Utshovঅধ্যায় 12
12.1
বৈশংপায়ন উবাচ
ঋষেস্তদ্বচনং শ্রুত্বা নিশশ্বাস যুধিষ্ঠিরঃ
চিন্তয়ন্রাজসূয়াপ্তিং ন লেভে শর্ম ভারত
12.2
রাজর্ষীণাং হি তং শ্রুত্বা মহিমানং মহাত্মনাম্
যজ্বনাং কর্মভিঃ পুণ্যৈর্লোকপ্রাপ্তিং সমীক্ষ্য চ
12.3
হরিশ্চন্দ্রং চ রাজর্ষিং রোচমানং বিশেষতঃ
যজ্বানং যজ্ঞমাহর্তুং রাজসূয়মিয়েষ সঃ
12.4
যুধিষ্ঠিরস্ততঃ সর্বানর্চয়িত্বা সভাসদঃ
প্রত্যর্চিতশ্চ তৈঃ সর্বৈর্যজ্ঞায়ৈব মনো দধে
12.5
স রাজসূয়ং রাজেন্দ্র কুরূণামৃষভঃ ক্রতুম্
আহর্তুং প্রবণং চক্রে মনঃ সংচিন্ত্য সোঽসকৃৎ
12.6
ভূয়শ্চাদ্ভুতবীর্যৌজা ধর্মমেবানুপালয়ন্
কিং হিতং সর্বলোকানাং ভবেদিতি মনো দধে
12.7
অনুগৃহ্ণন্প্রজাঃ সর্বাঃ সর্বধর্মবিদাং বরঃ
অবিশেষেণ সর্বেষাং হিতং চক্রে যুধিষ্ঠিরঃ
12.8
এবং গতে ততস্তস্মিন্পিতরীবাশ্বসঞ্জনাঃ
ন তস্য বিদ্যতে দ্বেষ্টা ততোঽস্যাজাতশত্রুতা
12.9
স মন্ত্রিণঃ সমানায্য ভ্রাতৄংশ্চ বদতাং বরঃ
রাজসূয়ং প্রতি তদা পুনঃ পুনরপৃচ্ছত
12.10
তে পৃচ্ছ্যমানাঃ সহিতা বচোঽর্থ্যং মন্ত্রিণস্তদা
যুধিষ্ঠিরং মহাপ্রাজ্ঞং যিয়ক্ষুমিদমব্রুবন্
12.11
যেনাভিষিক্তো নৃপতির্বারুণং গুণমৃচ্ছতি
তেন রাজাপি সন্কৃত্স্নং সম্রাড্গুণমভীপ্সতি
12.12
তস্য সম্রাড্গুণার্হস্য ভবতঃ কুরুনন্দন
রাজসূয়স্য সময়ং মন্যন্তে সুহৃদস্তব
12.13
তস্য যজ্ঞস্য সময়ঃ স্বাধীনঃ ক্ষত্রসংপদা
সাম্না ষডগ্নয়ো যস্মিংশ্চীয়ন্তে সংশিতব্রতৈঃ
12.14
দর্বীহোমানুপাদায় সর্বান্যঃ প্রাপ্নুতে ক্রতূন্
অভিষেকং চ যজ্ঞান্তে সর্বজিত্তেন চোচ্যতে
12.15
সমর্থোঽসি মহাবাহো সর্বে তে বশগা বয়ম্
অবিচার্য মহারাজ রাজসূয়ে মনঃ কুরু
12.16
ইত্যেবং সুহৃদঃ সর্বে পৃথক্চ সহ চাব্রুবন্
স ধর্ম্যং পাণ্ডবস্তেষাং বচঃ শ্রুত্বা বিশাং পতে
ধৃষ্টমিষ্টং বরিষ্ঠং চ জগ্রাহ মনসারিহা
12.17
শ্রুত্বা সুহৃদ্বচস্তচ্চ জানংশ্চাপ্যাত্মনঃ ক্ষমম্
পুনঃ পুনর্মনো দধ্রে রাজসূয়ায় ভারত
12.18
স ভ্রাতৃভিঃ পুনর্ধীমানৃত্বিগ্ভিশ্চ মহাত্মভিঃ
ধৌম্যদ্বৈপায়নাদ্যৈশ্চ মন্ত্রয়ামাস মন্ত্রিভিঃ
12.19
যুধিষ্ঠির উবাচ
ইয়ং যা রাজসূয়স্য সম্রাডর্হস্য সুক্রতোঃ
শ্রদ্দধানস্য বদতঃ স্পৃহা মে সা কথং ভবেৎ
12.20
বৈশংপায়ন উবাচ
এবমুক্তাস্তু তে তেন রাজ্ঞা রাজীবলোচন
ইদমূচুর্বচঃ কালে ধর্মাত্মানং যুধিষ্ঠিরম্
অর্হস্ত্বমসি ধর্মজ্ঞ রাজসূয়ং মহাক্রতুম্
12.21
অথৈবমুক্তে নৃপতাবৃত্বিগ্ভিরৃষিভিস্তথা
মন্ত্রিণো ভ্রাতরশ্চাস্য তদ্বচঃ প্রত্যপূজয়ন্
12.22
স তু রাজা মহাপ্রাজ্ঞঃ পুনরেবাত্মনাত্মবান্
ভূয়ো বিমমৃশে পার্থো লোকানাং হিতকাম্যয়া
12.23
সামর্থ্যয়োগং সংপ্রেক্ষ্য দেশকালৌ ব্যয়াগমৌ
বিমৃশ্য সম্যক্চ ধিয়া কুর্বন্প্রাজ্ঞো ন সীদতি
12.24
ন হি যজ্ঞসমারম্ভঃ কেবলাত্মবিপত্তয়ে
ভবতীতি সমাজ্ঞায় যত্নতঃ কার্যমুদ্বহন্
12.25
স নিশ্চয়ার্থং কার্যস্য কৃষ্ণমেব জনার্দনম্
সর্বলোকাত্পরং মত্বা জগাম মনসা হরিম্
12.26
অপ্রমেয়ং মহাবাহুং কামাজ্জাতমজং নৃষু
পাণ্ডবস্তর্কয়ামাস কর্মভির্দেবসংমিতৈঃ
12.27
নাস্য কিংচিদবিজ্ঞাতং নাস্য কিংচিদকর্মজম্
ন স কিংচিন্ন বিষহেদিতি কৃষ্ণমমন্যত
12.28
স তু তাং নৈষ্ঠিকীং বুদ্ধিং কৃত্বা পার্থো যুধিষ্ঠিরঃ
গুরুবদ্ভূতগুরবে প্রাহিণোদ্দূতমঞ্জসা
12.29
শীঘ্রগেন রথেনাশু স দূতঃ প্রাপ্য যাদবান্
দ্বারকাবাসিনং কৃষ্ণং দ্বারবত্যাং সমাসদৎ
12.30
দর্শনাকাঙ্ক্ষিণং পার্থং দর্শনাকাঙ্ক্ষয়াচ্যুতঃ
ইন্দ্রসেনেন সহিত ইন্দ্রপ্রস্থং যয়ৌ তদা
12.31
ব্যতীত্য বিবিধান্দেশাংস্ত্বরাবান্ক্ষিপ্রবাহনঃ
ইন্দ্রপ্রস্থগতং পার্থমভ্যগচ্ছজ্জনার্দনঃ
12.32
স গৃহে ভ্রাতৃবদ্ভ্রাত্রা ধর্মরাজেন পূজিতঃ
ভীমেন চ ততোঽপশ্যত্স্বসারং প্রীতিমান্পিতুঃ
12.33
প্রীতঃ প্রিয়েণ সুহৃদা রেমে স সহিতস্তদা
অর্জুনেন যমাভ্যাং চ গুরুবত্পর্যুপস্থিতঃ
12.34
তং বিশ্রান্তং শুভে দেশে ক্ষণিনং কল্যমচ্যুতম্
ধর্মরাজঃ সমাগম্য জ্ঞাপয়ত্স্বং প্রয়োজনম্
12.35
যুধিষ্ঠির উবাচ
প্রার্থিতো রাজসূয়ো মে ন চাসৌ কেবলেপ্সয়া
প্রাপ্যতে যেন তত্তে হ বিদিতং কৃষ্ণ সর্বশঃ
12.36
যস্মিন্সর্বং সংভবতি যশ্চ সর্বত্র পূজ্যতে
যশ্চ সর্বেশ্বরো রাজা রাজসূয়ং স বিন্দতি
12.37
তং রাজসূয়ং সুহৃদঃ কার্যমাহুঃ সমেত্য মে
তত্র মে নিশ্চিততমং তব কৃষ্ণ গিরা ভবেৎ
12.38
কেচিদ্ধি সৌহৃদাদেব দোষং ন পরিচক্ষতে
অর্থহেতোস্তথৈবান্যে প্রিয়মেব বদন্ত্যুত
12.39
প্রিয়মেব পরীপ্সন্তে কেচিদাত্মনি যদ্ধিতম্
এবংপ্রায়াশ্চ দৃশ্যন্তে জনবাদাঃ প্রয়োজনে
12.40
ত্বং তু হেতূনতীত্যৈতান্কামক্রোধৌ ব্যতীত্য চ
পরমং নঃ ক্ষমং লোকে যথাবদ্বক্তুমর্হসি