অধ্যায় 25

25.1

বৈশংপায়ন উবাচ
স শ্বেতপর্বতং বীরঃ সমতিক্রম্য ভারত
দেশং কিংপুরুষাবাসং দ্রুমপুত্রেণ রক্ষিতম্

মহতা সংনিপাতেন ক্ষত্রিয়ান্তকরেণ হ
ব্যজয়ত্পাণ্ডবশ্রেষ্ঠঃ করে চৈব ন্যবেশয়ৎ

তং জিত্বা হাটকং নাম দেশং গুহ্যকরক্ষিতম্
পাকশাসনিরব্যগ্রঃ সহসৈন্যঃ সমাসদৎ

তাংস্তু সান্ত্বেন নির্জিত্য মানসং সর উত্তমম্
ঋষিকুল্যাশ্চ তাঃ সর্বা দদর্শ কুরুনন্দনঃ

সরো মানসমাসাদ্য হাটকানভিতঃ প্রভুঃ
গন্ধর্বরক্ষিতং দেশং ব্যজয়ত্পাণ্ডবস্ততঃ

তত্র তিত্তিরিকল্মাষান্মণ্ডূকাক্ষান্হয়োত্তমান্
লেভে স করমত্যন্তং গন্ধর্বনগরাত্তদা

উত্তরং হরিবর্ষং তু সমাসাদ্য স পাণ্ডবঃ
ইয়েষ জেতুং তং দেশং পাকশাসননন্দনঃ

তত এনং মহাকায়া মহাবীর্যা মহাবলাঃ
দ্বারপালাঃ সমাসাদ্য হৃষ্টা বচনমব্রুবন্

পার্থ নেদং ত্বয়া শক্যং পুরং জেতুং কথংচন
উপাবর্তস্ব কল্যাণ পর্যাপ্তমিদমচ্যুত

ইদং পুরং যঃ প্রবিশেদ্ধ্রুবং স ন ভবেন্নরঃ
প্রীয়ামহে ত্বয়া বীর পর্যাপ্তো বিজয়স্তব

ন চাপি কিংচিজ্জেতব্যমর্জুনাত্র প্রদৃশ্যতে
উত্তরাঃ কুরবো হ্যেতে নাত্র যুদ্ধং প্রবর্ততে

প্রবিষ্টশ্চাপি কৌন্তেয় নেহ দ্রক্ষ্যসি কিংচন
ন হি মানুষদেহেন শক্যমত্রাভিবীক্ষিতুম্

অথেহ পুরুষব্যাঘ্র কিংচিদন্যচ্চিকীর্ষসি
তদ্ব্রবীহি করিষ্যামো বচনাত্তব ভারত

ততস্তানব্রবীদ্রাজন্নর্জুনঃ পাকশাসনিঃ
পার্থিবত্বং চিকীর্ষামি ধর্মরাজস্য ধীমতঃ

ন প্রবেক্ষ্যামি বো দেশং বাধ্যত্বং যদি মানুষৈঃ
যুধিষ্ঠিরায় যত্কিংচিত্করবন্নঃ প্রদীয়তাম্

ততো দিব্যানি বস্ত্রাণি দিব্যান্যাভরণানি চ
মোকাজিনানি দিব্যানি তস্মৈ তে প্রদদুঃ করম্

এবং স পুরুষব্যাঘ্রো বিজিগ্যে দিশমুত্তরাম্
সংগ্রামান্সুবহূন্কৃত্বা ক্ষত্রিয়ৈর্দস্যুভিস্তথা

স বিনির্জিত্য রাজ্ঞস্তান্করে চ বিনিবেশ্য হ
ধনান্যাদায় সর্বেভ্যো রত্নানি বিবিধানি চ

হয়াংস্তিত্তিরিকল্মাষাঞ্শুকপত্রনিভানপি
ময়ূরসদৃশাংশ্চান্যান্সর্বাননিলরংহসঃ

বৃতঃ সুমহতা রাজন্বলেন চতুরঙ্গিণা
আজগাম পুনর্বীরঃ শক্রপ্রস্থং পুরোত্তমম্