Utshovঅধ্যায় 23
23.1
বৈশংপায়ন উবাচ
পার্থঃ প্রাপ্য ধনুঃশ্রেষ্ঠমক্ষয্যৌ চ মহেষুধী
রথং ধ্বজং সভাং চৈব যুধিষ্ঠিরমভাষত
23.2
ধনুরস্ত্রং শরা বীর্যং পক্ষো ভূমির্যশো বলম্
প্রাপ্তমেতন্ময়া রাজন্দুষ্প্রাপং যদভীপ্সিতম্
23.3
তত্র কৃত্যমহং মন্যে কোশস্যাস্য বিবর্ধনম্
করমাহারয়িষ্যামি রাজ্ঞঃ সর্বান্নৃপোত্তম
23.4
বিজয়ায় প্রয়াস্যামি দিশং ধনদরক্ষিতাম্
তিথাবথ মুহূর্তে চ নক্ষত্রে চ তথা শিবে
23.5
ধনংজয়বচঃ শ্রুত্বা ধর্মরাজো যুধিষ্ঠিরঃ
স্নিগ্ধগম্ভীরনাদিন্যা তং গিরা প্রত্যভাষত
23.6
স্বস্তি বাচ্যার্হতো বিপ্রান্প্রয়াহি ভরতর্ষভ
দুর্হৃদামপ্রহর্ষায় সুহৃদাং নন্দনায় চ
বিজয়স্তে ধ্রুবং পার্থ প্রিয়ং কামমবাপ্নুহি
23.7
ইত্যুক্তঃ প্রয়য়ৌ পার্থঃ সৈন্যেন মহতা বৃতঃ
অগ্নিদত্তেন দিব্যেন রথেনাদ্ভুতকর্মণা
23.8
তথৈব ভীমসেনোঽপি যমৌ চ পুরুষর্ষভৌ
সসৈন্যাঃ প্রয়য়ুঃ সর্বে ধর্মরাজাভিপূজিতাঃ
23.9
দিশং ধনপতেরিষ্টামজয়ত্পাকশাসনিঃ
ভীমসেনস্তথা প্রাচীং সহদেবস্তু দক্ষিণাম্
23.10
প্রতীচীং নকুলো রাজন্দিশং ব্যজয়দস্ত্রবিৎ
খাণ্ডবপ্রস্থমধ্যাস্তে ধর্মরাজো যুধিষ্ঠিরঃ
23.11
জনমেজয় উবাচ
দিশামভিজয়ং ব্রহ্মন্বিস্তরেণানুকীর্তয়
ন হি তৃপ্যামি পূর্বেষাং শৃণ্বানশ্চরিতং মহৎ
23.12
বৈশংপায়ন উবাচ
ধনংজয়স্য বক্ষ্যামি বিজয়ং পূর্বমেব তে
যৌগপদ্যেন পার্থৈর্হি বিজিতেয়ং বসুংধরা
23.13
পূর্বং কুণিন্দবিষয়ে বশে চক্রে মহীপতীন্
ধনংজয়ো মহাবাহুর্নাতিতীব্রেণ কর্মণা
23.14
আনর্তান্কালকূটাংশ্চ কুণিন্দাংশ্চ বিজিত্য সঃ
সুমণ্ডলং পাপজিতং কৃতবাননুসৈনিকম্
23.15
স তেন সহিতো রাজন্সব্যসাচী পরংতপঃ
বিজিগ্যে সকলং দ্বীপং প্রতিবিন্ধ্যং চ পার্থিবম্
23.16
সকলদ্বীপবাসাংশ্চ সপ্তদ্বীপে চ যে নৃপাঃ
অর্জুনস্য চ সৈন্যানাং বিগ্রহস্তুমুলোঽভবৎ
23.17
স তানপি মহেষ্বাসো বিজিত্য ভরতর্ষভ
তৈরেব সহিতঃ সর্বৈঃ প্রাগ্জ্যোতিষমুপাদ্রবৎ
23.18
তত্র রাজা মহানাসীদ্ভগদত্তো বিশাং পতে
তেনাসীত্সুমহদ্যুদ্ধং পাণ্ডবস্য মহাত্মনঃ
23.19
স কিরাতৈশ্চ চীনৈশ্চ বৃতঃ প্রাগ্জ্যোতিষোঽভবৎ
অন্যৈশ্চ বহুভির্যোধৈঃ সাগরানূপবাসিভিঃ
23.20
ততঃ স দিবসানষ্টৌ যোধয়িত্বা ধনংজয়ম্
প্রহসন্নব্রবীদ্রাজা সংগ্রামে বিগতক্লমঃ
23.21
উপপন্নং মহাবাহো ত্বয়ি পাণ্ডবনন্দন
পাকশাসনদায়াদে বীর্যমাহবশোভিনি
23.22
অহং সখা সুরেন্দ্রস্য শক্রাদনবমো রণে
ন চ শক্নোমি তে তাত স্থাতুং প্রমুখতো যুধি
23.23
কিমীপ্সিতং পাণ্ডবেয় ব্রূহি কিং করবাণি তে
যদ্বক্ষ্যসি মহাবাহো তত্করিষ্যামি পুত্রক
23.24
অর্জুন উবাচ
কুরূণামৃষভো রাজা ধর্মপুত্রো যুধিষ্ঠিরঃ
তস্য পার্থিবতামীপ্সে করস্তস্মৈ প্রদীয়তাম্
23.25
ভবান্পিতৃসখা চৈব প্রীয়মাণো ময়াপি চ
ততো নাজ্ঞাপয়ামি ত্বাং প্রীতিপূর্বং প্রদীয়তাম্
23.26
ভগদত্ত উবাচ
কুন্তীমাতর্যথা মে ত্বং তথা রাজা যুধিষ্ঠিরঃ
সর্বমেতত্করিষ্যামি কিং চান্যত্করবাণি তে