Utshovঅধ্যায় 24
24.1
বৈশংপায়ন উবাচ
তং বিজিত্য মহাবাহুঃ কুন্তীপুত্রো ধনংজয়ঃ
প্রয়য়াবুত্তরাং তস্মাদ্দিশং ধনদপালিতাম্
24.2
অন্তর্গিরিং চ কৌন্তেয়স্তথৈব চ বহির্গিরিম্
তথোপরিগিরিং চৈব বিজিগ্যে পুরুষর্ষভঃ
24.3
বিজিত্য পর্বতান্সর্বান্যে চ তত্র নরাধিপাঃ
তান্বশে স্থাপয়িত্বা স রত্নান্যাদায় সর্বশঃ
24.4
তৈরেব সহিতঃ সর্বৈরনুরজ্য চ তান্নৃপান্
কুলূতবাসিনং রাজন্বৃহন্তমুপজগ্মিবান্
24.5
মৃদঙ্গবরনাদেন রথনেমিস্বনেন চ
হস্তিনাং চ নিনাদেন কম্পয়ন্বসুধামিমাম্
24.6
ততো বৃহন্তস্তরুণো বলেন চতুরঙ্গিণা
নিষ্ক্রম্য নগরাত্তস্মাদ্যোধয়ামাস পাণ্ডবম্
24.7
সুমহান্সংনিপাতোঽভূদ্ধনংজয়বৃহন্তয়োঃ
ন শশাক বৃহন্তস্তু সোঢুং পাণ্ডববিক্রমম্
24.8
সোঽবিষহ্যতমং জ্ঞাত্বা কৌন্তেয়ং পর্বতেশ্বরঃ
উপাবর্তত দুর্মেধা রত্নান্যাদায় সর্বশঃ
24.9
স তদ্রাজ্যমবস্থাপ্য কুলূতসহিতো যয়ৌ
সেনাবিন্দুমথো রাজন্রাজ্যাদাশু সমাক্ষিপৎ
24.10
মোদাপুরং বামদেবং সুদামানং সুসংকুলম্
কুলূতানুত্তরাংশ্চৈব তাংশ্চ রাজ্ঞঃ সমানয়ৎ
24.11
তত্রস্থঃ পুরুষৈরেব ধর্মরাজস্য শাসনাৎ
ব্যজয়দ্ধনংজয়ো রাজন্দেশান্পঞ্চ প্রমাণতঃ
24.12
স দিবঃপ্রস্থমাসাদ্য সেনাবিন্দোঃ পুরং মহৎ
বলেন চতুরঙ্গেণ নিবেশমকরোত্প্রভুঃ
24.13
স তৈঃ পরিবৃতঃ সর্বৈর্বিষ্বগশ্বং নরাধিপম্
অভ্যগচ্ছন্মহাতেজাঃ পৌরবং পুরুষর্ষভঃ
24.14
বিজিত্য চাহবে শূরান্পার্বতীয়ান্মহারথান্
ধ্বজিন্যা ব্যজয়দ্রাজন্পুরং পৌরবরক্ষিতম্
24.15
পৌরবং তু বিনির্জিত্য দস্যূন্পর্বতবাসিনঃ
গণানুত্সবসংকেতানজয়ত্সপ্ত পাণ্ডবঃ
24.16
ততঃ কাশ্মীরকান্বীরান্ক্ষত্রিয়ান্ক্ষত্রিয়র্ষভঃ
ব্যজয়ল্লোহিতং চৈব মণ্ডলৈর্দশভিঃ সহ
24.17
ততস্ত্রিগর্তান্কৌন্তেয়ো দার্বান্কোকনদাশ্চ যে
ক্ষত্রিয়া বহবো রাজন্নুপাবর্তন্ত সর্বশঃ
24.18
অভিসারীং ততো রম্যাং বিজিগ্যে কুরুনন্দনঃ
উরশাবাসিনং চৈব রোচমানং রণেঽজয়ৎ
24.19
ততঃ সিংহপুরং রম্যং চিত্রায়ুধসুরক্ষিতম্
প্রামথদ্বলমাস্থায় পাকশাসনিরাহবে
24.20
ততঃ সুহ্মাংশ্চ চোলাংশ্চ কিরীটী পাণ্ডবর্ষভঃ
সহিতঃ সর্বসৈন্যেন প্রামথত্কুরুনন্দনঃ
24.21
ততঃ পরমবিক্রান্তো বাহ্লীকান্কুরুনন্দনঃ
মহতা পরিমর্দেন বশে চক্রে দুরাসদান্
24.22
গৃহীত্বা তু বলং সারং ফল্গু চোত্সৃজ্য পাণ্ডবঃ
দরদান্সহ কাম্বোজৈরজয়ত্পাকশাসনিঃ
24.23
প্রাগুত্তরাং দিশং যে চ বসন্ত্যাশ্রিত্য দস্যবঃ
নিবসন্তি বনে যে চ তান্সর্বানজয়ত্প্রভুঃ
24.24
লোহান্পরমকাম্বোজানৃষিকানুত্তরানপি
সহিতাংস্তান্মহারাজ ব্যজয়ত্পাকশাসনিঃ
24.25
ঋষিকেষু তু সংগ্রামো বভূবাতিভয়ংকরঃ
তারকাময়সংকাশঃ পরমর্ষিকপার্থয়োঃ
24.26
স বিজিত্য ততো রাজন্নৃষিকান্রণমূর্ধনি
শুকোদরসমপ্রখ্যান্হয়ানষ্টৌ সমানয়ৎ
ময়ূরসদৃশানন্যানুভয়ানেব চাপরান্
24.27
স বিনির্জিত্য সংগ্রামে হিমবন্তং সনিষ্কুটম্
শ্বেতপর্বতমাসাদ্য ন্যবসত্পুরুষর্ষভঃ