Utshovঅধ্যায় 31
31.1
বৈশংপায়ন উবাচ
স গত্বা হাস্তিনপুরং নকুলঃ সমিতিংজয়ঃ
ভীষ্মমামন্ত্রয়ামাস ধৃতরাষ্ট্রং চ পাণ্ডবঃ
31.2
প্রয়য়ুঃ প্রীতমনসো যজ্ঞং ব্রহ্মপুরঃসরাঃ
সংশ্রুত্য ধর্মরাজস্য যজ্ঞং যজ্ঞবিদস্তদা
31.3
অন্যে চ শতশস্তুষ্টৈর্মনোভির্মনুজর্ষভ
দ্রষ্টুকামাঃ সভাং চৈব ধর্মরাজং চ পাণ্ডবম্
31.4
দিগ্ভ্যঃ সর্বে সমাপেতুঃ পার্থিবাস্তত্র ভারত
সমুপাদায় রত্নানি বিবিধানি মহান্তি চ
31.5
ধৃতরাষ্ট্রশ্চ ভীষ্মশ্চ বিদুরশ্চ মহামতিঃ
দুর্যোধনপুরোগাশ্চ ভ্রাতরঃ সর্ব এব তে
31.6
সত্কৃত্যামন্ত্রিতাঃ সর্বে আচার্যপ্রমুখা নৃপাঃ
গান্ধাররাজঃ সুবলঃ শকুনিশ্চ মহাবলঃ
31.7
অচলো বৃষকশ্চৈব কর্ণশ্চ রথিনাং বরঃ
ঋতঃ শল্যো মদ্ররাজো বাহ্লিকশ্চ মহারথঃ
31.8
সোমদত্তোঽথ কৌরব্যো ভূরির্ভূরিশ্রবাঃ শলঃ
অশ্বত্থামা কৃপো দ্রোণঃ সৈন্ধবশ্চ জয়দ্রথঃ
31.9
যজ্ঞসেনঃ সপুত্রশ্চ শাল্বশ্চ বসুধাধিপঃ
প্রাগ্জ্যোতিষশ্চ নৃপতির্ভগদত্তো মহায়শাঃ
31.10
সহ সর্বৈস্তথা ম্লেচ্ছৈঃ সাগরানূপবাসিভিঃ
পার্বতীয়াশ্চ রাজানো রাজা চৈব বৃহদ্বলঃ
31.11
পৌণ্ড্রকো বাসুদেবশ্চ বঙ্গঃ কালিঙ্গকস্তথা
আকর্ষঃ কুন্তলশ্চৈব বানবাস্যান্ধ্রকাস্তথা
31.12
দ্রবিডাঃ সিংহলাশ্চৈব রাজা কাশ্মীরকস্তথা
কুন্তিভোজো মহাতেজাঃ সুহ্মশ্চ সুমহাবলঃ
31.13
বাহ্লিকাশ্চাপরে শূরা রাজানঃ সর্ব এব তে
বিরাটঃ সহ পুত্রৈশ্চ মাচেল্লশ্চ মহারথঃ
রাজানো রাজপুত্রাশ্চ নানাজনপদেশ্বরাঃ
31.14
শিশুপালো মহাবীর্যঃ সহ পুত্রেণ ভারত
আগচ্ছত্পাণ্ডবেয়স্য যজ্ঞং সংগ্রামদুর্মদঃ
31.15
রামশ্চৈবানিরুদ্ধশ্চ বভ্রুশ্চ সহসারণঃ
গদপ্রদ্যুম্নসাম্বাশ্চ চারুদেষ্ণশ্চ বীর্যবান্
31.16
উল্মুকো নিশঠশ্চৈব বীরঃ প্রাদ্যুম্নিরেব চ
বৃষ্ণয়ো নিখিলেনান্যে সমাজগ্মুর্মহারথাঃ
31.17
এতে চান্যে চ বহবো রাজানো মধ্যদেশজাঃ
আজগ্মুঃ পাণ্ডুপুত্রস্য রাজসূয়ং মহাক্রতুম্
31.18
দদুস্তেষামাবসথান্ধর্মরাজস্য শাসনাৎ
বহুকক্ষ্যান্বিতান্রাজন্দীর্ঘিকাবৃক্ষশোভিতান্
31.19
তথা ধর্মাত্মজস্তেষাং চক্রে পূজামনুত্তমাম্
সত্কৃতাশ্চ যথোদ্দিষ্টাঞ্জগ্মুরাবসথান্নৃপাঃ
31.20
কৈলাসশিখরপ্রখ্যান্মনোজ্ঞান্দ্রব্যভূষিতান্
সর্বতঃ সংবৃতানুচ্চৈঃ প্রাকারৈঃ সুকৃতৈঃ সিতৈঃ
31.21
সুবর্ণজালসংবীতান্মণিকুট্টিমশোভিতান্
সুখারোহণসোপানান্মহাসনপরিচ্ছদান্
31.22
স্রগ্দামসমবচ্ছন্নানুত্তমাগুরুগন্ধিনঃ
হংসাংশুবর্ণসদৃশানায়োজনসুদর্শনান্
31.23
অসংবাধান্সমদ্বারান্যুতানুচ্চাবচৈর্গুণৈঃ
বহুধাতুপিনদ্ধাঙ্গান্হিমবচ্ছিখরানিব
31.24
বিশ্রান্তাস্তে ততোঽপশ্যন্ভূমিপা ভূরিদক্ষিণম্
বৃতং সদস্যৈর্বহুভির্ধর্মরাজং যুধিষ্ঠিরম্
31.25
তত্সদঃ পার্থিবৈঃ কীর্ণং ব্রাহ্মণৈশ্চ মহাত্মভিঃ
ভ্রাজতে স্ম তদা রাজন্নাকপৃষ্ঠমিবামরৈঃ