অধ্যায় 29

29.1

বৈশংপায়ন উবাচ
নকুলস্য তু বক্ষ্যামি কর্মাণি বিজয়ং তথা
বাসুদেবজিতামাশাং যথাসৌ ব্যজয়ত্প্রভুঃ

নির্যায় খাণ্ডবপ্রস্থাত্প্রতীচীমভিতো দিশম্
উদ্দিশ্য মতিমান্প্রায়ান্মহত্যা সেনয়া সহ

সিংহনাদেন মহতা যোধানাং গর্জিতেন চ
রথনেমিনিনাদৈশ্চ কম্পয়ন্বসুধামিমাম্

ততো বহুধনং রম্যং গবাশ্বধনধান্যবৎ
কার্ত্তিকেয়স্য দয়িতং রোহীতকমুপাদ্রবৎ

তত্র যুদ্ধং মহদ্বৃত্তং শূরৈর্মত্তময়ূরকৈঃ
মরুভূমিং চ কার্ত্স্ন্যেন তথৈব বহুধান্যকম্

শৈরীষকং মহেচ্ছং চ বশে চক্রে মহাদ্যুতিঃ
শিবীংস্ত্রিগর্তানম্বষ্ঠান্মালবান্পঞ্চকর্পটান্

তথা মধ্যমিকায়াংশ্চ বাটধানান্দ্বিজানথ
পুনশ্চ পরিবৃত্যাথ পুষ্করারণ্যবাসিনঃ

গণানুত্সবসংকেতান্ব্যজয়ত্পুরুষর্ষভঃ
সিন্ধুকূলাশ্রিতা যে চ গ্রামণেয়া মহাবলাঃ

শূদ্রাভীরগণাশ্চৈব যে চাশ্রিত্য সরস্বতীম্
বর্তয়ন্তি চ যে মত্স্যৈর্যে চ পর্বতবাসিনঃ

কৃত্স্নং পঞ্চনদং চৈব তথৈবাপরপর্যটম্
উত্তরজ্যোতিকং চৈব তথা বৃন্দাটকং পুরম্
দ্বারপালং চ তরসা বশে চক্রে মহাদ্যুতিঃ

রমঠান্হারহূণাংশ্চ প্রতীচ্যাশ্চৈব যে নৃপাঃ
তান্সর্বান্স বশে চক্রে শাসনাদেব পাণ্ডবঃ

তত্রস্থঃ প্রেষয়ামাস বাসুদেবায় চাভিভুঃ
স চাস্য দশভী রাজ্যৈঃ প্রতিজগ্রাহ শাসনম্

ততঃ শাকলমভ্যেত্য মদ্রাণাং পুটভেদনম্
মাতুলং প্রীতিপূর্বেণ শল্যং চক্রে বশে বলী

স তস্মিন্সত্কৃতো রাজ্ঞা সত্কারার্হো বিশাং পতে
রত্নানি ভূরীণ্যাদায় সংপ্রতস্থে যুধাং পতিঃ

ততঃ সাগরকুক্ষিস্থান্ম্লেচ্ছান্পরমদারুণান্
পহ্লবান্বর্বরাংশ্চৈব তান্সর্বাননয়দ্বশম্

ততো রত্নান্যুপাদায় বশে কৃত্বা চ পার্থিবান্
ন্যবর্তত নরশ্রেষ্ঠো নকুলশ্চিত্রমার্গবিৎ

করভাণাং সহস্রাণি কোশং তস্য মহাত্মনঃ
ঊহুর্দশ মহারাজ কৃচ্ছ্রাদিব মহাধনম্

ইন্দ্রপ্রস্থগতং বীরমভ্যেত্য স যুধিষ্ঠিরম্
ততো মাদ্রীসুতঃ শ্রীমান্ধনং তস্মৈ ন্যবেদয়ৎ

এবং প্রতীচীং নকুলো দিশং বরুণপালিতাম্
বিজিগ্যে বাসুদেবেন নির্জিতাং ভরতর্ষভঃ