Utshovঅধ্যায় 20
20.1
জরাসংধ উবাচ
ন স্মরেয়ং কদা বৈরং কৃতং যুষ্মাভিরিত্যুত
চিন্তয়ংশ্চ ন পশ্যামি ভবতাং প্রতি বৈকৃতম্
20.2
বৈকৃতে চাসতি কথং মন্যধ্বং মামনাগসম্
অরিং বিব্রূত তদ্বিপ্রাঃ সতাং সময় এষ হি
20.3
অথ ধর্মোপঘাতাদ্ধি মনঃ সমুপতপ্যতে
যোঽনাগসি প্রসৃজতি ক্ষত্রিয়োঽপি ন সংশয়ঃ
20.4
অতোঽন্যথাচরঁল্লোকে ধর্মজ্ঞঃ সন্মহাব্রতঃ
বৃজিনাং গতিমাপ্নোতি শ্রেয়সোঽপ্যুপহন্তি চ
20.5
ত্রৈলোক্যে ক্ষত্রধর্মাদ্ধি শ্রেয়াংসং সাধুচারিণাম্
অনাগসং প্রজানানাঃ প্রমাদাদিব জল্পথ
20.6
বাসুদেব উবাচ
কুলকার্যং মহারাজ কশ্চিদেকঃ কুলোদ্বহঃ
বহতে তন্নিয়োগাদ্বৈ বয়মভ্যুত্থিতাস্ত্রয়ঃ
20.7
ত্বয়া চোপহৃতা রাজন্ক্ষত্রিয়া লোকবাসিনঃ
তদাগঃ ক্রূরমুত্পাদ্য মন্যসে কিং ত্বনাগসম্
20.8
রাজা রাজ্ঞঃ কথং সাধূন্হিংস্যান্নৃপতিসত্তম
তদ্রাজ্ঞঃ সংনিগৃহ্য ত্বং রুদ্রায়োপজিহীর্ষসি
20.9
অস্মাংস্তদেনো গচ্ছেত ত্বয়া বার্হদ্রথে কৃতম্
বয়ং হি শক্তা ধর্মস্য রক্ষণে ধর্মচারিণঃ
20.10
মনুষ্যাণাং সমালম্ভো ন চ দৃষ্টঃ কদাচন
স কথং মানুষৈর্দেবং যষ্টুমিচ্ছসি শংকরম্
20.11
সবর্ণো হি সবর্ণানাং পশুসংজ্ঞাং করিষ্যতি
কোঽন্য এবং যথা হি ত্বং জরাসংধ বৃথামতিঃ
20.12
তে ত্বাং জ্ঞাতিক্ষয়করং বয়মার্তানুসারিণঃ
জ্ঞাতিবৃদ্ধিনিমিত্তার্থং বিনিয়ন্তুমিহাগতাঃ
20.13
নাস্তি লোকে পুমানন্যঃ ক্ষত্রিয়েষ্বিতি চৈব যৎ
মন্যসে স চ তে রাজন্সুমহান্বুদ্ধিবিপ্লবঃ
20.14
কো হি জানন্নভিজনমাত্মনঃ ক্ষত্রিয়ো নৃপ
নাবিশেত্স্বর্গমতুলং রণানন্তরমব্যয়ম্
20.15
স্বর্গং হ্যেব সমাস্থায় রণয়জ্ঞেষু দীক্ষিতাঃ
যজন্তে ক্ষত্রিয়া লোকাংস্তদ্বিদ্ধি মগধাধিপ
20.16
স্বর্গয়োনির্জয়ো রাজন্স্বর্গয়োনির্মহদ্যশঃ
স্বর্গয়োনিস্তপো যুদ্ধে মার্গঃ সোঽব্যভিচারবান্
20.17
এষ হ্যৈন্দ্রো বৈজয়ন্তো গুণো নিত্যং সমাহিতঃ
যেনাসুরান্পরাজিত্য জগত্পাতি শতক্রতুঃ
20.18
স্বর্গমাস্থায় কস্য স্যাদ্বিগ্রহিত্বং যথা তব
মাগধৈর্বিপুলৈঃ সৈন্যৈর্বাহুল্যবলদর্পিতৈঃ
20.19
মাবমংস্থাঃ পরান্রাজন্নাস্তি বীর্যং নরে নরে
সমং তেজস্ত্বয়া চৈব কেবলং মনুজেশ্বর
20.20
যাবদেব ন সংবুদ্ধং তাবদেব ভবেত্তব
বিষহ্যমেতদস্মাকমতো রাজন্ব্রবীমি তে
20.21
জহি ত্বং সদৃশেষ্বেব মানং দর্পং চ মাগধ
মা গমঃ সসুতামাত্যঃ সবলশ্চ যমক্ষয়ম্
20.22
দম্ভোদ্ভবঃ কার্তবীর্য উত্তরশ্চ বৃহদ্রথঃ
শ্রেয়সো হ্যবমন্যেহ বিনেশুঃ সবলা নৃপাঃ
20.23
মুমুক্ষমাণাস্ত্বত্তশ্চ ন বয়ং ব্রাহ্মণব্রুবাঃ
শৌরিরস্মি হৃষীকেশো নৃবীরৌ পাণ্ডবাবিমৌ
20.24
ত্বামাহ্বয়ামহে রাজন্স্থিরো যুধ্যস্ব মাগধ
মুঞ্চ বা নৃপতীন্সর্বান্মা গমস্ত্বং যমক্ষয়ম্
20.25
জরাসংধ উবাচ
নাজিতান্বৈ নরপতীনহমাদদ্মি কাংশ্চন
জিতঃ কঃ পর্যবস্থাতা কোঽত্র যো ন ময়া জিতঃ
20.26
ক্ষত্রিয়স্যৈতদেবাহুর্ধর্ম্যং কৃষ্ণোপজীবনম্
বিক্রম্য বশমানীয় কামতো যত্সমাচরেৎ
20.27
দেবতার্থমুপাকৃত্য রাজ্ঞঃ কৃষ্ণ কথং ভয়াৎ
অহমদ্য বিমুঞ্চেয়ং ক্ষাত্রং ব্রতমনুস্মরন্
20.28
সৈন্যং সৈন্যেন ব্যূঢেন এক একেন বা পুনঃ
দ্বাভ্যাং ত্রিভির্বা যোত্স্যেঽহং যুগপত্পৃথগেব বা
20.29
বৈশংপায়ন উবাচ
এবমুক্ত্বা জরাসংধঃ সহদেবাভিষেচনম্
আজ্ঞাপয়ত্তদা রাজা যুয়ুত্সুর্ভীমকর্মভিঃ
20.30
স তু সেনাপতী রাজা সস্মার ভরতর্ষভ
কৌশিকং চিত্রসেনং চ তস্মিন্যুদ্ধ উপস্থিতে
20.31
যয়োস্তে নামনী লোকে হংসেতি ডিভকেতি চ
পূর্বং সংকথিতে পুম্ভির্নৃলোকে লোকসত্কৃতে
20.32
তং তু রাজন্বিভুঃ শৌরী রাজানং বলিনাং বরম্
স্মৃত্বা পুরুষশার্দূল শার্দূলসমবিক্রমম্
20.33
সত্যসংধো জরাসংধং ভুবি ভীমপরাক্রমম্
ভাগমন্যস্য নির্দিষ্টং বধ্যং ভূমিভৃদচ্যুতঃ
20.34
নাত্মনাত্মবতাং মুখ্য ইয়েষ মধুসূদনঃ
ব্রহ্মণোঽঽজ্ঞাং পুরস্কৃত্য হন্তুং হলধরানুজঃ