Utshovঅধ্যায় 22
22.1
বৈশংপায়ন উবাচ
ভীমসেনস্ততঃ কৃষ্ণমুবাচ যদুনন্দনম্
বুদ্ধিমাস্থায় বিপুলাং জরাসংধজিঘাংসয়া
22.2
নায়ং পাপো ময়া কৃষ্ণ যুক্তঃ স্যাদনুরোধিতুম্
প্রাণেন যদুশার্দূল বদ্ধবঙ্ক্ষণবাসসা
22.3
এবমুক্তস্ততঃ কৃষ্ণঃ প্রত্যুবাচ বৃকোদরম্
ত্বরয়ন্পুরুষব্যাঘ্রো জরাসংধবধেপ্সয়া
22.4
যত্তে দৈবং পরং সত্ত্বং যচ্চ তে মাতরিশ্বনঃ
বলং ভীম জরাসংধে দর্শয়াশু তদদ্য নঃ
22.5
এবমুক্তস্তদা ভীমো জরাসংধমরিংদমঃ
উত্ক্ষিপ্য ভ্রাময়দ্রাজন্বলবন্তং মহাবলঃ
22.6
ভ্রাময়িত্বা শতগুণং ভুজাভ্যাং ভরতর্ষভ
বভঞ্জ পৃষ্ঠে সংক্ষিপ্য নিষ্পিষ্য বিননাদ চ
22.7
তস্য নিষ্পিষ্যমাণস্য পাণ্ডবস্য চ গর্জতঃ
অভবত্তুমুলো নাদঃ সর্বপ্রাণিভয়ংকরঃ
22.8
বিত্রেসুর্মাগধাঃ সর্বে স্ত্রীণাং গর্ভাশ্চ সুস্রুবুঃ
ভীমসেনস্য নাদেন জরাসংধস্য চৈব হ
22.9
কিং নু স্বিদ্ধিমবান্ভিন্নঃ কিং নু স্বিদ্দীর্যতে মহী
ইতি স্ম মাগধা জজ্ঞুর্ভীমসেনস্য নিস্বনাৎ
22.10
ততো রাজকুলদ্বারি প্রসুপ্তমিব তং নৃপম্
রাত্রৌ পরাসুমুত্সৃজ্য নিশ্চক্রমুররিংদমাঃ
22.11
জরাসংধরথং কৃষ্ণো যোজয়িত্বা পতাকিনম্
আরোপ্য ভ্রাতরৌ চৈব মোক্ষয়ামাস বান্ধবান্
22.12
তে বৈ রত্নভুজং কৃষ্ণং রত্নার্হং পৃথিবীশ্বরাঃ
রাজানশ্চক্রুরাসাদ্য মোক্ষিতা মহতো ভয়াৎ
22.13
অক্ষতঃ শস্ত্রসংপন্নো জিতারিঃ সহ রাজভিঃ
রথমাস্থায় তং দিব্যং নির্জগাম গিরিব্রজাৎ
22.14
যঃ স সোদর্যবান্নাম দ্বিয়োধঃ কৃষ্ণসারথিঃ
অভ্যাসঘাতী সংদৃশ্যো দুর্জয়ঃ সর্বরাজভিঃ
22.15
ভীমার্জুনাভ্যাং যোধাভ্যামাস্থিতঃ কৃষ্ণসারথিঃ
শুশুভে রথবর্যোঽসৌ দুর্জয়ঃ সর্বধন্বিভিঃ
22.16
শক্রবিষ্ণূ হি সংগ্রামে চেরতুস্তারকাময়ে
রথেন তেন তং কৃষ্ণ উপারুহ্য যয়ৌ তদা
22.17
তপ্তচামীকরাভেণ কিঙ্কিণীজালমালিনা
মেঘনির্ঘোষনাদেন জৈত্রেণামিত্রঘাতিনা
22.18
যেন শক্রো দানবানাং জঘান নবতীর্নব
তং প্রাপ্য সমহৃষ্যন্ত রথং তে পুরুষর্ষভাঃ
22.19
ততঃ কৃষ্ণং মহাবাহুং ভ্রাতৃভ্যাং সহিতং তদা
রথস্থং মাগধা দৃষ্ট্বা সমপদ্যন্ত বিস্মিতাঃ
22.20
হয়ৈর্দিব্যৈঃ সমায়ুক্তো রথো বায়ুসমো জবে
অধিষ্ঠিতঃ স শুশুভে কৃষ্ণেনাতীব ভারত
22.21
অসঙ্গী দেববিহিতস্তস্মিন্রথবরে ধ্বজঃ
যোজনাদ্দদৃশে শ্রীমানিন্দ্রায়ুধসমপ্রভঃ
22.22
চিন্তয়ামাস কৃষ্ণোঽথ গরুত্মন্তং স চাভ্যয়াৎ
ক্ষণে তস্মিন্স তেনাসীচ্চৈত্যয়ূপ ইবোচ্ছ্রিতঃ
22.23
ব্যাদিতাস্যৈর্মহানাদৈঃ সহ ভূতৈর্ধ্বজালয়ৈঃ
তস্থৌ রথবরে তস্মিন্গরুত্মান্পন্নগাশনঃ
22.24
দুর্নিরীক্ষ্যো হি ভূতানাং তেজসাভ্যধিকং বভৌ
আদিত্য ইব মধ্যাহ্নে সহস্রকিরণাবৃতঃ
22.25
ন স সজ্জতি বৃক্ষেষু শস্ত্রৈশ্চাপি ন রিষ্যতে
দিব্যো ধ্বজবরো রাজন্দৃশ্যতে দেবমানুষৈঃ
22.26
তমাস্থায় রথং দিব্যং পর্জন্যসমনিস্বনম্
নির্যয়ৌ পুরুষব্যাঘ্রঃ পাণ্ডবাভ্যাং সহাচ্যুতঃ
22.27
যং লেভে বাসবাদ্রাজা বসুস্তস্মাদ্বৃহদ্রথঃ
বৃহদ্রথাত্ক্রমেণৈব প্রাপ্তো বার্হদ্রথং নৃপম্
22.28
স নির্যয়ৌ মহাবাহুঃ পুণ্ডরীকেক্ষণস্ততঃ
গিরিব্রজাদ্বহিস্তস্থৌ সমে দেশে মহায়শাঃ
22.29
তত্রৈনং নাগরাঃ সর্বে সত্কারেণাভ্যয়ুস্তদা
ব্রাহ্মণপ্রমুখা রাজন্বিধিদৃষ্টেন কর্মণা
22.30
বন্ধনাদ্বিপ্রমুক্তাশ্চ রাজানো মধুসূদনম্
পূজয়ামাসুরূচুশ্চ সান্ত্বপূর্বমিদং বচঃ
22.31
নৈতচ্চিত্রং মহাবাহো ত্বয়ি দেবকিনন্দন
ভীমার্জুনবলোপেতে ধর্মস্য পরিপালনম্
22.32
জরাসংধহ্রদে ঘোরে দুঃখপঙ্কে নিমজ্জতাম্
রাজ্ঞাং সমভ্যুদ্ধরণং যদিদং কৃতমদ্য তে
22.33
বিষ্ণো সমবসন্নানাং গিরিদুর্গে সুদারুণে
দিষ্ট্যা মোক্ষাদ্যশো দীপ্তমাপ্তং তে পুরুষোত্তম
22.34
কিং কুর্মঃ পুরুষব্যাঘ্র ব্রবীহি পুরুষর্ষভ
কৃতমিত্যেব তজ্জ্ঞেয়ং নৃপৈর্যদ্যপি দুষ্করম্
22.35
তানুবাচ হৃষীকেশঃ সমাশ্বাস্য মহামনাঃ
যুধিষ্ঠিরো রাজসূয়ং ক্রতুমাহর্তুমিচ্ছতি
22.36
তস্য ধর্মপ্রবৃত্তস্য পার্থিবত্বং চিকীর্ষতঃ
সর্বৈর্ভবদ্ভির্যজ্ঞার্থে সাহায্যং দীয়তামিতি
22.37
ততঃ প্রতীতমনসস্তে নৃপা ভরতর্ষভ
তথেত্যেবাব্রুবন্সর্বে প্রতিজজ্ঞুশ্চ তাং গিরম্
22.38
রত্নভাজং চ দাশার্হং চক্রুস্তে পৃথিবীশ্বরাঃ
কৃচ্ছ্রাজ্জগ্রাহ গোবিন্দস্তেষাং তদনুকম্পয়া
22.39
জরাসংধাত্মজশ্চৈব সহদেবো মহারথঃ
নির্যয়ৌ সজনামাত্যঃ পুরস্কৃত্য পুরোহিতম্
22.40
স নীচৈঃ প্রশ্রিতো ভূত্বা বহুরত্নপুরোগমঃ
সহদেবো নৃণাং দেবং বাসুদেবমুপস্থিতঃ
22.41
ভয়ার্তায় ততস্তস্মৈ কৃষ্ণো দত্ত্বাভয়ং তদা
অভ্যষিঞ্চত তত্রৈব জরাসংধাত্মজং তদা
22.42
গত্বৈকত্বং চ কৃষ্ণেন পার্থাভ্যাং চৈব সত্কৃতঃ
বিবেশ রাজা মতিমান্পুনর্বার্হদ্রথং পুরম্
22.43
কৃষ্ণস্তু সহ পার্থাভ্যাং শ্রিয়া পরময়া জ্বলন্
রত্নান্যাদায় ভূরীণি প্রয়য়ৌ পুষ্করেক্ষণঃ
22.44
ইন্দ্রপ্রস্থমুপাগম্য পাণ্ডবাভ্যাং সহাচ্যুতঃ
সমেত্য ধর্মরাজানং প্রীয়মাণোঽভ্যভাষত
22.45
দিষ্ট্যা ভীমেন বলবাঞ্জরাসংধো নিপাতিতঃ
রাজানো মোক্ষিতাশ্চেমে বন্ধনান্নৃপসত্তম
22.46
দিষ্ট্যা কুশলিনৌ চেমৌ ভীমসেনধনংজয়ৌ
পুনঃ স্বনগরং প্রাপ্তাবক্ষতাবিতি ভারত
22.47
ততো যুধিষ্ঠিরঃ কৃষ্ণং পূজয়িত্বা যথার্হতঃ
ভীমসেনার্জুনৌ চৈব প্রহৃষ্টঃ পরিষস্বজে
22.48
ততঃ ক্ষীণে জরাসংধে ভ্রাতৃভ্যাং বিহিতং জয়ম্
অজাতশত্রুরাসাদ্য মুমুদে ভ্রাতৃভিঃ সহ
22.49
যথাবয়ঃ সমাগম্য রাজভিস্তৈশ্চ পাণ্ডবঃ
সত্কৃত্য পূজয়িত্বা চ বিসসর্জ নরাধিপান্
22.50
যুধিষ্ঠিরাভ্যনুজ্ঞাতাস্তে নৃপা হৃষ্টমানসাঃ
জগ্মুঃ স্বদেশাংস্ত্বরিতা যানৈরুচ্চাবচৈস্ততঃ
22.51
এবং পুরুষশার্দূলো মহাবুদ্ধির্জনার্দনঃ
পাণ্ডবৈর্ঘাতয়ামাস জরাসংধমরিং তদা
22.52
ঘাতয়িত্বা জরাসংধং বুদ্ধিপূর্বমরিংদমঃ
ধর্মরাজমনুজ্ঞাপ্য পৃথাং কৃষ্ণাং চ ভারত
22.53
সুভদ্রাং ভীমসেনং চ ফল্গুনং যমজৌ তথা
ধৌম্যমামন্ত্রয়িত্বা চ প্রয়য়ৌ স্বাং পুরীং প্রতি
22.54
তেনৈব রথমুখ্যেন তরুণাদিত্যবর্চসা
ধর্মরাজবিসৃষ্টেন দিব্যেনানাদয়ন্দিশঃ
22.55
ততো যুধিষ্ঠিরমুখাঃ পাণ্ডবা ভরতর্ষভ
প্রদক্ষিণমকুর্বন্ত কৃষ্ণমক্লিষ্টকারিণম্
22.56
ততো গতে ভগবতি কৃষ্ণে দেবকিনন্দনে
জয়ং লব্ধ্বা সুবিপুলং রাজ্ঞামভয়দাস্তদা
22.57
সংবর্ধিতৌজসো ভূয়ঃ কর্মণা তেন ভারত
দ্রৌপদ্যাঃ পাণ্ডবা রাজন্পরাং প্রীতিমবর্ধয়ন্
22.58
তস্মিন্কালে তু যদ্যুক্তং ধর্মকামার্থসংহিতম্
তদ্রাজা ধর্মতশ্চক্রে রাজ্যপালনকীর্তিমান্