অধ্যায় 26

26.1

বৈশংপায়ন উবাচ
এতস্মিন্নেব কালে তু ভীমসেনোঽপি বীর্যবান্
ধর্মরাজমনুজ্ঞাপ্য যয়ৌ প্রাচীং দিশং প্রতি

মহতা বলচক্রেণ পররাষ্ট্রাবমর্দিনা
বৃতো ভরতশার্দূলো দ্বিষচ্ছোকবিবর্ধনঃ

স গত্বা রাজশার্দূলঃ পাঞ্চালানাং পুরং মহৎ
পাঞ্চালান্বিবিধোপায়ৈঃ সান্ত্বয়ামাস পাণ্ডবঃ

ততঃ স গণ্ডকীং শূরো বিদেহাংশ্চ নরর্ষভঃ
বিজিত্যাল্পেন কালেন দশার্ণানগমত্প্রভুঃ

তত্র দাশার্ণকো রাজা সুধর্মা লোমহর্ষণম্
কৃতবান্কর্ম ভীমেন মহদ্যুদ্ধং নিরায়ুধম্

ভীমসেনস্তু তদ্দৃষ্ট্বা তস্য কর্ম পরংতপঃ
অধিসেনাপতিং চক্রে সুধর্মাণং মহাবলম্

ততঃ প্রাচীং দিশং ভীমো যয়ৌ ভীমপরাক্রমঃ
সৈন্যেন মহতা রাজন্কম্পয়ন্নিব মেদিনীম্

সোঽশ্বমেধেশ্বরং রাজন্রোচমানং সহানুজম্
জিগায় সমরে বীরো বলেন বলিনাং বরঃ

স তং নির্জিত্য কৌন্তেয়ো নাতিতীব্রেণ কর্মণা
পূর্বদেশং মহাবীর্যো বিজিগ্যে কুরুনন্দনঃ

ততো দক্ষিণমাগম্য পুলিন্দনগরং মহৎ
সুকুমারং বশে চক্রে সুমিত্রং চ নরাধিপম্

ততস্তু ধর্মরাজস্য শাসনাদ্ভরতর্ষভঃ
শিশুপালং মহাবীর্যমভ্যয়াজ্জনমেজয়

চেদিরাজোঽপি তচ্ছ্রুত্বা পাণ্ডবস্য চিকীর্ষিতম্
উপনিষ্ক্রম্য নগরাত্প্রত্যগৃহ্ণাত্পরংতপঃ

তৌ সমেত্য মহারাজ কুরুচেদিবৃষৌ তদা
উভয়োরাত্মকুলয়োঃ কৌশল্যং পর্যপৃচ্ছতাম্

ততো নিবেদ্য তদ্রাষ্ট্রং চেদিরাজো বিশাং পতে
উবাচ ভীমং প্রহসন্কিমিদং কুরুষেঽনঘ

তস্য ভীমস্তদাচখ্যৌ ধর্মরাজচিকীর্ষিতম্
স চ তত্প্রতিগৃহ্যৈব তথা চক্রে নরাধিপঃ

ততো ভীমস্তত্র রাজন্নুষিত্বা ত্রিদশাঃ ক্ষপাঃ
সত্কৃতঃ শিশুপালেন যয়ৌ সবলবাহনঃ