অধ্যায় 15

15.1

যুধিষ্ঠির উবাচ
সম্রাড্গুণমভীপ্সন্বৈ যুষ্মান্স্বার্থপরায়ণঃ
কথং প্রহিণুয়াং ভীমং বলাত্কেবলসাহসাৎ

ভীমার্জুনাবুভৌ নেত্রে মনো মন্যে জনার্দনম্
মনশ্চক্ষুর্বিহীনস্য কীদৃশং জীবিতং ভবেৎ

জরাসংধবলং প্রাপ্য দুষ্পারং ভীমবিক্রমম্
শ্রমো হি বঃ পরাজয্যাত্কিমু তত্র বিচেষ্টিতম্

অস্মিন্নর্থান্তরে যুক্তমনর্থঃ প্রতিপদ্যতে
যথাহং বিমৃশাম্যেকস্তত্তাবচ্ছ্রূয়তাং মম

সংন্যাসং রোচয়ে সাধু কার্যস্যাস্য জনার্দন
প্রতিহন্তি মনো মেঽদ্য রাজসূয়ো দুরাসদঃ

বৈশংপায়ন উবাচ
পার্থঃ প্রাপ্য ধনুঃশ্রেষ্ঠমক্ষয্যৌ চ মহেষুধী
রথং ধ্বজং সভাং চৈব যুধিষ্ঠিরমভাষত

ধনুরস্ত্রং শরা বীর্যং পক্ষো ভূমির্যশো বলম্
প্রাপ্তমেতন্ময়া রাজন্দুষ্প্রাপং যদভীপ্সিতম্

কুলে জন্ম প্রশংসন্তি বৈদ্যাঃ সাধু সুনিষ্ঠিতাঃ
বলেন সদৃশং নাস্তি বীর্যং তু মম রোচতে

কৃতবীর্যকুলে জাতো নির্বীর্যঃ কিং করিষ্যতি
ক্ষত্রিয়ঃ সর্বশো রাজন্যস্য বৃত্তিঃ পরাজয়ে

সর্বৈরপি গুণৈর্হীনো বীর্যবান্হি তরেদ্রিপূন্
সর্বৈরপি গুণৈর্যুক্তো নির্বীর্যঃ কিং করিষ্যতি

দ্রব্যভূতা গুণাঃ সর্বে তিষ্ঠন্তি হি পরাক্রমে
জয়স্য হেতুঃ সিদ্ধির্হি কর্ম দৈবং চ সংশ্রিতম্

সংয়ুক্তো হি বলৈঃ কশ্চিত্প্রমাদান্নোপয়ুজ্যতে
তেন দ্বারেণ শত্রুভ্যঃ ক্ষীয়তে সবলো রিপুঃ

দৈন্যং যথাবলবতি তথা মোহো বলান্বিতে
তাবুভৌ নাশকৌ হেতূ রাজ্ঞা ত্যাজ্যৌ জয়ার্থিনা

জরাসংধবিনাশং চ রাজ্ঞাং চ পরিমোক্ষণম্
যদি কুর্যাম যজ্ঞার্থং কিং ততঃ পরমং ভবেৎ

অনারম্ভে তু নিয়তো ভবেদগুণনিশ্চয়ঃ
গুণান্নিঃসংশয়াদ্রাজন্নৈর্গুণ্যং মন্যসে কথম্

কাষায়ং সুলভং পশ্চান্মুনীনাং শমমিচ্ছতাম্
সাম্রাজ্যং তু তবেচ্ছন্তো বয়ং যোত্স্যামহে পরৈঃ