অধ্যায় 32

32.1

বৈশংপায়ন উবাচ
পিতামহং গুরুং চৈব প্রত্যুদ্গম্য যুধিষ্ঠিরঃ
অভিবাদ্য ততো রাজন্নিদং বচনমব্রবীৎ
ভীষ্মং দ্রোণং কৃপং দ্রৌণিং দুর্যোধনবিবিংশতী

অস্মিন্যজ্ঞে ভবন্তো মামনুগৃহ্ণন্তু সর্বশঃ
ইদং বঃ স্বমহং চৈব যদিহাস্তি ধনং মম
প্রীণয়ন্তু ভবন্তো মাং যথেষ্টমনিয়ন্ত্রিতাঃ

এবমুক্ত্বা স তান্সর্বান্দীক্ষিতঃ পাণ্ডবাগ্রজঃ
যুয়োজ হ যথায়োগমধিকারেষ্বনন্তরম্

ভক্ষ্যভোজ্যাধিকারেষু দুঃশাসনময়োজয়ৎ
পরিগ্রহে ব্রাহ্মণানামশ্বত্থামানমুক্তবান্

রাজ্ঞাং তু প্রতিপূজার্থং সংজয়ং সংন্যয়োজয়ৎ
কৃতাকৃতপরিজ্ঞানে ভীষ্মদ্রোণৌ মহামতী

হিরণ্যস্য সুবর্ণস্য রত্নানাং চান্ববেক্ষণে
দক্ষিণানাং চ বৈ দানে কৃপং রাজা ন্যয়োজয়ৎ
তথান্যান্পুরুষব্যাঘ্রাংস্তস্মিংস্তস্মিন্ন্যয়োজয়ৎ

বাহ্লিকো ধৃতরাষ্ট্রশ্চ সোমদত্তো জয়দ্রথঃ
নকুলেন সমানীতাঃ স্বামিবত্তত্র রেমিরে

ক্ষত্তা ব্যয়করস্ত্বাসীদ্বিদুরঃ সর্বধর্মবিৎ
দুর্যোধনস্ত্বর্হণানি প্রতিজগ্রাহ সর্বশঃ

সর্বলোকঃ সমাবৃত্তঃ পিপ্রীষুঃ ফলমুত্তমম্
দ্রষ্টুকামঃ সভাং চৈব ধর্মরাজং চ পাণ্ডবম্

ন কশ্চিদাহরত্তত্র সহস্রাবরমর্হণম্
রত্নৈশ্চ বহুভিস্তত্র ধর্মরাজমবর্ধয়ন্

কথং নু মম কৌরব্যো রত্নদানৈঃ সমাপ্নুয়াৎ
যজ্ঞমিত্যেব রাজানঃ স্পর্ধমানা দদুর্ধনম্

ভবনৈঃ সবিমানাগ্রৈঃ সোদর্কৈর্বলসংবৃতৈঃ
লোকরাজবিমানৈশ্চ ব্রাহ্মণাবসথৈঃ সহ

কৃতৈরাবসথৈর্দিব্যৈর্বিমানপ্রতিমৈস্তথা
বিচিত্রৈ রত্নবদ্ভিশ্চ ঋদ্ধ্যা পরময়া যুতৈঃ

রাজভিশ্চ সমাবৃত্তৈরতীবশ্রীসমৃদ্ধিভিঃ
অশোভত সদো রাজন্কৌন্তেয়স্য মহাত্মনঃ

ঋদ্ধ্যা চ বরুণং দেবং স্পর্ধমানো যুধিষ্ঠিরঃ
ষডগ্নিনাথ যজ্ঞেন সোঽয়জদ্দক্ষিণাবতা
সর্বাঞ্জনান্সর্বকামৈঃ সমৃদ্ধৈঃ সমতর্পয়ৎ

অন্নবান্বহুভক্ষ্যশ্চ ভুক্তবজ্জনসংবৃতঃ
রত্নোপহারকর্মণ্যো বভূব স সমাগমঃ

ইডাজ্যহোমাহুতিভির্মন্ত্রশিক্ষাসমন্বিতৈঃ
তস্মিন্হি ততৃপুর্দেবাস্ততে যজ্ঞে মহর্ষিভিঃ

যথা দেবাস্তথা বিপ্রা দক্ষিণান্নমহাধনৈঃ
ততৃপুঃ সর্ববর্ণাশ্চ তস্মিন্যজ্ঞে মুদান্বিতাঃ