Utshovঅধ্যায় 16
16.1
বাসুদেব উবাচ
জাতস্য ভারতে বংশে তথা কুন্ত্যাঃ সুতস্য চ
যা বৈ যুক্তা মতিঃ সেয়মর্জুনেন প্রদর্শিতা
16.2
ন মৃত্যোঃ সময়ং বিদ্ম রাত্রৌ বা যদি বা দিবা
ন চাপি কংচিদমরময়ুদ্ধেনাপি শুশ্রুমঃ
16.3
এতাবদেব পুরুষৈঃ কার্যং হৃদয়তোষণম্
নয়েন বিধিদৃষ্টেন যদুপক্রমতে পরান্
16.4
সুনয়স্যানপায়স্য সংয়ুগে পরমঃ ক্রমঃ
সংশয়ো জায়তে সাম্যে সাম্যং চ ন ভবেদ্দ্বয়োঃ
16.5
তে বয়ং নয়মাস্থায় শত্রুদেহসমীপগাঃ
কথমন্তং ন গচ্ছেম বৃক্ষস্যেব নদীরয়াঃ
পররন্ধ্রে পরাক্রান্তাঃ স্বরন্ধ্রাবরণে স্থিতাঃ
16.6
ব্যূঢানীকৈরনুবলৈর্নোপেয়াদ্বলবত্তরম্
ইতি বুদ্ধিমতাং নীতিস্তন্মমাপীহ রোচতে
16.7
অনবদ্যা হ্যসংবুদ্ধাঃ প্রবিষ্টাঃ শত্রুসদ্ম তৎ
শত্রুদেহমুপাক্রম্য তং কামং প্রাপ্নুয়ামহে
16.8
একো হ্যেব শ্রিয়ং নিত্যং বিভর্তি পুরুষর্ষভ
অন্তরাত্মেব ভূতানাং তত্ক্ষয়ে বৈ বলক্ষয়ঃ
16.9
অথ চেত্তং নিহত্যাজৌ শেষেণাভিসমাগতাঃ
প্রাপ্নুয়াম ততঃ স্বর্গং জ্ঞাতিত্রাণপরায়ণাঃ
16.10
যুধিষ্ঠির উবাচ
কৃষ্ণ কোঽয়ং জরাসংধঃ কিংবীর্যঃ কিংপরাক্রমঃ
যস্ত্বাং স্পৃষ্ট্বাগ্নিসদৃশং ন দগ্ধঃ শলভো যথা
16.11
কৃষ্ণ উবাচ
শৃণু রাজঞ্জরাসংধো যদ্বীর্যো যত্পরাক্রমঃ
যথা চোপেক্ষিতোঽস্মাভির্বহুশঃ কৃতবিপ্রিয়ঃ
16.12
অক্ষৌহিণীনাং তিসৃণামাসীত্সমরদর্পিতঃ
রাজা বৃহদ্রথো নাম মগধাধিপতিঃ পতিঃ
16.13
রূপবান্বীর্যসংপন্নঃ শ্রীমানতুলবিক্রমঃ
নিত্যং দীক্ষাকৃশতনুঃ শতক্রতুরিবাপরঃ
16.14
তেজসা সূর্যসদৃশঃ ক্ষময়া পৃথিবীসমঃ
যমান্তকসমঃ কোপে শ্রিয়া বৈশ্রবণোপমঃ
16.15
তস্যাভিজনসংয়ুক্তৈর্গুণৈর্ভরতসত্তম
ব্যাপ্তেয়ং পৃথিবী সর্বা সূর্যস্যেব গভস্তিভিঃ
16.16
স কাশিরাজস্য সুতে যমজে ভরতর্ষভ
উপয়েমে মহাবীর্যো রূপদ্রবিণসংমতে
16.17
তয়োশ্চকার সময়ং মিথঃ স পুরুষর্ষভঃ
নাতিবর্তিষ্য ইত্যেবং পত্নীভ্যাং সংনিধৌ তদা
16.18
স তাভ্যাং শুশুভে রাজা পত্নীভ্যাং মনুজাধিপ
প্রিয়াভ্যামনুরূপাভ্যাং করেণুভ্যামিব দ্বিপঃ
16.19
তয়োর্মধ্যগতশ্চাপি ররাজ বসুধাধিপঃ
গঙ্গায়মুনয়োর্মধ্যে মূর্তিমানিব সাগরঃ
16.20
বিষয়েষু নিমগ্নস্য তস্য যৌবনমত্যগাৎ
ন চ বংশকরঃ পুত্রস্তস্যাজায়ত কশ্চন
16.21
মঙ্গলৈর্বহুভির্হোমৈঃ পুত্রকামাভিরিষ্টিভিঃ
নাসসাদ নৃপশ্রেষ্ঠঃ পুত্রং কুলবিবর্ধনম্
16.22
অথ কাক্ষীবতঃ পুত্রং গৌতমস্য মহাত্মনঃ
শুশ্রাব তপসি শ্রান্তমুদারং চণ্ডকৌশিকম্
16.23
যদৃচ্ছয়াগতং তং তু বৃক্ষমূলমুপাশ্রিতম্
পত্নীভ্যাং সহিতো রাজা সর্বরত্নৈরতোষয়ৎ
16.24
তমব্রবীত্সত্যধৃতিঃ সত্যবাগৃষিসত্তমঃ
পরিতুষ্টোঽস্মি তে রাজন্বরং বরয় সুব্রত
16.25
ততঃ সভার্যঃ প্রণতস্তমুবাচ বৃহদ্রথঃ
পুত্রদর্শননৈরাশ্যাদ্বাষ্পগদ্গদয়া গিরা
16.26
বৃহদ্রথ উবাচ
ভগবন্রাজ্যমুত্সৃজ্য প্রস্থিতস্য তপোবনম্
কিং বরেণাল্পভাগ্যস্য কিং রাজ্যেনাপ্রজস্য মে
16.27
কৃষ্ণ উবাচ
এতচ্ছ্রুত্বা মুনির্ধ্যানমগমত্ক্ষুভিতেন্দ্রিয়ঃ
তস্যৈব চাম্রবৃক্ষস্য ছায়ায়াং সমুপাবিশৎ
16.28
তস্যোপবিষ্টস্য মুনেরুত্সঙ্গে নিপপাত হ
অবাতমশুকাদষ্টমেকমাম্রফলং কিল
16.29
তত্প্রগৃহ্য মুনিশ্রেষ্ঠো হৃদয়েনাভিমন্ত্র্য চ
রাজ্ঞে দদাবপ্রতিমং পুত্রসংপ্রাপ্তিকারকম্
16.30
উবাচ চ মহাপ্রাজ্ঞস্তং রাজানং মহামুনিঃ
গচ্ছ রাজন্কৃতার্থোঽসি নিবর্ত মনুজাধিপ
16.31
যথাসময়মাজ্ঞায় তদা স নৃপসত্তমঃ
দ্বাভ্যামেকং ফলং প্রাদাত্পত্নীভ্যাং ভরতর্ষভ
16.32
তে তদাম্রং দ্বিধা কৃত্বা ভক্ষয়ামাসতুঃ শুভে
ভাবিত্বাদপি চার্থস্য সত্যবাক্যাত্তথা মুনেঃ
16.33
তয়োঃ সমভবদ্গর্ভঃ ফলপ্রাশনসংভবঃ
তে চ দৃষ্ট্বা নরপতিঃ পরাং মুদমবাপ হ
16.34
অথ কালে মহাপ্রাজ্ঞ যথাসময়মাগতে
প্রজায়েতামুভে রাজঞ্শরীরশকলে তদা
16.35
একাক্ষিবাহুচরণে অর্ধোদরমুখস্ফিজে
দৃষ্ট্বা শরীরশকলে প্রবেপাতে উভে ভৃশম্
16.36
উদ্বিগ্নে সহ সংমন্ত্র্য তে ভগিন্যৌ তদাবলে
সজীবে প্রাণিশকলে তত্যজাতে সুদুঃখিতে
16.37
তয়োর্ধাত্র্যৌ সুসংবীতে কৃত্বা তে গর্ভসংপ্লবে
নির্গম্যান্তঃপুরদ্বারাত্সমুত্সৃজ্যাশু জগ্মতুঃ
16.38
তে চতুষ্পথনিক্ষিপ্তে জরা নামাথ রাক্ষসী
জগ্রাহ মনুজব্যাঘ্র মাংসশোণিতভোজনা
16.39
কর্তুকামা সুখবহে শকলে সা তু রাক্ষসী
সংঘট্টয়ামাস তদা বিধানবলচোদিতা
16.40
তে সমানীতমাত্রে তু শকলে পুরুষর্ষভ
একমূর্তিকৃতে বীরঃ কুমারঃ সমপদ্যত
16.41
ততঃ সা রাক্ষসী রাজন্বিস্ময়োত্ফুল্ললোচনা
ন শশাক সমুদ্বোঢুং বজ্রসারময়ং শিশুম্
16.42
বালস্তাম্রতলং মুষ্টিং কৃত্বা চাস্যে নিধায় সঃ
প্রাক্রোশদতিসংরম্ভাত্সতোয় ইব তোয়দঃ
16.43
তেন শব্দেন সংভ্রান্তঃ সহসান্তঃপুরে জনঃ
নির্জগাম নরব্যাঘ্র রাজ্ঞা সহ পরংতপ
16.44
তে চাবলে পরিগ্লানে পয়ঃপূর্ণপয়োধরে
নিরাশে পুত্রলাভায় সহসৈবাভ্যগচ্ছতাম্
16.45
অথ দৃষ্ট্বা তথাভূতে রাজানং চেষ্টসংততিম্
তং চ বালং সুবলিনং চিন্তয়ামাস রাক্ষসী
16.46
নার্হামি বিষয়ে রাজ্ঞো বসন্তী পুত্রগৃদ্ধিনঃ
বালং পুত্রমুপাদাতুং মেঘলেখেব ভাস্করম্
16.47
সা কৃত্বা মানুষং রূপমুবাচ মনুজাধিপম্
বৃহদ্রথ সুতস্তেঽয়ং মদ্দত্তঃ প্রতিগৃহ্যতাম্
16.48
তব পত্নীদ্বয়ে জাতো দ্বিজাতিবরশাসনাৎ
ধাত্রীজনপরিত্যক্তো ময়ায়ং পরিরক্ষিতঃ
16.49
ততস্তে ভরতশ্রেষ্ঠ কাশিরাজসুতে শুভে
তং বালমভিপত্যাশু প্রস্নবৈরভিষিঞ্চতাম্
16.50
ততঃ স রাজা সংহৃষ্টঃ সর্বং তদুপলভ্য চ
অপৃচ্ছন্নবহেমাভাং রাক্ষসীং তামরাক্ষসীম্
16.51
কা ত্বং কমলগর্ভাভে মম পুত্রপ্রদায়িনী
কাময়া ব্রূহি কল্যাণি দেবতা প্রতিভাসি মে