অধ্যায় 21

21.1

বৈশংপায়ন উবাচ
ততস্তং নিশ্চিতাত্মানং যুদ্ধায় যদুনন্দনঃ
উবাচ বাগ্মী রাজানং জরাসংধমধোক্ষজঃ

ত্রয়াণাং কেন তে রাজন্যোদ্ধুং বিতরতে মনঃ
অস্মদন্যতমেনেহ সজ্জীভবতু কো যুধি

এবমুক্তঃ স কৃষ্ণেন যুদ্ধং বব্রে মহাদ্যুতিঃ
জরাসংধস্ততো রাজন্ভীমসেনেন মাগধঃ

ধারয়ন্নগদান্মুখ্যান্নির্বৃতীর্বেদনানি চ
উপতস্থে জরাসংধং যুয়ুত্সুং বৈ পুরোহিতঃ

কৃতস্বস্ত্যয়নো বিদ্বান্ব্রাহ্মণেন যশস্বিনা
সমনহ্যজ্জরাসংধঃ ক্ষত্রধর্মমনুব্রতঃ

অবমুচ্য কিরীটং স কেশান্সমনুমৃজ্য চ
উদতিষ্ঠজ্জরাসংধো বেলাতিগ ইবার্ণবঃ

উবাচ মতিমান্রাজা ভীমং ভীমপরাক্রমম্
ভীম যোত্স্যে ত্বয়া সার্ধং শ্রেয়সা নির্জিতং বরম্

এবমুক্ত্বা জরাসংধো ভীমসেনমরিংদমঃ
প্রত্যুদ্যয়ৌ মহাতেজাঃ শক্রং বলিরিবাসুরঃ

ততঃ সংমন্ত্র্য কৃষ্ণেন কৃতস্বস্ত্যয়নো বলী
ভীমসেনো জরাসংধমাসসাদ যুয়ুত্সয়া

ততস্তৌ নরশার্দূলৌ বাহুশস্ত্রৌ সমীয়তুঃ
বীরৌ পরমসংহৃষ্টাবন্যোন্যজয়কাঙ্ক্ষিণৌ

তয়োরথ ভুজাঘাতান্নিগ্রহপ্রগ্রহাত্তথা
আসীত্সুভীমসংহ্রাদো বজ্রপর্বতয়োরিব

উভৌ পরমসংহৃষ্টৌ বলেনাতিবলাবুভৌ
অন্যোন্যস্যান্তরং প্রেপ্সূ পরস্পরজয়ৈষিণৌ

তদ্ভীমমুত্সার্য জনং যুদ্ধমাসীদুপহ্বরে
বলিনোঃ সংয়ুগে রাজন্বৃত্রবাসবয়োরিব

প্রকর্ষণাকর্ষণাভ্যামভ্যাকর্ষবিকর্ষণৈঃ
আকর্ষেতাং তথান্যোন্যং জানুভিশ্চাভিজঘ্নতুঃ

ততঃ শব্দেন মহতা ভর্ত্সয়ন্তৌ পরস্পরম্
পাষাণসংঘাতনিভৈঃ প্রহারৈরভিজঘ্নতুঃ

ব্যূঢোরস্কৌ দীর্ঘভুজৌ নিয়ুদ্ধকুশলাবুভৌ
বাহুভিঃ সমসজ্জেতামায়সৈঃ পরিঘৈরিব

কার্ত্তিকস্য তু মাসস্য প্রবৃত্তং প্রথমেঽহনি
অনারতং দিবারাত্রমবিশ্রান্তমবর্তত

তদ্বৃত্তং তু ত্রয়োদশ্যাং সমবেতং মহাত্মনোঃ
চতুর্দশ্যাং নিশায়াং তু নিবৃত্তো মাগধঃ ক্লমাৎ

তং রাজানং তথা ক্লান্তং দৃষ্ট্বা রাজঞ্জনার্দনঃ
উবাচ ভীমকর্মাণং ভীমং সংবোধয়ন্নিব

ক্লান্তঃ শত্রুর্ন কৌন্তেয় লভ্যঃ পীডয়িতুং রণে
পীড্যমানো হি কার্ত্স্ন্যেন জহ্যাজ্জীবিতমাত্মনঃ

তস্মাত্তে নৈব কৌন্তেয় পীডনীয়ো নরাধিপঃ
সমমেতেন যুধ্যস্ব বাহুভ্যাং ভরতর্ষভ

এবমুক্তঃ স কৃষ্ণেন পাণ্ডবঃ পরবীরহা
জরাসংধস্য তদ্রন্ধ্রং জ্ঞাত্বা চক্রে মতিং বধে

ততস্তমজিতং জেতুং জরাসংধং বৃকোদরঃ
সংরভ্য বলিনাং মুখ্যো জগ্রাহ কুরুনন্দনঃ