশ্চ মনোজবাঃ
11.31
রাক্ষসাশ্চ পিশাচাশ্চ দানবা গুহ্যকাস্তথা
সুপর্ণনাগপশবঃ পিতামহমুপাসতে
11.32
দেবো নারায়ণস্তস্যাং তথা দেবর্ষয়শ্চ যে
ঋষয়ো বালখিল্যাশ্চ যোনিজায়োনিজাস্তথা
11.33
যচ্চ কিংচিত্ত্রিলোকেঽস্মিন্দৃশ্যতে স্থাণুজঙ্গমম্
সর্বং তস্যাং ময়া দৃষ্টং তদ্বিদ্ধি মনুজাধিপ
11.34
অষ্টাশীতিসহস্রাণি যতীনামূর্ধ্বরেতসাম্
প্রজাবতাং চ পঞ্চাশদৃষীণামপি পাণ্ডব
11.35
তে স্ম তত্র যথাকামং দৃষ্ট্বা সর্বে দিবৌকসঃ
প্রণম্য শিরসা তস্মৈ প্রতিয়ান্তি যথাগতম্
11.36
অতিথীনাগতান্দেবান্দৈত্যান্নাগান্মুনীংস্তথা
যক্ষান্সুপর্ণান্কালেয়ান্গন্ধর্বাপ্সরসস্তথা
11.37
মহাভাগানমিতধীর্ব্রহ্মা লোকপিতামহঃ
দয়াবান্সর্বভূতেষু যথার্হং প্রতিপদ্যতে
11.38
প্রতিগৃহ্য চ বিশ্বাত্মা স্বয়ংভূরমিতপ্রভঃ
সান্ত্বমানার্থসংভোগৈর্যুনক্তি মনুজাধিপ
11.39
তথা তৈরুপয়াতৈশ্চ প্রতিয়াতৈশ্চ ভারত
আকুলা সা সভা তাত ভবতি স্ম সুখপ্রদা
11.40
সর্বতেজোময়ী দিব্যা ব্রহ্মর্ষিগণসেবিতা
ব্রাহ্ম্যা শ্রিয়া দীপ্যমানা শুশুভে বিগতক্লমা
11.41
সা সভা তাদৃশী দৃষ্টা সর্বলোকেষু দুর্লভা
সভেয়ং রাজশার্দূল মনুষ্যেষু যথা তব
11.42
এতা ময়া দৃষ্টপূর্বাঃ সভা দেবেষু পাণ্ডব
তবেয়ং মানুষে লোকে সর্বশ্রেষ্ঠতমা সভা
11.43
যুধিষ্ঠির উবাচ
প্রায়শো রাজলোকস্তে কথিতো বদতাং বর
বৈবস্বতসভায়াং তু যথা বদসি বৈ প্রভো
11.44
বরুণস্য সভায়াং তু নাগাস্তে কথিতা বিভো
দৈত্যেন্দ্রাশ্চৈব ভূয়িষ্ঠাঃ সরিতঃ সাগরাস্তথা
11.45
তথা ধনপতের্যক্ষা গুহ্যকা রাক্ষসাস্তথা
গন্ধর্বাপ্সরসশ্চৈব ভগবাংশ্চ বৃষধ্বজঃ
11.46
পিতামহসভায়াং তু কথিতাস্তে মহর্ষয়ঃ
সর্বদেবনিকায়াশ্চ সর্বশাস্ত্রাণি চৈব হি
11.47
শতক্রতুসভায়াং তু দেবাঃ সংকীর্তিতা মুনে
উদ্দেশতশ্চ গন্ধর্বা বিবিধাশ্চ মহর্ষয়ঃ
11.48
এক এব তু রাজর্ষির্হরিশ্চন্দ্রো মহামুনে
কথিতস্তে সভানিত্যো দেবেন্দ্রস্য মহাত্মনঃ
11.49
কিং কর্ম তেনাচরিতং তপো বা নিয়তব্রতম্
যেনাসৌ সহ শক্রেণ স্পর্ধতে স্ম মহায়শাঃ
11.50
পিতৃলোকগতশ্চাপি ত্বয়া বিপ্র পিতা মম
দৃষ্টঃ পাণ্ডুর্মহাভাগঃ কথং চাসি সমাগতঃ
11.51
কিমুক্তবাংশ্চ ভগবন্নেতদিচ্ছামি বেদিতুম্
ত্বত্তঃ শ্রোতুমহং সর্বং পরং কৌতূহলং হি মে
11.52
নারদ উবাচ
যন্মাং পৃচ্ছসি রাজেন্দ্র হরিশ্চন্দ্রং প্রতি প্রভো
তত্তেঽহং সংপ্রবক্ষ্যামি মাহাত্ম্যং তস্য ধীমতঃ
11.53
স রাজা বলবানাসীত্সম্রাট্সর্বমহীক্ষিতাম্
তস্য সর্বে মহীপালাঃ শাসনাবনতাঃ স্থিতাঃ
11.54
তেনৈকং রথমাস্থায় জৈত্রং হেমবিভূষিতম্
শস্ত্রপ্রতাপেন জিতা দ্বীপাঃ সপ্ত নরেশ্বর
11.55
স বিজিত্য মহীং সর্বাং সশৈলবনকাননাম্
আজহার মহারাজ রাজসূয়ং মহাক্রতুম্
11.56
তস্য সর্বে মহীপালা ধনান্যাজহ্রুরাজ্ঞয়া
দ্বিজানাং পরিবেষ্টারস্তস্মিন্যজ্ঞে চ তেঽভবন্
11.57
প্রাদাচ্চ দ্রবিণং প্রীত্যা যাজকানাং নরেশ্বরঃ
যথোক্তং তত্র তৈস্তস্মিংস্ততঃ পঞ্চগুণাধিকম্
11.58
অতর্পয়চ্চ বিবিধৈর্বসুভির্ব্রাহ্মণাংস্তথা
প্রাসর্পকালে সংপ্রাপ্তে নানাদিগ্ভ্যঃ সমাগতান্
11.59
ভক্ষ্যৈর্ভোজ্যৈশ্চ বিবিধৈর্যথাকামপুরস্কৃতৈঃ
রত্নৌঘতর্পিতৈস্তুষ্টৈর্দ্বিজৈশ্চ সমুদাহৃতম্
তেজস্বী চ যশস্বী চ নৃপেভ্যোঽভ্যধিকোঽভবৎ
11.60
এতস্মাত্কারণাত্পার্থ হরিশ্চন্দ্রো বিরাজতে
তেভ্যো রাজসহস্রেভ্যস্তদ্বিদ্ধি ভরতর্ষভ
11.61
সমাপ্য চ হরিশ্চন্দ্রো মহায়জ্ঞং প্রতাপবান্
অভিষিক্তঃ স শুশুভে সাম্রাজ্যেন নরাধিপ
11.62
যে চান্যেঽপি মহীপালা রাজসূয়ং মহাক্রতুম্
যজন্তে তে মহেন্দ্রেণ মোদন্তে সহ ভারত
11.63
যে চাপি নিধনং প্রাপ্তাঃ সংগ্রামেষ্বপলায়িনঃ
তে তত্সদঃ সমাসাদ্য মোদন্তে ভরতর্ষভ
11.64
তপসা যে চ তীব্রেণ ত্যজন্তীহ কলেবরম্
তেঽপি তত্স্থানমাসাদ্য শ্রীমন্তো ভান্তি নিত্যশঃ
11.65
পিতা চ ত্বাহ কৌন্তেয় পাণ্ডুঃ কৌরবনন্দনঃ
হরিশ্চন্দ্রে শ্রিয়ং দৃষ্ট্বা নৃপতৌ জাতবিস্ময়ঃ
11.66
সমর্থোঽসি মহীং জেতুং ভ্রাতরস্তে বশে স্থিতাঃ
রাজসূয়ং ক্রতুশ্রেষ্ঠমাহরস্বেতি ভারত
11.67
তস্য ত্বং পুরুষব্যাঘ্র সংকল্পং কুরু পাণ্ডব
গন্তারস্তে মহেন্দ্রস্য পূর্বৈঃ সহ সলোকতাম্
11.68
বহুবিঘ্নশ্চ নৃপতে ক্রতুরেষ স্মৃতো মহান্
ছিদ্রাণ্যত্র হি বাঞ্ছন্তি যজ্ঞঘ্না ব্রহ্মরাক্ষসাঃ
11.69
যুদ্ধং চ পৃষ্ঠগমনং পৃথিবীক্ষয়কারকম্
কিংচিদেব নিমিত্তং চ ভবত্যত্র ক্ষয়াবহম্
11.70
এতত্সংচিন্ত্য রাজেন্দ্র যত্ক্ষমং তত্সমাচর
অপ্রমত্তোত্থিতো নিত্যং চাতুর্বর্ণ্যস্য রক্ষণে
ভব এধস্ব মোদস্ব দানৈস্তর্পয় চ দ্বিজান্
11.71
এতত্তে বিস্তরেণোক্তং যন্মাং ত্বং পরিপৃচ্ছসি
আপৃচ্ছে ত্বাং গমিষ্যামি দাশার্হনগরীং প্রতি
11.72
বৈশংপায়ন উবাচ
এবমাখ্যায় পার্থেভ্যো নারদো জনমেজয়
জগাম তৈর্বৃতো রাজন্নৃষিভির্যৈঃ সমাগতঃ
11.73
গতে তু নারদে পার্থো ভ্রাতৃভিঃ সহ কৌরব
রাজসূয়ং ক্রতুশ্রেষ্ঠং চিন্তয়ামাস ভারত