অধ্যায় 14

14.1

যুধিষ্ঠির উবাচ
উক্তং ত্বয়া বুদ্ধিমতা যন্নান্যো বক্তুমর্হতি
সংশয়ানাং হি নির্মোক্তা ত্বন্নান্যো বিদ্যতে ভুবি

গৃহে গৃহে হি রাজানঃ স্বস্য স্বস্য প্রিয়ংকরাঃ
ন চ সাম্রাজ্যমাপ্তাস্তে সম্রাট্শব্দো হি কৃত্স্নভাক্

কথং পরানুভাবজ্ঞঃ স্বং প্রশংসিতুমর্হতি
পরেণ সমবেতস্তু যঃ প্রশস্তঃ স পূজ্যতে

বিশালা বহুলা ভূমির্বহুরত্নসমাচিতা
দূরং গত্বা বিজানাতি শ্রেয়ো বৃষ্ণিকুলোদ্বহ

শমমেব পরং মন্যে ন তু মোক্ষাদ্ভবেচ্ছমঃ
আরম্ভে পারমেষ্ঠ্যং তু ন প্রাপ্যমিতি মে মতিঃ

এবমেবাভিজানন্তি কুলে জাতা মনস্বিনঃ
কশ্চিত্কদাচিদেতেষাং ভবেচ্ছ্রেষ্ঠো জনার্দন

ভীম উবাচ
অনারম্ভপরো রাজা বল্মীক ইব সীদতি
দুর্বলশ্চানুপায়েন বলিনং যোঽধিতিষ্ঠতি

অতন্দ্রিতস্তু প্রায়েণ দুর্বলো বলিনং রিপুম্
জয়েত্সম্যঙ্নয়ো রাজন্নীত্যার্থানাত্মনো হিতান্

কৃষ্ণে নয়ো ময়ি বলং জয়ঃ পার্থে ধনংজয়ে
মাগধং সাধয়িষ্যামো বয়ং ত্রয় ইবাগ্নয়ঃ

কৃষ্ণ উবাচ
আদত্তেঽর্থপরো বালো নানুবন্ধমবেক্ষতে
তস্মাদরিং ন মৃষ্যন্তি বালমর্থপরায়ণম্

হিত্বা করান্যৌবনাশ্বঃ পালনাচ্চ ভগীরথঃ
কার্তবীর্যস্তপোয়োগাদ্বলাত্তু ভরতো বিভুঃ
ঋদ্ধ্যা মরুত্তস্তান্পঞ্চ সম্রাজ ইতি শুশ্রুমঃ

নিগ্রাহ্যলক্ষণং প্রাপ্তো ধর্মার্থনয়লক্ষণৈঃ
বার্হদ্রথো জরাসংধস্তদ্বিদ্ধি ভরতর্ষভ

ন চৈনমনুরুধ্যন্তে কুলান্যেকশতং নৃপাঃ
তস্মাদেতদ্বলাদেব সাম্রাজ্যং কুরুতেঽদ্য সঃ

রত্নভাজো হি রাজানো জরাসংধমুপাসতে
ন চ তুষ্যতি তেনাপি বাল্যাদনয়মাস্থিতঃ

মূর্ধাভিষিক্তং নৃপতিং প্রধানপুরুষং বলাৎ
আদত্তে ন চ নো দৃষ্টোঽভাগঃ পুরুষতঃ ক্বচিৎ

এবং সর্বান্বশে চক্রে জরাসংধঃ শতাবরান্
তং দুর্বলতরো রাজা কথং পার্থ উপৈষ্যতি

প্রোক্ষিতানাং প্রমৃষ্টানাং রাজ্ঞাং পশুপতের্গৃহে
পশূনামিব কা প্রীতির্জীবিতে ভরতর্ষভ

ক্ষত্রিয়ঃ শস্ত্রমরণো যদা ভবতি সত্কৃতঃ
ননু স্ম মাগধং সর্বে প্রতিবাধেম যদ্বয়ম্

ষডশীতিঃ সমানীতাঃ শেষা রাজংশ্চতুর্দশ
জরাসংধেন রাজানস্ততঃ ক্রূরং প্রপত্স্যতে

প্রাপ্নুয়াত্স যশো দীপ্তং তত্র যো বিঘ্নমাচরেৎ
জয়েদ্যশ্চ জরাসংধং স সম্রাণ্নিয়তং ভবেৎ