Utshovঅধ্যায় 19
19.1
বাসুদেব উবাচ
এষ পার্থ মহান্স্বাদুঃ পশুমান্নিত্যমম্বুমান্
নিরাময়ঃ সুবেশ্মাঢ্যো নিবেশো মাগধঃ শুভঃ
19.2
বৈহারো বিপুলঃ শৈলো বরাহো বৃষভস্তথা
তথৈবর্ষিগিরিস্তাত শুভাশ্চৈত্যকপঞ্চমাঃ
19.3
এতে পঞ্চ মহাশৃঙ্গাঃ পর্বতাঃ শীতলদ্রুমাঃ
রক্ষন্তীবাভিসংহত্য সংহতাঙ্গা গিরিব্রজম্
19.4
পুষ্পবেষ্টিতশাখাগ্রৈর্গন্ধবদ্ভির্মনোরমৈঃ
নিগূঢা ইব লোধ্রাণাং বনৈঃ কামিজনপ্রিয়ৈঃ
19.5
শূদ্রায়াং গৌতমো যত্র মহাত্মা সংশিতব্রতঃ
ঔশীনর্যামজনয়ত্কাক্ষীবাদীন্সুতানৃষিঃ
19.6
গৌতমঃ ক্ষয়ণাদস্মাদথাসৌ তত্র বেশ্মনি
ভজতে মাগধং বংশং স নৃপাণামনুগ্রহাৎ
19.7
অঙ্গবঙ্গাদয়শ্চৈব রাজানঃ সুমহাবলাঃ
গৌতমক্ষয়মভ্যেত্য রমন্তে স্ম পুরার্জুন
19.8
বনরাজীস্তু পশ্যেমাঃ প্রিয়ালানাং মনোরমাঃ
লোধ্রাণাং চ শুভাঃ পার্থ গৌতমৌকঃসমীপজাঃ
19.9
অর্বুদঃ শক্রবাপী চ পন্নগৌ শত্রুতাপনৌ
স্বস্তিকস্যালয়শ্চাত্র মণিনাগস্য চোত্তমঃ
19.10
অপরিহার্যা মেঘানাং মাগধেয়ং মণেঃ কৃতে
কৌশিকো মণিমাংশ্চৈব ববৃধাতে হ্যনুগ্রহম্
19.11
অর্থসিদ্ধিং ত্বনপগাং জরাসংধোঽভিমন্যতে
বয়মাসাদনে তস্য দর্পমদ্য নিহন্ম হি
19.12
বৈশংপায়ন উবাচ
এবমুক্ত্বা ততঃ সর্বে ভ্রাতরো বিপুলৌজসঃ
বার্ষ্ণেয়ঃ পাণ্ডবেয়ৌ চ প্রতস্থুর্মাগধং পুরম্
19.13
তুষ্টপুষ্টজনোপেতং চাতুর্বর্ণ্যজনাকুলম্
স্ফীতোত্সবমনাধৃষ্যমাসেদুশ্চ গিরিব্রজম্
19.14
তেঽথ দ্বারমনাসাদ্য পুরস্য গিরিমুচ্ছ্রিতম্
বার্হদ্রথৈঃ পূজ্যমানং তথা নগরবাসিভিঃ
19.15
যত্র মাষাদমৃষভমাসসাদ বৃহদ্রথঃ
তং হত্বা মাষনালাশ্চ তিস্রো ভেরীরকারয়ৎ
19.16
আনহ্য চর্মণা তেন স্থাপয়ামাস স্বে পুরে
যত্র তাঃ প্রাণদন্ভের্যো দিব্যপুষ্পাবচূর্ণিতাঃ
19.17
মাগধানাং সুরুচিরং চৈত্যকান্তং সমাদ্রবন্
শিরসীব জিঘাংসন্তো জরাসংধজিঘাংসবঃ
19.18
স্থিরং সুবিপুলং শৃঙ্গং সুমহান্তং পুরাতনম্
অর্চিতং মাল্যদামৈশ্চ সততং সুপ্রতিষ্ঠিতম্
19.19
বিপুলৈর্বাহুভির্বীরাস্তেঽভিহত্যাভ্যপাতয়ন্
ততস্তে মাগধং দৃষ্ট্বা পুরং প্রবিবিশুস্তদা
19.20
এতস্মিন্নেব কালে তু জরাসংধং সমর্চয়ন্
পর্যগ্নি কুর্বংশ্চ নৃপং দ্বিরদস্থং পুরোহিতাঃ
19.21
স্নাতকব্রতিনস্তে তু বাহুশস্ত্রা নিরায়ুধাঃ
যুয়ুত্সবঃ প্রবিবিশুর্জরাসংধেন ভারত
19.22
ভক্ষ্যমাল্যাপণানাং চ দদৃশুঃ শ্রিয়মুত্তমাম্
স্ফীতাং সর্বগুণোপেতাং সর্বকামসমৃদ্ধিনীম্
19.23
তাং তু দৃষ্ট্বা সমৃদ্ধিং তে বীথ্যাং তস্যাং নরোত্তমাঃ
রাজমার্গেণ গচ্ছন্তঃ কৃষ্ণভীমধনংজয়াঃ
19.24
বলাদ্গৃহীত্বা মাল্যানি মালাকারান্মহাবলাঃ
বিরাগবসনাঃ সর্বে স্রগ্বিণো মৃষ্টকুণ্ডলাঃ
19.25
নিবেশনমথাজগ্মুর্জরাসংধস্য ধীমতঃ
গোবাসমিব বীক্ষন্তঃ সিংহা হৈমবতা যথা
19.26
শৈলস্তম্ভনিভাস্তেষাং চন্দনাগুরুভূষিতাঃ
অশোভন্ত মহারাজ বাহবো বাহুশালিনাম্
19.27
তান্দৃষ্ট্বা দ্বিরদপ্রখ্যাঞ্শালস্কন্ধানিবোদ্গতান্
ব্যূঢোরস্কান্মাগধানাং বিস্ময়ঃ সমজায়ত
19.28
তে ত্বতীত্য জনাকীর্ণাস্তিস্রঃ কক্ষ্যা নরর্ষভাঃ
অহংকারেণ রাজানমুপতস্থুর্মহাবলাঃ
19.29
তান্পাদ্যমধুপর্কার্হান্মানার্হান্সত্কৃতিং গতান্
প্রত্যুত্থায় জরাসংধ উপতস্থে যথাবিধি
19.30
উবাচ চৈতান্রাজাসৌ স্বাগতং বোঽস্ত্বিতি প্রভুঃ
তস্য হ্যেতদ্ব্রতং রাজন্বভূব ভুবি বিশ্রুতম্
19.31
স্নাতকান্ব্রাহ্মণান্প্রাপ্তাঞ্শ্রুত্বা স সমিতিংজয়ঃ
অপ্যর্ধরাত্রে নৃপতিঃ প্রত্যুদ্গচ্ছতি ভারত
19.32
তাংস্ত্বপূর্বেণ বেষেণ দৃষ্ট্বা নৃপতিসত্তমঃ
উপতস্থে জরাসংধো বিস্মিতশ্চাভবত্তদা
19.33
তে তু দৃষ্ট্বৈব রাজানং জরাসংধং নরর্ষভাঃ
ইদমূচুরমিত্রঘ্নাঃ সর্বে ভরতসত্তম
19.34
স্বস্ত্যস্তু কুশলং রাজন্নিতি সর্বে ব্যবস্থিতাঃ
তং নৃপং নৃপশার্দূল বিপ্রৈক্ষন্ত পরস্পরম্
19.35
তানব্রবীজ্জরাসংধস্তদা যাদবপাণ্ডবান্
আস্যতামিতি রাজেন্দ্র ব্রাহ্মণচ্ছদ্মসংবৃতান্
19.36
অথোপবিবিশুঃ সর্বে ত্রয়স্তে পুরুষর্ষভাঃ
সংপ্রদীপ্তাস্ত্রয়ো লক্ষ্ম্যা মহাধ্বর ইবাগ্নয়ঃ
19.37
তানুবাচ জরাসংধঃ সত্যসংধো নরাধিপঃ
বিগর্হমাণঃ কৌরব্য বেষগ্রহণকারণাৎ
19.38
ন স্নাতকব্রতা বিপ্রা বহির্মাল্যানুলেপনাঃ
ভবন্তীতি নৃলোকেঽস্মিন্বিদিতং মম সর্বশঃ
19.39
তে যূয়ং পুষ্পবন্তশ্চ ভুজৈর্জ্যাঘাতলক্ষণৈঃ
বিভ্রতঃ ক্ষাত্রমোজশ্চ ব্রাহ্মণ্যং প্রতিজানথ
19.40
এবং বিরাগবসনা বহির্মাল্যানুলেপনাঃ
সত্যং বদত কে যূয়ং সত্যং রাজসু শোভতে
19.41
চৈত্যকং চ গিরেঃ শৃঙ্গং ভিত্ত্বা কিমিব সদ্ম নঃ
অদ্বারেণ প্রবিষ্টাঃ স্থ নির্ভয়া রাজকিল্বিষাৎ
19.42
কর্ম চৈতদ্বিলিঙ্গস্য কিং বাদ্য প্রসমীক্ষিতম্
বদধ্বং বাচি বীর্যং চ ব্রাহ্মণস্য বিশেষতঃ
19.43
এবং চ মামুপস্থায় কস্মাচ্চ বিধিনার্হণাম্
প্রণীতাং নো ন গৃহ্ণীত কার্যং কিং চাস্মদাগমে
19.44
এবমুক্তস্ততঃ কৃষ্ণঃ প্রত্যুবাচ মহামনাঃ
স্নিগ্ধগম্ভীরয়া বাচা বাক্যং বাক্যবিশারদঃ
19.45
স্নাতকব্রতিনো রাজন্ব্রাহ্মণাঃ ক্ষত্রিয়া বিশঃ
বিশেষনিয়মাশ্চৈষামবিশেষাশ্চ সন্ত্যুত
19.46
বিশেষবাংশ্চ সততং ক্ষত্রিয়ঃ শ্রিয়মর্ছতি
পুষ্পবত্সু ধ্রুবা শ্রীশ্চ পুষ্পবন্তস্ততো বয়ম্
19.47
ক্ষত্রিয়ো বাহুবীর্যস্তু ন তথা বাক্যবীর্যবান্
অপ্রগল্ভং বচস্তস্য তস্মাদ্বার্হদ্রথে স্মৃতম্
19.48
স্ববীর্যং ক্ষত্রিয়াণাং চ বাহ্বোর্ধাতা ন্যবেশয়ৎ
তদ্দিদৃক্ষসি চেদ্রাজন্দ্রষ্টাস্যদ্য ন সংশয়ঃ
19.49
অদ্বারেণ রিপোর্গেহং দ্বারেণ সুহৃদো গৃহম্
প্রবিশন্তি সদা সন্তো দ্বারং নো বর্জিতং ততঃ
19.50
কার্যবন্তো গৃহানেত্য শত্রুতো নার্হণাং বয়ম্
প্রতিগৃহ্ণীম তদ্বিদ্ধি এতন্নঃ শাশ্বতং ব্রতম্