Utshovঅধ্যায় 30
30.1
বৈশংপায়ন উবাচ
রক্ষণাদ্ধর্মরাজস্য সত্যস্য পরিপালনাৎ
শত্রূণাং ক্ষপণাচ্চৈব স্বকর্মনিরতাঃ প্রজাঃ
30.2
বলীনাং সম্যগাদানাদ্ধর্মতশ্চানুশাসনাৎ
নিকামবর্ষী পর্জন্যঃ স্ফীতো জনপদোঽভবৎ
30.3
সর্বারম্ভাঃ সুপ্রবৃত্তা গোরক্ষং কর্ষণং বণিক্
বিশেষাত্সর্বমেবৈতত্সংজজ্ঞে রাজকর্মণঃ
30.4
দস্যুভ্যো বঞ্চকেভ্যো বা রাজন্প্রতি পরস্পরম্
রাজবল্লভতশ্চৈব নাশ্রূয়ন্ত মৃষা গিরঃ
30.5
অবর্ষং চাতিবর্ষং চ ব্যাধিপাবকমূর্ছনম্
সর্বমেতত্তদা নাসীদ্ধর্মনিত্যে যুধিষ্ঠিরে
30.6
প্রিয়ং কর্তুমুপস্থাতুং বলিকর্ম স্বভাবজম্
অভিহর্তুং নৃপা জগ্মুর্নান্যৈঃ কার্যৈঃ পৃথক্পৃথক্
30.7
ধর্ম্যৈর্ধনাগমৈস্তস্য ববৃধে নিচয়ো মহান্
কর্তুং যস্য ন শক্যেত ক্ষয়ো বর্ষশতৈরপি
30.8
স্বকোশস্য পরীমাণং কোষ্ঠস্য চ মহীপতিঃ
বিজ্ঞায় রাজা কৌন্তেয়ো যজ্ঞায়ৈব মনো দধে
30.9
সুহৃদশ্চৈব তং সর্বে পৃথক্চ সহ চাব্রুবন্
যজ্ঞকালস্তব বিভো ক্রিয়তামত্র সাংপ্রতম্
30.10
অথৈবং ব্রুবতামেব তেষামভ্যায়য়ৌ হরিঃ
ঋষিঃ পুরাণো বেদাত্মা দৃশ্যশ্চাপি বিজানতাম্
30.11
জগতস্তস্থুষাং শ্রেষ্ঠঃ প্রভবশ্চাপ্যয়শ্চ হ
ভূতভব্যভবন্নাথঃ কেশবঃ কেশিসূদনঃ
30.12
প্রাকারঃ সর্ববৃষ্ণীনামাপত্স্বভয়দোঽরিহা
বলাধিকারে নিক্ষিপ্য সংহত্যানকদুন্দুভিম্
30.13
উচ্চাবচমুপাদায় ধর্মরাজায় মাধবঃ
ধনৌঘং পুরুষব্যাঘ্রো বলেন মহতা বৃতঃ
30.14
তং ধনৌঘমপর্যন্তং রত্নসাগরমক্ষয়ম্
নাদয়ন্রথঘোষেণ প্রবিবেশ পুরোত্তমম্
30.15
অসূর্যমিব সূর্যেণ নিবাতমিব বায়ুনা
কৃষ্ণেন সমুপেতেন জহৃষে ভারতং পুরম্
30.16
তং মুদাভিসমাগম্য সত্কৃত্য চ যথাবিধি
সংপৃষ্ট্বা কুশলং চৈব সুখাসীনং যুধিষ্ঠিরঃ
30.17
ধৌম্যদ্বৈপায়নমুখৈরৃত্বিগ্ভিঃ পুরুষর্ষভঃ
ভীমার্জুনয়মৈশ্চাপি সহিতঃ কৃষ্ণমব্রবীৎ
30.18
ত্বত্কৃতে পৃথিবী সর্বা মদ্বশে কৃষ্ণ বর্ততে
ধনং চ বহু বার্ষ্ণেয় ত্বত্প্রসাদাদুপার্জিতম্
30.19
সোঽহমিচ্ছামি তত্সর্বং বিধিবদ্দেবকীসুত
উপয়োক্তুং দ্বিজাগ্র্যেষু হব্যবাহে চ মাধব
30.20
তদহং যষ্টুমিচ্ছামি দাশার্হ সহিতস্ত্বয়া
অনুজৈশ্চ মহাবাহো তন্মানুজ্ঞাতুমর্হসি
30.21
স দীক্ষাপয় গোবিন্দ ত্বমাত্মানং মহাভুজ
ত্বয়ীষ্টবতি দাশার্হ বিপাপ্মা ভবিতা হ্যহম্
30.22
মাং বাপ্যভ্যনুজানীহি সহৈভিরনুজৈর্বিভো
অনুজ্ঞাতস্ত্বয়া কৃষ্ণ প্রাপ্নুয়াং ক্রতুমুত্তমম্
30.23
তং কৃষ্ণঃ প্রত্যুবাচেদং বহূক্ত্বা গুণবিস্তরম্
ত্বমেব রাজশার্দূল সম্রাডর্হো মহাক্রতুম্
সংপ্রাপ্নুহি ত্বয়া প্রাপ্তে কৃতকৃত্যাস্ততো বয়ম্
30.24
যজস্বাভীপ্সিতং যজ্ঞং ময়ি শ্রেয়স্যবস্থিতে
নিয়ুঙ্ক্ষ্ব চাপি মাং কৃত্যে সর্বং কর্তাস্মি তে বচঃ
30.25
যুধিষ্ঠির উবাচ
সফলঃ কৃষ্ণ সংকল্পঃ সিদ্ধিশ্চ নিয়তা মম
যস্য মে ত্বং হৃষীকেশ যথেপ্সিতমুপস্থিতঃ
30.26
বৈশংপায়ন উবাচ
অনুজ্ঞাতস্তু কৃষ্ণেন পাণ্ডবো ভ্রাতৃভিঃ সহ
ঈহিতুং রাজসূয়ায় সাধনান্যুপচক্রমে
30.27
তত আজ্ঞাপয়ামাস পাণ্ডবোঽরিনিবর্হণঃ
সহদেবং যুধাং শ্রেষ্ঠং মন্ত্রিণশ্চৈব সর্বশঃ
30.28
অস্মিন্ক্রতৌ যথোক্তানি যজ্ঞাঙ্গানি দ্বিজাতিভিঃ
তথোপকরণং সর্বং মঙ্গলানি চ সর্বশঃ
30.29
অধিয়জ্ঞাংশ্চ সংভারান্ধৌম্যোক্তান্ক্ষিপ্রমেব হি
সমানয়ন্তু পুরুষা যথায়োগং যথাক্রমম্
30.30
ইন্দ্রসেনো বিশোকশ্চ পূরুশ্চার্জুনসারথিঃ
অন্নাদ্যাহরণে যুক্তাঃ সন্তু মত্প্রিয়কাম্যয়া
30.31
সর্বকামাশ্চ কার্যন্তাং রসগন্ধসমন্বিতাঃ
মনোহরাঃ প্রীতিকরা দ্বিজানাং কুরুসত্তম
30.32
তদ্বাক্যসমকালং তু কৃতং সর্বমবেদয়ৎ
সহদেবো যুধাং শ্রেষ্ঠো ধর্মরাজে মহাত্মনি
30.33
ততো দ্বৈপায়নো রাজন্নৃত্বিজঃ সমুপানয়ৎ
বেদানিব মহাভাগান্সাক্ষান্মূর্তিমতো দ্বিজান্
30.34
স্বয়ং ব্রহ্মত্বমকরোত্তস্য সত্যবতীসুতঃ
ধনংজয়ানামৃষভঃ সুসামা সামগোঽভবৎ
30.35
যাজ্ঞবল্ক্যো বভূবাথ ব্রহ্মিষ্ঠোঽধ্বর্যুসত্তমঃ
পৈলো হোতা বসোঃ পুত্রো ধৌম্যেন সহিতোঽভবৎ
30.36
এতেষাং শিষ্যবর্গাশ্চ পুত্রাশ্চ ভরতর্ষভ
বভূবুর্হোত্রগাঃ সর্বে বেদবেদাঙ্গপারগাঃ
30.37
তে বাচয়িত্বা পুণ্যাহমীহয়িত্বা চ তং বিধিম্
শাস্ত্রোক্তং যোজয়ামাসুস্তদ্দেবয়জনং মহৎ
30.38
তত্র চক্রুরনুজ্ঞাতাঃ শরণান্যুত শিল্পিনঃ
রত্নবন্তি বিশালানি বেশ্মানীব দিবৌকসাম্
30.39
তত আজ্ঞাপয়ামাস স রাজা রাজসত্তমঃ
সহদেবং তদা সদ্যো মন্ত্রিণং কুরুসত্তমঃ
30.40
আমন্ত্রণার্থং দূতাংস্ত্বং প্রেষয়স্বাশুগান্দ্রুতম্
উপশ্রুত্য বচো রাজ্ঞঃ স দূতান্প্রাহিণোত্তদা
30.41
আমন্ত্রয়ধ্বং রাষ্ট্রেষু ব্রাহ্মণান্ভূমিপানপি
বিশশ্চ মান্যাঞ্শূদ্রাংশ্চ সর্বানানয়তেতি চ
30.42
তে সর্বান্পৃথিবীপালান্পাণ্ডবেয়স্য শাসনাৎ
আমন্ত্রয়াং বভূবুশ্চ প্রেষয়ামাস চাপরান্
30.43
ততস্তে তু যথাকালং কুন্তীপুত্রং যুধিষ্ঠিরম্
দীক্ষয়াং চক্রিরে বিপ্রা রাজসূয়ায় ভারত
30.44
দীক্ষিতঃ স তু ধর্মাত্মা ধর্মরাজো যুধিষ্ঠিরঃ
জগাম যজ্ঞায়তনং বৃতো বিপ্রৈঃ সহস্রশঃ
30.45
ভ্রাতৃভির্জ্ঞাতিভিশ্চৈব সুহৃদ্ভিঃ সচিবৈস্তথা
ক্ষত্রিয়ৈশ্চ মনুষ্যেন্দ্র নানাদেশসমাগতৈঃ
অমাত্যৈশ্চ নৃপশ্রেষ্ঠো ধর্মো বিগ্রহবানিব
30.46
আজগ্মুর্ব্রাহ্মণাস্তত্র বিষয়েভ্যস্ততস্ততঃ
সর্ববিদ্যাসু নিষ্ণাতা বেদবেদাঙ্গপারগাঃ
30.47
তেষামাবসথাংশ্চক্রুর্ধর্মরাজস্য শাসনাৎ
বহ্বন্নাঞ্শয়নৈর্যুক্তান্সগণানাং পৃথক্পৃথক্
সর্বর্তুগুণসংপন্নাঞ্শিল্পিনোঽথ সহস্রশঃ
30.48
তেষু তে ন্যবসন্রাজন্ব্রাহ্মণা ভৃশসত্কৃতাঃ
কথয়ন্তঃ কথা বহ্বীঃ পশ্যন্তো নটনর্তকান্
30.49
ভুঞ্জতাং চৈব বিপ্রাণাং বদতাং চ মহাস্বনঃ
অনিশং শ্রূয়তে স্মাত্র মুদিতানাং মহাত্মনাম্
30.50
দীয়তাং দীয়তামেষাং ভুজ্যতাং ভুজ্যতামিতি
এবংপ্রকারাঃ সংজল্পাঃ শ্রূয়ন্তে স্মাত্র নিত্যশঃ
30.51
গবাং শতসহস্রাণি শয়নানাং চ ভারত
রুক্মস্য যোষিতাং চৈব ধর্মরাজঃ পৃথগ্দদৌ
30.52
প্রাবর্ততৈবং যজ্ঞঃ স পাণ্ডবস্য মহাত্মনঃ
পৃথিব্যামেকবীরস্য শক্রস্যেব ত্রিবিষ্টপে
30.53
ততো যুধিষ্ঠিরো রাজা প্রেষয়ামাস পাণ্ডবম্
নকুলং হাস্তিনপুরং ভীষ্মায় ভরতর্ষভ
30.54
দ্রোণায় ধৃতরাষ্ট্রায় বিদুরায় কৃপায় চ
ভ্রাতৄণাং চৈব সর্বেষাং যেঽনুরক্তা যুধিষ্ঠিরে