Utshovঅধ্যায় 13
13.1
শ্রীকৃষ্ণ উবাচ
সর্বৈর্গুণৈর্মহারাজ রাজসূয়ং ত্বমর্হসি
জানতস্ত্বেব তে সর্বং কিংচিদ্বক্ষ্যামি ভারত
13.2
জামদগ্ন্যেন রামেণ ক্ষত্রং যদবশেষিতম্
তস্মাদবরজং লোকে যদিদং ক্ষত্রসংজ্ঞিতম্
13.3
কৃতোঽয়ং কুলসংকল্পঃ ক্ষত্রিয়ৈর্বসুধাধিপ
নিদেশবাগ্ভিস্তত্তে হ বিদিতং ভরতর্ষভ
13.4
ঐলস্যেক্ষ্বাকুবংশস্য প্রকৃতিং পরিচক্ষতে
রাজানঃ শ্রেণিবদ্ধাশ্চ ততোঽন্যে ক্ষত্রিয়া ভুবি
13.5
ঐলবংশ্যাস্তু যে রাজংস্তথৈবেক্ষ্বাকবো নৃপাঃ
তানি চৈকশতং বিদ্ধি কুলানি ভরতর্ষভ
13.6
যয়াতেস্ত্বেব ভোজানাং বিস্তরোঽতিগুণো মহান্
ভজতে চ মহারাজ বিস্তরঃ স চতুর্দিশম্
13.7
তেষাং তথৈব তাং লক্ষ্মীং সর্বক্ষত্রমুপাসতে
সোঽবনীং মধ্যমাং ভুক্ত্বা মিথোভেদেষ্বমন্যত
13.8
চতুর্যুস্ত্বপরো রাজা যস্মিন্নেকশতোঽভবৎ
স সাম্রাজ্যং জরাসংধঃ প্রাপ্তো ভবতি যোনিতঃ
13.9
তং স রাজা মহাপ্রাজ্ঞ সংশ্রিত্য কিল সর্বশঃ
রাজন্সেনাপতির্জাতঃ শিশুপালঃ প্রতাপবান্
13.10
তমেব চ মহারাজ শিষ্যবত্সমুপস্থিতঃ
বক্রঃ করূষাধিপতির্মায়ায়োধী মহাবলঃ
13.11
অপরৌ চ মহাবীর্যৌ মহাত্মানৌ সমাশ্রিতৌ
জরাসংধং মহাবীর্যং তৌ হংসডিভকাবুভৌ
13.12
দন্তবক্রঃ করূষশ্চ কলভো মেঘবাহনঃ
মূর্ধ্না দিব্যং মণিং বিভ্রদ্যং তং ভূতমণিং বিদুঃ
13.13
মুরং চ নরকং চৈব শাস্তি যো যবনাধিপৌ
অপর্যন্তবলো রাজা প্রতীচ্যাং বরুণো যথা
13.14
ভগদত্তো মহারাজ বৃদ্ধস্তব পিতুঃ সখা
স বাচা প্রণতস্তস্য কর্মণা চৈব ভারত
13.15
স্নেহবদ্ধস্তু পিতৃবন্মনসা ভক্তিমাংস্ত্বয়ি
প্রতীচ্যাং দক্ষিণং চান্তং পৃথিব্যাঃ পাতি যো নৃপঃ
13.16
মাতুলো ভবতঃ শূরঃ পুরুজিত্কুন্তিবর্ধনঃ
স তে সংনতিমানেকঃ স্নেহতঃ শত্রুতাপনঃ
13.17
জরাসংধং গতস্ত্বেবং পুরা যো ন ময়া হতঃ
পুরুষোত্তমবিজ্ঞাতো যোঽসৌ চেদিষু দুর্মতিঃ
13.18
আত্মানং প্রতিজানাতি লোকেঽস্মিন্পুরুষোত্তমম্
আদত্তে সততং মোহাদ্যঃ স চিহ্নং চ মামকম্
13.19
বঙ্গপুণ্ড্রকিরাতেষু রাজা বলসমন্বিতঃ
পৌণ্ড্রকো বাসুদেবেতি যোঽসৌ লোকেষু বিশ্রুতঃ
13.20
চতুর্যুঃ স মহারাজ ভোজ ইন্দ্রসখো বলী
বিদ্যাবলাদ্যো ব্যজয়ত্পাণ্ড্যক্রথককৈশিকান্
13.21
ভ্রাতা যস্যাহৃতিঃ শূরো জামদগ্ন্যসমো যুধি
স ভক্তো মাগধং রাজা ভীষ্মকঃ পরবীরহা
13.22
প্রিয়াণ্যাচরতঃ প্রহ্বান্সদা সংবন্ধিনঃ সতঃ
ভজতো ন ভজত্যস্মানপ্রিয়েষু ব্যবস্থিতঃ
13.23
ন কুলং ন বলং রাজন্নভিজানংস্তথাত্মনঃ
পশ্যমানো যশো দীপ্তং জরাসংধমুপাশ্রিতঃ
13.24
উদীচ্যভোজাশ্চ তথা কুলান্যষ্টাদশাভিভো
জরাসংধভয়াদেব প্রতীচীং দিশমাশ্রিতাঃ
13.25
শূরসেনা ভদ্রকারা বোধাঃ শাল্বাঃ পটচ্চরাঃ
সুস্থরাশ্চ সুকুট্টাশ্চ কুণিন্দাঃ কুন্তিভিঃ সহ
13.26
শাল্বেয়ানাং চ রাজানঃ সোদর্যানুচরৈঃ সহ
দক্ষিণা যে চ পাঞ্চালাঃ পূর্বাঃ কুন্তিষু কোশলাঃ
13.27
তথোত্তরাং দিশং চাপি পরিত্যজ্য ভয়ার্দিতাঃ
মত্স্যাঃ সংন্যস্তপাদাশ্চ দক্ষিণাং দিশমাশ্রিতাঃ
13.28
তথৈব সর্বপাঞ্চালা জরাসংধভয়ার্দিতাঃ
স্বরাষ্ট্রং সংপরিত্যজ্য বিদ্রুতাঃ সর্বতোদিশম্
13.29
কস্যচিত্ত্বথ কালস্য কংসো নির্মথ্য বান্ধবান্
বার্হদ্রথসুতে দেব্যাবুপাগচ্ছদ্বৃথামতিঃ
13.30
অস্তিঃ প্রাপ্তিশ্চ নাম্না তে সহদেবানুজেঽবলে
বলেন তেন স জ্ঞাতীনভিভূয় বৃথামতিঃ
13.31
শ্রৈষ্ঠ্যং প্রাপ্তঃ স তস্যাসীদতীবাপনয়ো মহান্
ভোজরাজন্যবৃদ্ধৈস্তু পীড্যমানৈর্দুরাত্মনা
13.32
জ্ঞাতিত্রাণমভীপ্সদ্ভিরস্মত্সংভাবনা কৃতা
দত্ত্বাক্রূরায় সুতনুং তামাহুকসুতাং তদা
13.33
সংকর্ষণদ্বিতীয়েন জ্ঞাতিকার্যং ময়া কৃতম্
হতৌ কংসসুনামানৌ ময়া রামেণ চাপ্যুত
13.34
ভয়ে তু সমুপক্রান্তে জরাসংধে সমুদ্যতে
মন্ত্রোঽয়ং মন্ত্রিতো রাজন্কুলৈরষ্টাদশাবরৈঃ
13.35
অনারমন্তো নিঘ্নন্তো মহাস্ত্রৈঃ শতঘাতিভিঃ
ন হন্যাম বয়ং তস্য ত্রিভির্বর্ষশতৈর্বলম্
13.36
তস্য হ্যমরসংকাশৌ বলেন বলিনাং বরৌ
নামভ্যাং হংসডিভকাবিত্যাস্তাং যোধসত্তমৌ
13.37
তাবুভৌ সহিতৌ বীরৌ জরাসংধশ্চ বীর্যবান্
ত্রয়স্ত্রয়াণাং লোকানাং পর্যাপ্তা ইতি মে মতিঃ
13.38
ন হি কেবলমস্মাকং যাবন্তোঽন্যে চ পার্থিবাঃ
তথৈব তেষামাসীচ্চ বুদ্ধির্বুদ্ধিমতাং বর
13.39
অথ হংস ইতি খ্যাতঃ কশ্চিদাসীন্মহান্নৃপঃ
স চান্যৈঃ সহিতো রাজন্সংগ্রামেঽষ্টাদশাবরৈঃ
13.40
হতো হংস ইতি প্রোক্তমথ কেনাপি ভারত
তচ্ছ্রুত্বা ডিভকো রাজন্যমুনাম্ভস্যমজ্জত
13.41
বিনা হংসেন লোকেঽস্মিন্নাহং জীবিতুমুত্সহে
ইত্যেতাং মতিমাস্থায় ডিভকো নিধনং গতঃ
13.42
তথা তু ডিভকং শ্রুত্বা হংসঃ পরপুরংজয়ঃ
প্রপেদে যমুনামেব সোঽপি তস্যাং ন্যমজ্জত
13.43
তৌ স রাজা জরাসংধঃ শ্রুত্বাপ্সু নিধনং গতৌ
স্বপুরং শূরসেনানাং প্রয়য়ৌ ভরতর্ষভ
13.44
ততো বয়মমিত্রঘ্ন তস্মিন্প্রতিগতে নৃপে
পুনরানন্দিতাঃ সর্বে মথুরায়াং বসামহে
13.45
যদা ত্বভ্যেত্য পিতরং সা বৈ রাজীবলোচনা
কংসভার্যা জরাসংধং দুহিতা মাগধং নৃপম্
13.46
চোদয়ত্যেব রাজেন্দ্র পতিব্যসনদুঃখিতা
পতিঘ্নং মে জহীত্যেবং পুনঃ পুনররিংদম
13.47
ততো বয়ং মহারাজ তং মন্ত্রং পূর্বমন্ত্রিতম্
সংস্মরন্তো বিমনসো ব্যপয়াতা নরাধিপ
13.48
পৃথক্ত্বেন দ্রুতা রাজন্সংক্ষিপ্য মহতীং শ্রিয়ম্
প্রপতামো ভয়াত্তস্য সধনজ্ঞাতিবান্ধবাঃ
13.49
ইতি সংচিন্ত্য সর্বে স্ম প্রতীচীং দিশমাশ্রিতাঃ
কুশস্থলীং পুরীং রম্যাং রৈবতেনোপশোভিতাম্
13.50
পুনর্নিবেশনং তস্যাং কৃতবন্তো বয়ং নৃপ
তথৈব দুর্গসংস্কারং দেবৈরপি দুরাসদম্
13.51
স্ত্রিয়োঽপি যস্যাং যুধ্যেয়ুঃ কিং পুনর্বৃষ্ণিপুংগবাঃ
তস্যাং বয়মমিত্রঘ্ন নিবসামোঽকুতোভয়াঃ
13.52
আলোক্য গিরিমুখ্যং তং মাধবীতীর্থমেব চ
মাধবাঃ কুরুশার্দূল পরাং মুদমবাপ্নুবন্
13.53
এবং বয়ং জরাসংধাদাদিতঃ কৃতকিল্বিষাঃ
সামর্থ্যবন্তঃ সংবন্ধাদ্ভবন্তং সমুপাশ্রিতাঃ
13.54
ত্রিয়োজনায়তং সদ্ম ত্রিস্কন্ধং যোজনাদধি
যোজনান্তে শতদ্বারং বিক্রমক্রমতোরণম্
অষ্টাদশাবরৈর্নদ্ধং ক্ষত্রিয়ৈর্যুদ্ধদুর্মদৈঃ
13.55
অষ্টাদশ সহস্রাণি ব্রাতানাং সন্তি নঃ কুলে
আহুকস্য শতং পুত্রা একৈকস্ত্রিশতাবরঃ
13.56
চারুদেষ্ণঃ সহ ভ্রাত্রা চক্রদেবোঽথ সাত্যকিঃ
অহং চ রৌহিণেয়শ্চ সাম্বঃ শৌরিসমো যুধি
13.57
এবমেতে রথাঃ সপ্ত রাজন্নন্যান্নিবোধ মে
কৃতবর্মা অনাধৃষ্টিঃ সমীকঃ সমিতিংজয়ঃ
13.58
কহ্বঃ শঙ্কুর্নিদান্তশ্চ সপ্তৈবৈতে মহারথাঃ
পুত্রৌ চান্ধকভোজস্য বৃদ্ধো রাজা চ তে দশ
13.59
লোকসংহননা বীরা বীর্যবন্তো মহাবলাঃ
স্মরন্তো মধ্যমং দেশং বৃষ্ণিমধ্যে গতব্যথাঃ
13.60
স ত্বং সম্রাড্গুণৈর্যুক্তঃ সদা ভরতসত্তম
ক্ষত্রে সম্রাজমাত্মানং কর্তুমর্হসি ভারত
13.61
ন তু শক্যং জরাসংধে জীবমানে মহাবলে
রাজসূয়স্ত্বয়া প্রাপ্তুমেষা রাজন্মতির্মম
13.62
তেন রুদ্ধা হি রাজানঃ সর্বে জিত্বা গিরিব্রজে
কন্দরায়াং গিরীন্দ্রস্য সিংহেনেব মহাদ্বিপাঃ
13.63
সোঽপি রাজা জরাসংধো যিয়ক্ষুর্বসুধাধিপৈঃ
আরাধ্য হি মহাদেবং নির্জিতাস্তেন পার্থিবাঃ
13.64
স হি নির্জিত্য নির্জিত্য পার্থিবান্পৃতনাগতান্
পুরমানীয় বদ্ধ্বা চ চকার পুরুষব্রজম্
13.65
বয়ং চৈব মহারাজ জরাসংধভয়াত্তদা
মথুরাং সংপরিত্যজ্য গতা দ্বারবতীং পুরীম্
13.66
যদি ত্বেনং মহারাজ যজ্ঞং প্রাপ্তুমিহেচ্ছসি
যতস্ব তেষাং মোক্ষায় জরাসংধবধায় চ
13.67
সমারম্ভো হি শক্যোঽয়ং নান্যথা কুরুনন্দন
রাজসূয়স্য কার্ত্স্ন্যেন কর্তুং মতিমতাং বর
13.68
ইত্যেষা মে মতী রাজন্যথা বা মন্যসেঽনঘ
এবং গতে মমাচক্ষ্ব স্বয়ং নিশ্চিত্য হেতুভিঃ