UtshovChapter 34
34.1
शिशुपाल उवाच
नायमर्हति वार्ष्णेयस्तिष्ठत्स्विह महात्मसु
महीपतिषु कौरव्य राजवत्पार्थिवार्हणम्
Shishupala uvacha
Nayamarhati varshneyastishthatsviha mahatmasu
Mahipatishu kauravya rajavatparthivarhanam
34.2
नायं युक्तः समाचारः पाण्डवेषु महात्मसु
यत्कामात्पुण्डरीकाक्षं पाण्डवार्चितवानसि
Nayam yuktah samacharah pandaveshu mahatmasu
Yatkamatpundarikaksham pandavarchitavanasi
34.3
बाला यूयं न जानीध्वं धर्मः सूक्ष्मो हि पाण्डवाः
अयं तत्राभ्यतिक्रान्त आपगेयोऽल्पदर्शनः
Bala yuyam na janidhvam dharmah sukshmo hi pandavah
Ayam tatrabhyatikranta apageyolpadarshanah
34.4
त्वादृशो धर्मयुक्तो हि कुर्वाणः प्रियकाम्यया
भवत्यभ्यधिकं भीष्मो लोकेष्ववमतः सताम्
Tvadrisho dharmayukto hi kurvanah priyakamyaya
Bhavatyabhyadhikam bhishmo lokeshvavamatah satam
34.5
कथं ह्यराजा दाशार्हो मध्ये सर्वमहीक्षिताम्
अर्हणामर्हति तथा यथा युष्माभिरर्चितः
Katham hyaraja dasharho madhye sarvamahikshitam
Arhanamarhati tatha yatha yushmabhirarchitah
34.6
अथ वा मन्यसे कृष्णं स्थविरं भरतर्षभ
वसुदेवे स्थिते वृद्धे कथमर्हति तत्सुतः
Atha va manyase krishnam sthaviram bharatarshabha
Vasudeve sthite vriddhe kathamarhati tatsutah
34.7
अथ वा वासुदेवोऽपि प्रियकामोऽनुवृत्तवान्
द्रुपदे तिष्ठति कथं माधवोऽर्हति पूजनम्
Atha va vasudevopi priyakamonuvrittavan
Drupade tishthati katham madhavorhati pujanam
34.8
आचार्यं मन्यसे कृष्णमथ वा कुरुपुंगव
द्रोणे तिष्ठति वार्ष्णेयं कस्मादर्चितवानसि
Acharyam manyase krishnamatha va kurupungava
Drone tishthati varshneyam kasmadarchitavanasi
34.9
ऋत्विजं मन्यसे कृष्णमथ वा कुरुनन्दन
द्वैपायने स्थिते विप्रे कथं कृष्णोऽर्चितस्त्वया
Ritvijam manyase krishnamatha va kurunandana
Dvaipayane sthite vipre katham krishnorchitastvaya
34.10
नैव ऋत्विङ्न चाचार्यो न राजा मधुसूदनः
अर्चितश्च कुरुश्रेष्ठ किमन्यत्प्रियकाम्यया
Naiva ritvinna chacharyo na raja madhusudanah
Architashcha kurushreshtha kimanyatpriyakamyaya
34.11
अथ वाप्यर्चनीयोऽयं युष्माकं मधुसूदनः
किं राजभिरिहानीतैरवमानाय भारत
Atha vapyarchaniyoyam yushmakam madhusudanah
Kim rajabhirihanitairavamanaya bharata
34.12
वयं तु न भयादस्य कौन्तेयस्य महात्मनः
प्रयच्छामः करान्सर्वे न लोभान्न च सान्त्वनात्
Vayam tu na bhayadasya kaunteyasya mahatmanah
Prayachchhamah karansarve na lobhanna cha santvanat
34.13
अस्य धर्मप्रवृत्तस्य पार्थिवत्वं चिकीर्षतः
करानस्मै प्रयच्छामः सोऽयमस्मान्न मन्यते
Asya dharmapravrittasya parthivatvam chikirshatah
Karanasmai prayachchhamah soyamasmanna manyate
34.14
किमन्यदवमानाद्धि यदिमं राजसंसदि
अप्राप्तलक्षणं कृष्णमर्घ्येणार्चितवानसि
Kimanyadavamanaddhi yadimam rajasansadi
Apraptalakshanam krishnamarghyenarchitavanasi
34.15
अकस्माद्धर्मपुत्रस्य धर्मात्मेति यशो गतम्
को हि धर्मच्युते पूजामेवं युक्तां प्रयोजयेत्
योऽयं वृष्णिकुले जातो राजानं हतवान्पुरा
Akasmaddharmaputrasya dharmatmeti yasho gatam
Ko hi dharmachyute pujamevam yuktam prayojayet
Yoyam vrishnikule jato rajanam hatavanpura
34.16
अद्य धर्मात्मता चैव व्यपकृष्टा युधिष्ठिरात्
कृपणत्वं निविष्टं च कृष्णेऽर्घ्यस्य निवेदनात्
Adya dharmatmata chaiva vyapakrishta yudhishthirat
Kripanatvam nivishtam cha krishnerghyasya nivedanat
34.17
यदि भीताश्च कौन्तेयाः कृपणाश्च तपस्विनः
ननु त्वयापि बोद्धव्यं यां पूजां माधवोऽर्हति
Yadi bhitashcha kaunteyah kripanashcha tapasvinah
Nanu tvayapi boddhavyam yam pujam madhavorhati
34.18
अथ वा कृपणैरेतामुपनीतां जनार्दन
पूजामनर्हः कस्मात्त्वमभ्यनुज्ञातवानसि
Atha va kripanairetamupanitam janardana
Pujamanarhah kasmattvamabhyanugyatavanasi
34.19
अयुक्तामात्मनः पूजां त्वं पुनर्बहु मन्यसे
हविषः प्राप्य निष्यन्दं प्राशितुं श्वेव निर्जने
Ayuktamatmanah pujam tvam punarbahu manyase
Havishah prapya nishyandam prashitum shveva nirjane
34.20
न त्वयं पार्थिवेन्द्राणामवमानः प्रयुज्यते
त्वामेव कुरवो व्यक्तं प्रलम्भन्ते जनार्दन
Na tvayam parthivendranamavamanah prayujyate
Tvameva kuravo vyaktam pralambhante janardana
34.21
क्लीबे दारक्रिया यादृगन्धे वा रूपदर्शनम्
अराज्ञो राजवत्पूजा तथा ते मधुसूदन
Klibe darakriya yadrigandhe va rupadarshanam
Aragyo rajavatpuja tatha te madhusudana
34.22
दृष्टो युधिष्ठिरो राजा दृष्टो भीष्मश्च यादृशः
वासुदेवोऽप्ययं दृष्टः सर्वमेतद्यथातथम्
Drishto yudhishthiro raja drishto bhishmashcha yadrishah
Vasudevopyayam drishtah sarvametadyathatatham
34.23
इत्युक्त्वा शिशुपालस्तानुत्थाय परमासनात्
निर्ययौ सदसस्तस्मात्सहितो राजभिस्तदा
Ityuktva shishupalastanutthaya paramasanat
Niryayau sadasastasmatsahito rajabhistada