Utshovঅধ্যায় 28
28.1
বৈশংপায়ন উবাচ
তথৈব সহদেবোঽপি ধর্মরাজেন পূজিতঃ
মহত্যা সেনয়া সার্ধং প্রয়য়ৌ দক্ষিণাং দিশম্
28.2
স শূরসেনান্কার্ত্স্ন্যেন পূর্বমেবাজয়ত্প্রভুঃ
মত্স্যরাজং চ কৌরব্যো বশে চক্রে বলাদ্বলী
28.3
অধিরাজাধিপং চৈব দন্তবক্রং মহাহবে
জিগায় করদং চৈব স্বরাজ্যে সংন্যবেশয়ৎ
28.4
সুকুমারং বশে চক্রে সুমিত্রং চ নরাধিপম্
তথৈবাপরমত্স্যাংশ্চ ব্যজয়ত্স পটচ্চরান্
28.5
নিষাদভূমিং গোশৃঙ্গং পর্বতপ্রবরং তথা
তরসা ব্যজয়দ্ধীমাঞ্শ্রেণিমন্তং চ পার্থিবম্
28.6
নবরাষ্ট্রং বিনির্জিত্য কুন্তিভোজমুপাদ্রবৎ
প্রীতিপূর্বং চ তস্যাসৌ প্রতিজগ্রাহ শাসনম্
28.7
ততশ্চর্মণ্বতীকূলে জম্ভকস্যাত্মজং নৃপম্
দদর্শ বাসুদেবেন শেষিতং পূর্ববৈরিণা
28.8
চক্রে তত্র স সংগ্রামং সহ ভোজেন ভারত
স তমাজৌ বিনির্জিত্য দক্ষিণাভিমুখো যয়ৌ
28.9
করাংস্তেভ্য উপাদায় রত্নানি বিবিধানি চ
ততস্তৈরেব সহিতো নর্মদামভিতো যয়ৌ
28.10
বিন্দানুবিন্দাবাবন্ত্যৌ সৈন্যেন মহতা বৃতৌ
জিগায় সমরে বীরাবাশ্বিনেয়ঃ প্রতাপবান্
28.11
ততো রত্নান্যুপাদায় পুরীং মাহিষ্মতীং যয়ৌ
তত্র নীলেন রাজ্ঞা স চক্রে যুদ্ধং নরর্ষভঃ
28.12
পাণ্ডবঃ পরবীরঘ্নঃ সহদেবঃ প্রতাপবান্
ততোঽস্য সুমহদ্যুদ্ধমাসীদ্ভীরুভয়ংকরম্
28.13
সৈন্যক্ষয়করং চৈব প্রাণানাং সংশয়ায় চ
চক্রে তস্য হি সাহায্যং ভগবান্হব্যবাহনঃ
28.14
ততো হয়া রথা নাগাঃ পুরুষাঃ কবচানি চ
প্রদীপ্তানি ব্যদৃশ্যন্ত সহদেববলে তদা
28.15
ততঃ সুসংভ্রান্তমনা বভূব কুরুনন্দনঃ
নোত্তরং প্রতিবক্তুং চ শক্তোঽভূজ্জনমেজয়
28.16
জনমেজয় উবাচ
কিমর্থং ভগবানগ্নিঃ প্রত্যমিত্রোঽভবদ্যুধি
সহদেবস্য যজ্ঞার্থং ঘটমানস্য বৈ দ্বিজ
28.17
বৈশংপায়ন উবাচ
তত্র মাহিষ্মতীবাসী ভগবান্হব্যবাহনঃ
শ্রূয়তে নিগৃহীতো বৈ পুরস্তাত্পারদারিকঃ
28.18
নীলস্য রাজ্ঞঃ পূর্বেষামুপনীতশ্চ সোঽভবৎ
তদা ব্রাহ্মণরূপেণ চরমাণো যদৃচ্ছয়া
28.19
তং তু রাজা যথাশাস্ত্রমন্বশাদ্ধার্মিকস্তদা
প্রজজ্বাল ততঃ কোপাদ্ভগবান্হব্যবাহনঃ
28.20
তং দৃষ্ট্বা বিস্মিতো রাজা জগাম শিরসা কবিম্
চক্রে প্রসাদং চ তদা তস্য রাজ্ঞো বিভাবসুঃ
28.21
বরেণ ছন্দয়ামাস তং নৃপং স্বিষ্টকৃত্তমঃ
অভয়ং চ স জগ্রাহ স্বসৈন্যে বৈ মহীপতিঃ
28.22
ততঃ প্রভৃতি যে কেচিদজ্ঞানাত্তাং পুরীং নৃপাঃ
জিগীষন্তি বলাদ্রাজংস্তে দহ্যন্তীহ বহ্নিনা
28.23
তস্যাং পুর্যাং তদা চৈব মাহিষ্মত্যাং কুরূদ্বহ
বভূবুরনভিগ্রাহ্যা যোষিতশ্ছন্দতঃ কিল
28.24
এবমগ্নির্বরং প্রাদাত্স্ত্রীণামপ্রতিবারণে
স্বৈরিণ্যস্তত্র নার্যো হি যথেষ্টং প্রচরন্ত্যুত
28.25
বর্জয়ন্তি চ রাজানস্তদ্রাষ্ট্রং পুরুষোত্তম
ভয়াদগ্নের্মহারাজ তদা প্রভৃতি সর্বদা
28.26
সহদেবস্তু ধর্মাত্মা সৈন্যং দৃষ্ট্বা ভয়ার্দিতম্
পরীতমগ্নিনা রাজন্নাকম্পত যথা গিরিঃ
28.27
উপস্পৃশ্য শুচির্ভূত্বা সোঽব্রবীত্পাবকং ততঃ
ত্বদর্থোঽয়ং সমারম্ভঃ কৃষ্ণবর্ত্মন্নমোঽস্তু তে
28.28
মুখং ত্বমসি দেবানাং যজ্ঞস্ত্বমসি পাবক
পাবনাত্পাবকশ্চাসি বহনাদ্ধব্যবাহনঃ
28.29
বেদাস্ত্বদর্থং জাতাশ্চ জাতবেদাস্ততো হ্যসি
যজ্ঞবিঘ্নমিমং কর্তুং নার্হস্ত্বং হব্যবাহন
28.30
এবমুক্ত্বা তু মাদ্রেয়ঃ কুশৈরাস্তীর্য মেদিনীম্
বিধিবত্পুরুষব্যাঘ্রঃ পাবকং প্রত্যুপাবিশৎ
28.31
প্রমুখে সর্বসৈন্যস্য ভীতোদ্বিগ্নস্য ভারত
ন চৈনমত্যগাদ্বহ্নির্বেলামিব মহোদধিঃ
28.32
তমভ্যেত্য শনৈর্বহ্নিরুবাচ কুরুনন্দনম্
সহদেবং নৃণাং দেবং সান্ত্বপূর্বমিদং বচঃ
28.33
উত্তিষ্ঠোত্তিষ্ঠ কৌরব্য জিজ্ঞাসেয়ং কৃতা ময়া
বেদ্মি সর্বমভিপ্রায়ং তব ধর্মসুতস্য চ
28.34
ময়া তু রক্ষিতব্যেয়ং পুরী ভরতসত্তম
যাবদ্রাজ্ঞোঽস্য নীলস্য কুলবংশধরা ইতি
ঈপ্সিতং তু করিষ্যামি মনসস্তব পাণ্ডব
28.35
তত উত্থায় হৃষ্টাত্মা প্রাঞ্জলিঃ শিরসানতঃ
পূজয়ামাস মাদ্রেয়ঃ পাবকং পুরুষর্ষভঃ
28.36
পাবকে বিনিবৃত্তে তু নীলো রাজাভ্যয়াত্তদা
সত্কারেণ নরব্যাঘ্রং সহদেবং যুধাং পতিম্
28.37
প্রতিগৃহ্য চ তাং পূজাং করে চ বিনিবেশ্য তম্
মাদ্রীসুতস্ততঃ প্রায়াদ্বিজয়ী দক্ষিণাং দিশম্
28.38
ত্রৈপুরং স বশে কৃত্বা রাজানমমিতৌজসম্
নিজগ্রাহ মহাবাহুস্তরসা পোতনেশ্বরম্
28.39
আহৃতিং কৌশিকাচার্যং যত্নেন মহতা ততঃ
বশে চক্রে মহাবাহুঃ সুরাষ্ট্রাধিপতিং তথা
28.40
সুরাষ্ট্রবিষয়স্থশ্চ প্রেষয়ামাস রুক্মিণে
রাজ্ঞে ভোজকটস্থায় মহামাত্রায় ধীমতে
28.41
ভীষ্মকায় স ধর্মাত্মা সাক্ষাদিন্দ্রসখায় বৈ
স চাস্য সসুতো রাজন্প্রতিজগ্রাহ শাসনম্
28.42
প্রীতিপূর্বং মহাবাহুর্বাসুদেবমবেক্ষ্য চ
ততঃ স রত্নান্যাদায় পুনঃ প্রায়াদ্যুধাং পতিঃ
28.43
ততঃ শূর্পারকং চৈব গণং চোপকৃতাহ্বয়ম্
বশে চক্রে মহাতেজা দণ্ডকাংশ্চ মহাবলঃ
28.44
সাগরদ্বীপবাসাংশ্চ নৃপতীন্ম্লেচ্ছয়োনিজান্
নিষাদান্পুরুষাদাংশ্চ কর্ণপ্রাবরণানপি
28.45
যে চ কালমুখা নাম নরা রাক্ষসয়োনয়ঃ
কৃত্স্নং কোল্লগিরিং চৈব মুরচীপত্তনং তথা
28.46
দ্বীপং তাম্রাহ্বয়ং চৈব পর্বতং রামকং তথা
তিমিংগিলং চ নৃপতিং বশে চক্রে মহামতিঃ
28.47
একপাদাংশ্চ পুরুষান্কেবলান্বনবাসিনঃ
নগরীং সংজয়ন্তীং চ পিচ্ছণ্ডং করহাটকম্
দূতৈরেব বশে চক্রে করং চৈনানদাপয়ৎ
28.48
পাণ্ড্যাংশ্চ দ্রবিডাংশ্চৈব সহিতাংশ্চোড্রকেরলৈঃ
অন্ধ্রাংস্তলবনাংশ্চৈব কলিঙ্গানোষ্ট্রকর্ণিকান্
28.49
অন্তাখীং চৈব রোমাং চ যবনানাং পুরং তথা
দূতৈরেব বশে চক্রে করং চৈনানদাপয়ৎ
28.50
ভরুকচ্ছং গতো ধীমান্দূতান্মাদ্রবতীসুতঃ
প্রেষয়ামাস রাজেন্দ্র পৌলস্ত্যায় মহাত্মনে
বিভীষণায় ধর্মাত্মা প্রীতিপূর্বমরিংদমঃ
28.51
স চাস্য প্রতিজগ্রাহ শাসনং প্রীতিপূর্বকম্
তচ্চ কালকৃতং ধীমানন্বমন্যত স প্রভুঃ
28.52
ততঃ সংপ্রেষয়ামাস রত্নানি বিবিধানি চ
চন্দনাগুরুমুখ্যানি দিব্যান্যাভরণানি চ
28.53
বাসাংসি চ মহার্হাণি মণীংশ্চৈব মহাধনান্
ন্যবর্তত ততো ধীমান্সহদেবঃ প্রতাপবান্
28.54
এবং নির্জিত্য তরসা সান্ত্বেন বিজয়েন চ
করদান্পার্থিবান্কৃত্বা প্রত্যাগচ্ছদরিংদমঃ
28.55
ধর্মরাজায় তত্সর্বং নিবেদ্য ভরতর্ষভ
কৃতকর্মা সুখং রাজন্নুবাস জনমেজয়