Utshovঅধ্যায় 18
18.1
বাসুদেব উবাচ
পতিতৌ হংসডিভকৌ কংসামাত্যৌ নিপাতিতৌ
জরাসংধস্য নিধনে কালোঽয়ং সমুপাগতঃ
18.2
ন স শক্যো রণে জেতুং সর্বৈরপি সুরাসুরৈঃ
প্রাণয়ুদ্ধেন জেতব্যঃ স ইত্যুপলভামহে
18.3
ময়ি নীতির্বলং ভীমে রক্ষিতা চাবয়োর্জুনঃ
সাধয়িষ্যাম তং রাজন্বয়ং ত্রয় ইবাগ্নয়ঃ
18.4
ত্রিভিরাসাদিতোঽস্মাভির্বিজনে স নরাধিপঃ
ন সংদেহো যথা যুদ্ধমেকেনাভ্যুপয়াস্যতি
18.5
অবমানাচ্চ লোকস্য ব্যায়তত্বাচ্চ ধর্ষিতঃ
ভীমসেনেন যুদ্ধায় ধ্রুবমভ্যুপয়াস্যতি
18.6
অলং তস্য মহাবাহুর্ভীমসেনো মহাবলঃ
লোকস্য সমুদীর্ণস্য নিধনায়ান্তকো যথা
18.7
যদি তে হৃদয়ং বেত্তি যদি তে প্রত্যয়ো ময়ি
ভীমসেনার্জুনৌ শীঘ্রং ন্যাসভূতৌ প্রয়চ্ছ মে
18.8
বৈশংপায়ন উবাচ
এবমুক্তো ভগবতা প্রত্যুবাচ যুধিষ্ঠিরঃ
ভীমপার্থৌ সমালোক্য সংপ্রহৃষ্টমুখৌ স্থিতৌ
18.9
অচ্যুতাচ্যুত মা মৈবং ব্যাহরামিত্রকর্ষণ
পাণ্ডবানাং ভবান্নাথো ভবন্তং চাশ্রিতা বয়ম্
18.10
যথা বদসি গোবিন্দ সর্বং তদুপপদ্যতে
ন হি ত্বমগ্রতস্তেষাং যেষাং লক্ষ্মীঃ পরাঙ্মুখী
18.11
নিহতশ্চ জরাসংধো মোক্ষিতাশ্চ মহীক্ষিতঃ
রাজসূয়শ্চ মে লব্ধো নিদেশে তব তিষ্ঠতঃ
18.12
ক্ষিপ্রকারিন্যথা ত্বেতত্কার্যং সমুপপদ্যতে
মম কার্যং জগত্কার্যং তথা কুরু নরোত্তম
18.13
ত্রিভির্ভবদ্ভির্হি বিনা নাহং জীবিতুমুত্সহে
ধর্মকামার্থরহিতো রোগার্ত ইব দুর্গতঃ
18.14
ন শৌরিণা বিনা পার্থো ন শৌরিঃ পাণ্ডবং বিনা
নাজেয়োঽস্ত্যনয়োর্লোকে কৃষ্ণয়োরিতি মে মতিঃ
18.15
অয়ং চ বলিনাং শ্রেষ্ঠঃ শ্রীমানপি বৃকোদরঃ
যুবাভ্যাং সহিতো বীরঃ কিং ন কুর্যান্মহায়শাঃ
18.16
সুপ্রণীতো বলৌঘো হি কুরুতে কার্যমুত্তমম্
অন্ধং জডং বলং প্রাহুঃ প্রণেতব্যং বিচক্ষণৈঃ
18.17
যতো হি নিম্নং ভবতি নয়ন্তীহ ততো জলম্
যতশ্ছিদ্রং ততশ্চাপি নয়ন্তে ধীধনা বলম্
18.18
তস্মান্নয়বিধানজ্ঞং পুরুষং লোকবিশ্রুতম্
বয়মাশ্রিত্য গোবিন্দং যতামঃ কার্যসিদ্ধয়ে
18.19
এবং প্রজ্ঞানয়বলং ক্রিয়োপায়সমন্বিতম্
পুরস্কুর্বীত কার্যেষু কৃষ্ণ কার্যার্থসিদ্ধয়ে
18.20
এবমেব যদুশ্রেষ্ঠং পার্থঃ কার্যার্থসিদ্ধয়ে
অর্জুনঃ কৃষ্ণমন্বেতু ভীমোঽন্বেতু ধনংজয়ম্
নয়ো জয়ো বলং চৈব বিক্রমে সিদ্ধিমেষ্যতি
18.21
এবমুক্তাস্ততঃ সর্বে ভ্রাতরো বিপুলৌজসঃ
বার্ষ্ণেয়ঃ পাণ্ডবেয়ৌ চ প্রতস্থুর্মাগধং প্রতি
18.22
বর্চস্বিনাং ব্রাহ্মণানাং স্নাতকানাং পরিচ্ছদান্
আচ্ছাদ্য সুহৃদাং বাক্যৈর্মনোজ্ঞৈরভিনন্দিতাঃ
18.23
অমর্ষাদভিতপ্তানাং জ্ঞাত্যর্থং মুখ্যবাসসাম্
রবিসোমাগ্নিবপুষাং ভীমমাসীত্তদা বপুঃ
18.24
হতং মেনে জরাসংধং দৃষ্ট্বা ভীমপুরোগমৌ
এককার্যসমুদ্যুক্তৌ কৃষ্ণৌ যুদ্ধেঽপরাজিতৌ
18.25
ঈশৌ হি তৌ মহাত্মানৌ সর্বকার্যপ্রবর্তনে
ধর্মার্থকামকার্যাণাং কার্যাণামিব নিগ্রহে
18.26
কুরুভ্যঃ প্রস্থিতাস্তে তু মধ্যেন কুরুজাঙ্গলম্
রম্যং পদ্মসরো গত্বা কালকূটমতীত্য চ
18.27
গণ্ডকীয়াং তথা শোণং সদানীরাং তথৈব চ
একপর্বতকে নদ্যঃ ক্রমেণৈত্য ব্রজন্তি তে
18.28
সংতীর্য সরয়ূং রম্যাং দৃষ্ট্বা পূর্বাংশ্চ কোসলান্
অতীত্য জগ্মুর্মিথিলাং মালাং চর্মণ্বতীং নদীম্
18.29
উত্তীর্য গঙ্গাং শোণং চ সর্বে তে প্রাঙ্মুখাস্ত্রয়ঃ
কুরবোরশ্ছদং জগ্মুর্মাগধং ক্ষেত্রমচ্যুতাঃ
18.30
তে শশ্বদ্গোধনাকীর্ণমম্বুমন্তং শুভদ্রুমম্
গোরথং গিরিমাসাদ্য দদৃশুর্মাগধং পুরম্