Utshovঅধ্যায় 33
33.1
বৈশংপায়ন উবাচ
ততোঽভিষেচনীয়েঽহ্নি ব্রাহ্মণা রাজভিঃ সহ
অন্তর্বেদীং প্রবিবিশুঃ সত্কারার্থং মহর্ষয়ঃ
33.2
নারদপ্রমুখাস্তস্যামন্তর্বেদ্যাং মহাত্মনঃ
সমাসীনাঃ শুশুভিরে সহ রাজর্ষিভিস্তদা
33.3
সমেতা ব্রহ্মভবনে দেবা দেবর্ষয়ো যথা
কর্মান্তরমুপাসন্তো জজল্পুরমিতৌজসঃ
33.4
ইদমেবং ন চাপ্যেবমেবমেতন্ন চান্যথা
ইত্যূচুর্বহবস্তত্র বিতণ্ডানাঃ পরস্পরম্
33.5
কৃশানর্থাংস্তথা কেচিদকৃশাংস্তত্র কুর্বতে
অকৃশাংশ্চ কৃশাংশ্চক্রুর্হেতুভিঃ শাস্ত্রনিশ্চিতৈঃ
33.6
তত্র মেধাবিনঃ কেচিদর্থমন্যৈঃ প্রপূরিতম্
বিচিক্ষিপুর্যথা শ্যেনা নভোগতমিবামিষম্
33.7
কেচিদ্ধর্মার্থসংয়ুক্তাঃ কথাস্তত্র মহাব্রতাঃ
রেমিরে কথয়ন্তশ্চ সর্ববেদবিদাং বরাঃ
33.8
সা বেদির্বেদসংপন্নৈর্দেবদ্বিজমহর্ষিভিঃ
আবভাসে সমাকীর্ণা নক্ষত্রৈর্দ্যৌরিবামলা
33.9
ন তস্যাং সংনিধৌ শূদ্রঃ কশ্চিদাসীন্ন চাব্রতঃ
অন্তর্বেদ্যাং তদা রাজন্যুধিষ্ঠিরনিবেশনে
33.10
তাং তু লক্ষ্মীবতো লক্ষ্মীং তদা যজ্ঞবিধানজাম্
তুতোষ নারদঃ পশ্যন্ধর্মরাজস্য ধীমতঃ
33.11
অথ চিন্তাং সমাপেদে স মুনির্মনুজাধিপ
নারদস্তং তদা পশ্যন্সর্বক্ষত্রসমাগমম্
33.12
সস্মার চ পুরাবৃত্তাং কথাং তাং ভরতর্ষভ
অংশাবতরণে যাসৌ ব্রহ্মণো ভবনেঽভবৎ
33.13
দেবানাং সংগমং তং তু বিজ্ঞায় কুরুনন্দন
নারদঃ পুণ্ডরীকাক্ষং সস্মার মনসা হরিম্
33.14
সাক্ষাত্স বিবুধারিঘ্নঃ ক্ষত্রে নারায়ণো বিভুঃ
প্রতিজ্ঞাং পালয়ন্ধীমাঞ্জাতঃ পরপুরংজয়ঃ
33.15
সংদিদেশ পুরা যোঽসৌ বিবুধান্ভূতকৃত্স্বয়ম্
অন্যোন্যমভিনিঘ্নন্তঃ পুনর্লোকানবাপ্স্যথ
33.16
ইতি নারায়ণঃ শংভুর্ভগবাঞ্জগতঃ প্রভুঃ
আদিশ্য বিবুধান্সর্বানজায়ত যদুক্ষয়ে
33.17
ক্ষিতাবন্ধকবৃষ্ণীনাং বংশে বংশভৃতাং বরঃ
পরয়া শুশুভে লক্ষ্ম্যা নক্ষত্রাণামিবোডুরাট্
33.18
যস্য বাহুবলং সেন্দ্রাঃ সুরাঃ সর্ব উপাসতে
সোঽয়ং মানুষবন্নাম হরিরাস্তেঽরিমর্দনঃ
33.19
অহো বত মহদ্ভূতং স্বয়ংভূর্যদিদং স্বয়ম্
আদাস্যতি পুনঃ ক্ষত্রমেবং বলসমন্বিতম্
33.20
ইত্যেতাং নারদশ্চিন্তাং চিন্তয়ামাস ধর্মবিৎ
হরিং নারায়ণং জ্ঞাত্বা যজ্ঞৈরীড্যং তমীশ্বরম্
33.21
তস্মিন্ধর্মবিদাং শ্রেষ্ঠো ধর্মরাজস্য ধীমতঃ
মহাধ্বরে মহাবুদ্ধিস্তস্থৌ স বহুমানতঃ
33.22
ততো ভীষ্মোঽব্রবীদ্রাজন্ধর্মরাজং যুধিষ্ঠিরম্
ক্রিয়তামর্হণং রাজ্ঞাং যথার্হমিতি ভারত
33.23
আচার্যমৃত্বিজং চৈব সংয়ুক্তং চ যুধিষ্ঠির
স্নাতকং চ প্রিয়ং চাহুঃ ষডর্ঘ্যার্হান্নৃপং তথা
33.24
এতানর্হানভিগতানাহুঃ সংবত্সরোষিতান্
ত ইমে কালপূগস্য মহতোঽস্মানুপাগতাঃ
33.25
এষামেকৈকশো রাজন্নর্ঘ্যমানীয়তামিতি
অথ চৈষাং বরিষ্ঠায় সমর্থায়োপনীয়তাম্
33.26
যুধিষ্ঠির উবাচ
কস্মৈ ভবান্মন্যতেঽর্ঘমেকস্মৈ কুরুনন্দন
উপনীয়মানং যুক্তং চ তন্মে ব্রূহি পিতামহ
33.27
বৈশংপায়ন উবাচ
ততো ভীষ্মঃ শাংতনবো বুদ্ধ্যা নিশ্চিত্য ভারত
বার্ষ্ণেয়ং মন্যতে কৃষ্ণমর্হণীয়তমং ভুবি
33.28
এষ হ্যেষাং সমেতানাং তেজোবলপরাক্রমৈঃ
মধ্যে তপন্নিবাভাতি জ্যোতিষামিব ভাস্করঃ
33.29
অসূর্যমিব সূর্যেণ নিবাতমিব বায়ুনা
ভাসিতং হ্লাদিতং চৈব কৃষ্ণেনেদং সদো হি নঃ
33.30
তস্মৈ ভীষ্মাভ্যনুজ্ঞাতঃ সহদেবঃ প্রতাপবান্
উপজহ্রেঽথ বিধিবদ্বার্ষ্ণেয়ায়ার্ঘ্যমুত্তমম্
33.31
প্রতিজগ্রাহ তত্কৃষ্ণঃ শাস্ত্রদৃষ্টেন কর্মণা
শিশুপালস্তু তাং পূজাং বাসুদেবে ন চক্ষমে
33.32
স উপালভ্য ভীষ্মং চ ধর্মরাজং চ সংসদি
অপাক্ষিপদ্বাসুদেবং চেদিরাজো মহাবলঃ