Utshovঅধ্যায় 17
17.1
রাক্ষস্যুবাচ
জরা নামাস্মি ভদ্রং তে রাক্ষসী কামরূপিণী
তব বেশ্মনি রাজেন্দ্র পূজিতা ন্যবসং সুখম্
17.2
সাহং প্রত্যুপকারার্থং চিন্তয়ন্ত্যনিশং নৃপ
তবেমে পুত্রশকলে দৃষ্টবত্যস্মি ধার্মিক
17.3
সংশ্লেষিতে ময়া দৈবাত্কুমারঃ সমপদ্যত
তব ভাগ্যৈর্মহারাজ হেতুমাত্রমহং ত্বিহ
17.4
কৃষ্ণ উবাচ
এবমুক্ত্বা তু সা রাজংস্তত্রৈবান্তরধীয়ত
স গৃহ্য চ কুমারং তং প্রাবিশত্স্বগৃহং নৃপঃ
17.5
তস্য বালস্য যত্কৃত্যং তচ্চকার নৃপস্তদা
আজ্ঞাপয়চ্চ রাক্ষস্যা মাগধেষু মহোত্সবম্
17.6
তস্য নামাকরোত্তত্র প্রজাপতিসমঃ পিতা
জরয়া সংধিতো যস্মাজ্জরাসংধস্ততোঽভবৎ
17.7
সোঽবর্ধত মহাতেজা মগধাধিপতেঃ সুতঃ
প্রমাণবলসংপন্নো হুতাহুতিরিবানলঃ
17.8
কস্যচিত্ত্বথ কালস্য পুনরেব মহাতপাঃ
মগধানুপচক্রাম ভগবাংশ্চণ্ডকৌশিকঃ
17.9
তস্যাগমনসংহৃষ্টঃ সামাত্যঃ সপুরঃসরঃ
সভার্যঃ সহ পুত্রেণ নির্জগাম বৃহদ্রথঃ
17.10
পাদ্যার্ঘ্যাচমনীয়ৈস্তমর্চয়ামাস ভারত
স নৃপো রাজ্যসহিতং পুত্রং চাস্মৈ ন্যবেদয়ৎ
17.11
প্রতিগৃহ্য তু তাং পূজাং পার্থিবাদ্ভগবানৃষিঃ
উবাচ মাগধং রাজন্প্রহৃষ্টেনান্তরাত্মনা
17.12
সর্বমেতন্ময়া রাজন্বিজ্ঞাতং জ্ঞানচক্ষুষা
পুত্রস্তু শৃণু রাজেন্দ্র যাদৃশোঽয়ং ভবিষ্যতি
17.13
অস্য বীর্যবতো বীর্যং নানুয়াস্যন্তি পার্থিবাঃ
দেবৈরপি বিসৃষ্টানি শস্ত্রাণ্যস্য মহীপতে
ন রুজং জনয়িষ্যন্তি গিরেরিব নদীরয়াঃ
17.14
সর্বমূর্ধাভিষিক্তানামেষ মূর্ধ্নি জ্বলিষ্যতি
সর্বেষাং নিষ্প্রভকরো জ্যোতিষামিব ভাস্করঃ
17.15
এনমাসাদ্য রাজানঃ সমৃদ্ধবলবাহনাঃ
বিনাশমুপয়াস্যন্তি শলভা ইব পাবকম্
17.16
এষ শ্রিয়ং সমুদিতাং সর্বরাজ্ঞাং গ্রহীষ্যতি
বর্ষাস্বিবোদ্ধতজলা নদীর্নদনদীপতিঃ
17.17
এষ ধারয়িতা সম্যক্চাতুর্বর্ণ্যং মহাবলঃ
শুভাশুভমিব স্ফীতা সর্বসস্যধরা ধরা
17.18
অস্যাজ্ঞাবশগাঃ সর্বে ভবিষ্যন্তি নরাধিপাঃ
সর্বভূতাত্মভূতস্য বায়োরিব শরীরিণঃ
17.19
এষ রুদ্রং মহাদেবং ত্রিপুরান্তকরং হরম্
সর্বলোকেষ্বতিবলঃ স্বয়ং দ্রক্ষ্যতি মাগধঃ
17.20
এবং ব্রুবন্নেব মুনিঃ স্বকার্যার্থং বিচিন্তয়ন্
বিসর্জয়ামাস নৃপং বৃহদ্রথমথারিহন্
17.21
প্রবিশ্য নগরং চৈব জ্ঞাতিসংবন্ধিভির্বৃতঃ
অভিষিচ্য জরাসংধং মগধাধিপতিস্তদা
বৃহদ্রথো নরপতিঃ পরাং নির্বৃতিমায়য়ৌ
17.22
অভিষিক্তে জরাসংধে তদা রাজা বৃহদ্রথঃ
পত্নীদ্বয়েনানুগতস্তপোবনরতোঽভবৎ
17.23
তপোবনস্থে পিতরি মাতৃভ্যাং সহ ভারত
জরাসংধঃ স্ববীর্যেণ পার্থিবানকরোদ্বশে
17.24
অথ দীর্ঘস্য কালস্য তপোবনগতো নৃপঃ
সভার্যঃ স্বর্গমগমত্তপস্তপ্ত্বা বৃহদ্রথঃ
17.25
তস্যাস্তাং হংসডিভকাবশস্ত্রনিধনাবুভৌ
মন্ত্রে মতিমতাং শ্রেষ্ঠৌ যুদ্ধশাস্ত্রবিশারদৌ
17.26
যৌ তৌ ময়া তে কথিতৌ পূর্বমেব মহাবলৌ
ত্রয়স্ত্রয়াণাং লোকানাং পর্যাপ্তা ইতি মে মতিঃ
17.27
এবমেষ তদা বীর বলিভিঃ কুকুরান্ধকৈঃ
বৃষ্ণিভিশ্চ মহারাজ নীতিহেতোরুপেক্ষিতঃ