অধ্যায় 34

34.1

শিশুপাল উবাচ
নায়মর্হতি বার্ষ্ণেয়স্তিষ্ঠত্স্বিহ মহাত্মসু
মহীপতিষু কৌরব্য রাজবত্পার্থিবার্হণম্

নায়ং যুক্তঃ সমাচারঃ পাণ্ডবেষু মহাত্মসু
যত্কামাত্পুণ্ডরীকাক্ষং পাণ্ডবার্চিতবানসি

বালা যূয়ং ন জানীধ্বং ধর্মঃ সূক্ষ্মো হি পাণ্ডবাঃ
অয়ং তত্রাভ্যতিক্রান্ত আপগেয়োঽল্পদর্শনঃ

ত্বাদৃশো ধর্ময়ুক্তো হি কুর্বাণঃ প্রিয়কাম্যয়া
ভবত্যভ্যধিকং ভীষ্মো লোকেষ্ববমতঃ সতাম্

কথং হ্যরাজা দাশার্হো মধ্যে সর্বমহীক্ষিতাম্
অর্হণামর্হতি তথা যথা যুষ্মাভিরর্চিতঃ

অথ বা মন্যসে কৃষ্ণং স্থবিরং ভরতর্ষভ
বসুদেবে স্থিতে বৃদ্ধে কথমর্হতি তত্সুতঃ

অথ বা বাসুদেবোঽপি প্রিয়কামোঽনুবৃত্তবান্
দ্রুপদে তিষ্ঠতি কথং মাধবোঽর্হতি পূজনম্

আচার্যং মন্যসে কৃষ্ণমথ বা কুরুপুংগব
দ্রোণে তিষ্ঠতি বার্ষ্ণেয়ং কস্মাদর্চিতবানসি

ঋত্বিজং মন্যসে কৃষ্ণমথ বা কুরুনন্দন
দ্বৈপায়নে স্থিতে বিপ্রে কথং কৃষ্ণোঽর্চিতস্ত্বয়া

নৈব ঋত্বিঙ্ন চাচার্যো ন রাজা মধুসূদনঃ
অর্চিতশ্চ কুরুশ্রেষ্ঠ কিমন্যত্প্রিয়কাম্যয়া

অথ বাপ্যর্চনীয়োঽয়ং যুষ্মাকং মধুসূদনঃ
কিং রাজভিরিহানীতৈরবমানায় ভারত

বয়ং তু ন ভয়াদস্য কৌন্তেয়স্য মহাত্মনঃ
প্রয়চ্ছামঃ করান্সর্বে ন লোভান্ন চ সান্ত্বনাৎ

অস্য ধর্মপ্রবৃত্তস্য পার্থিবত্বং চিকীর্ষতঃ
করানস্মৈ প্রয়চ্ছামঃ সোঽয়মস্মান্ন মন্যতে

কিমন্যদবমানাদ্ধি যদিমং রাজসংসদি
অপ্রাপ্তলক্ষণং কৃষ্ণমর্ঘ্যেণার্চিতবানসি

অকস্মাদ্ধর্মপুত্রস্য ধর্মাত্মেতি যশো গতম্
কো হি ধর্মচ্যুতে পূজামেবং যুক্তাং প্রয়োজয়েৎ
যোঽয়ং বৃষ্ণিকুলে জাতো রাজানং হতবান্পুরা

অদ্য ধর্মাত্মতা চৈব ব্যপকৃষ্টা যুধিষ্ঠিরাৎ
কৃপণত্বং নিবিষ্টং চ কৃষ্ণেঽর্ঘ্যস্য নিবেদনাৎ

যদি ভীতাশ্চ কৌন্তেয়াঃ কৃপণাশ্চ তপস্বিনঃ
ননু ত্বয়াপি বোদ্ধব্যং যাং পূজাং মাধবোঽর্হতি

অথ বা কৃপণৈরেতামুপনীতাং জনার্দন
পূজামনর্হঃ কস্মাত্ত্বমভ্যনুজ্ঞাতবানসি

অয়ুক্তামাত্মনঃ পূজাং ত্বং পুনর্বহু মন্যসে
হবিষঃ প্রাপ্য নিষ্যন্দং প্রাশিতুং শ্বেব নির্জনে

ন ত্বয়ং পার্থিবেন্দ্রাণামবমানঃ প্রয়ুজ্যতে
ত্বামেব কুরবো ব্যক্তং প্রলম্ভন্তে জনার্দন

ক্লীবে দারক্রিয়া যাদৃগন্ধে বা রূপদর্শনম্
অরাজ্ঞো রাজবত্পূজা তথা তে মধুসূদন

দৃষ্টো যুধিষ্ঠিরো রাজা দৃষ্টো ভীষ্মশ্চ যাদৃশঃ
বাসুদেবোঽপ্যয়ং দৃষ্টঃ সর্বমেতদ্যথাতথম্

ইত্যুক্ত্বা শিশুপালস্তানুত্থায় পরমাসনাৎ
নির্যয়ৌ সদসস্তস্মাত্সহিতো রাজভিস্তদা