Utshovঅধ্যায় 27
27.1
বৈশংপায়ন উবাচ
ততঃ কুমারবিষয়ে শ্রেণিমন্তমথাজয়ৎ
কোসলাধিপতিং চৈব বৃহদ্বলমরিংদমঃ
27.2
অয়োধ্যায়াং তু ধর্মজ্ঞং দীর্ঘপ্রজ্ঞং মহাবলম্
অজয়ত্পাণ্ডবশ্রেষ্ঠো নাতিতীব্রেণ কর্মণা
27.3
ততো গোপালকচ্ছং চ সোত্তমানপি চোত্তরান্
মল্লানামধিপং চৈব পার্থিবং ব্যজয়ত্প্রভুঃ
27.4
ততো হিমবতঃ পার্শ্বে সমভ্যেত্য জরদ্গবম্
সর্বমল্পেন কালেন দেশং চক্রে বশে বলী
27.5
এবং বহুবিধান্দেশান্বিজিত্য পুরুষর্ষভঃ
উন্নাটমভিতো জিগ্যে কুক্ষিমন্তং চ পর্বতম্
পাণ্ডবঃ সুমহাবীর্যো বলেন বলিনাং বরঃ
27.6
স কাশিরাজং সমরে সুবন্ধুমনিবর্তিনম্
বশে চক্রে মহাবাহুর্ভীমো ভীমপরাক্রমঃ
27.7
ততঃ সুপার্শ্বমভিতস্তথা রাজপতিং ক্রথম্
যুধ্যমানং বলাত্সংখ্যে বিজিগ্যে পাণ্ডবর্ষভঃ
27.8
ততো মত্স্যান্মহাতেজা মলয়াংশ্চ মহাবলান্
অনবদ্যান্গয়াংশ্চৈব পশুভূমিং চ সর্বশঃ
27.9
নিবৃত্য চ মহাবাহুর্মদর্বীকং মহীধরম্
সোপদেশং বিনির্জিত্য প্রয়য়াবুত্তরামুখঃ
বত্সভূমিং চ কৌন্তেয়ো বিজিগ্যে বলবান্বলাৎ
27.10
ভর্গাণামধিপং চৈব নিষাদাধিপতিং তথা
বিজিগ্যে ভূমিপালাংশ্চ মণিমত্প্রমুখান্বহূন্
27.11
ততো দক্ষিণমল্লাংশ্চ ভোগবন্তং চ পাণ্ডবঃ
তরসৈবাজয়দ্ভীমো নাতিতীব্রেণ কর্মণা
27.12
শর্মকান্বর্মকাংশ্চৈব সান্ত্বেনৈবাজয়ত্প্রভুঃ
বৈদেহকং চ রাজানং জনকং জগতীপতিম্
বিজিগ্যে পুরুষব্যাঘ্রো নাতিতীব্রেণ কর্মণা
27.13
বৈদেহস্থস্তু কৌন্তেয় ইন্দ্রপর্বতমন্তিকাৎ
কিরাতানামধিপতীন্ব্যজয়ত্সপ্ত পাণ্ডবঃ
27.14
ততঃ সুহ্মান্প্রাচ্যসুহ্মান্সমক্ষাংশ্চৈব বীর্যবান্
বিজিত্য যুধি কৌন্তেয়ো মাগধানুপয়াদ্বলী
27.15
দণ্ডং চ দণ্ডধারং চ বিজিত্য পৃথিবীপতীন্
তৈরেব সহিতঃ সর্বৈর্গিরিব্রজমুপাদ্রবৎ
27.16
জারাসংধিং সান্ত্বয়িত্বা করে চ বিনিবেশ্য হ
তৈরেব সহিতো রাজন্কর্ণমভ্যদ্রবদ্বলী
27.17
স কম্পয়ন্নিব মহীং বলেন চতুরঙ্গিণা
যুয়ুধে পাণ্ডবশ্রেষ্ঠঃ কর্ণেনামিত্রঘাতিনা
27.18
স কর্ণং যুধি নির্জিত্য বশে কৃত্বা চ ভারত
ততো বিজিগ্যে বলবান্রাজ্ঞঃ পর্বতবাসিনঃ
27.19
অথ মোদাগিরিং চৈব রাজানং বলবত্তরম্
পাণ্ডবো বাহুবীর্যেণ নিজঘান মহামৃধে
27.20
ততঃ পৌণ্ড্রাধিপং বীরং বাসুদেবং মহাবলম্
কৌশিকীকচ্ছনিলয়ং রাজানং চ মহৌজসম্
27.21
উভৌ বলবৃতৌ বীরাবুভৌ তীব্রপরাক্রমৌ
নির্জিত্যাজৌ মহারাজ বঙ্গরাজমুপাদ্রবৎ
27.22
সমুদ্রসেনং নির্জিত্য চন্দ্রসেনং চ পার্থিবম্
তাম্রলিপ্তং চ রাজানং কাচং বঙ্গাধিপং তথা
27.23
সুহ্মানামধিপং চৈব যে চ সাগরবাসিনঃ
সর্বান্ম্লেচ্ছগণাংশ্চৈব বিজিগ্যে ভরতর্ষভঃ
27.24
এবং বহুবিধান্দেশান্বিজিত্য পবনাত্মজঃ
বসু তেভ্য উপাদায় লৌহিত্যমগমদ্বলী
27.25
স সর্বান্ম্লেচ্ছনৃপতীন্সাগরদ্বীপবাসিনঃ
করমাহারয়ামাস রত্নানি বিবিধানি চ
27.26
চন্দনাগুরুবস্ত্রাণি মণিমুক্তমনুত্তমম্
কাঞ্চনং রজতং বজ্রং বিদ্রুমং চ মহাধনম্
27.27
স কোটিশতসংখ্যেন ধনেন মহতা তদা
অভ্যবর্ষদমেয়াত্মা ধনবর্ষেণ পাণ্ডবম্
27.28
ইন্দ্রপ্রস্থমথাগম্য ভীমো ভীমপরাক্রমঃ
নিবেদয়ামাস তদা ধর্মরাজায় তদ্ধনম্