অধ্যায় 35

35.1

বৈশংপায়ন উবাচ
ততো যুধিষ্ঠিরো রাজা শিশুপালমুপাদ্রবৎ
উবাচ চৈনং মধুরং সান্ত্বপূর্বমিদং বচঃ

35.2

নেদং যুক্তং মহীপাল যাদৃশং বৈ ত্বমুক্তবান্
অধর্মশ্চ পরো রাজন্পারুষ্যং চ নিরর্থকম্

35.3

ন হি ধর্মং পরং জাতু নাববুধ্যেত পার্থিব
ভীষ্মঃ শাংতনবস্ত্বেনং মাবমংস্থা অতোঽন্যথা

35.4

পশ্য চেমান্মহীপালাংস্ত্বত্তো বৃদ্ধতমান্বহূন্
মৃষ্যন্তে চার্হণাং কৃষ্ণে তদ্বত্ত্বং ক্ষন্তুমর্হসি

35.5

বেদ তত্ত্বেন কৃষ্ণং হি ভীষ্মশ্চেদিপতে ভৃশম্
ন হ্যেনং ত্বং তথা বেত্থ যথৈনং বেদ কৌরবঃ

35.6

ভীষ্ম উবাচ
নাস্মা অনুনয়ো দেয়ো নায়মর্হতি সান্ত্বনম্
লোকবৃদ্ধতমে কৃষ্ণে যোঽর্হণাং নানুমন্যতে

35.7

ক্ষত্রিয়ঃ ক্ষত্রিয়ং জিত্বা রণে রণকৃতাং বরঃ
যো মুঞ্চতি বশে কৃত্বা গুরুর্ভবতি তস্য সঃ

35.8

অস্যাং চ সমিতৌ রাজ্ঞামেকমপ্যজিতং যুধি
ন পশ্যামি মহীপালং সাত্বতীপুত্রতেজসা

35.9

ন হি কেবলমস্মাকময়মর্চ্যতমোঽচ্যুতঃ
ত্রয়াণামপি লোকানামর্চনীয়ো জনার্দনঃ

35.10

কৃষ্ণেন হি জিতা যুদ্ধে বহবঃ ক্ষত্রিয়র্ষভাঃ
জগত্সর্বং চ বার্ষ্ণেয়ে নিখিলেন প্রতিষ্ঠিতম্

35.11

তস্মাত্সত্স্বপি বৃদ্ধেষু কৃষ্ণমর্চাম নেতরান্
এবং বক্তুং ন চার্হস্ত্বং মা ভূত্তে বুদ্ধিরীদৃশী

35.12

জ্ঞানবৃদ্ধা ময়া রাজন্বহবঃ পর্যুপাসিতাঃ
তেষাং কথয়তাং শৌরেরহং গুণবতো গুণান্
সমাগতানামশ্রৌষং বহূন্বহুমতান্সতাম্

35.13

কর্মাণ্যপি চ যান্যস্য জন্মপ্রভৃতি ধীমতঃ
বহুশঃ কথ্যমানানি নরৈর্ভূয়ঃ শ্রুতানি মে

35.14

ন কেবলং বয়ং কামাচ্চেদিরাজ জনার্দনম্
ন সংবন্ধং পুরস্কৃত্য কৃতার্থং বা কথংচন

35.15

অর্চামহেঽর্চিতং সদ্ভির্ভুবি ভৌমসুখাবহম্
যশঃ শৌর্যং জয়ং চাস্য বিজ্ঞায়ার্চাং প্রয়ুজ্মহে

35.16

ন হি কশ্চিদিহাস্মাভিঃ সুবালোঽপ্যপরীক্ষিতঃ
গুণৈর্বৃদ্ধানতিক্রম্য হরিরর্চ্যতমো মতঃ

35.17

জ্ঞানবৃদ্ধো দ্বিজাতীনাং ক্ষত্রিয়াণাং বলাধিকঃ
পূজ্যে তাবিহ গোবিন্দে হেতূ দ্বাবপি সংস্থিতৌ

35.18

বেদবেদাঙ্গবিজ্ঞানং বলং চাপ্যমিতং তথা
নৃণাং হি লোকে কস্যাস্তি বিশিষ্টং কেশবাদৃতে

35.19

দানং দাক্ষ্যং শ্রুতং শৌর্যং হ্রীঃ কীর্তির্বুদ্ধিরুত্তমা
সংনতিঃ শ্রীর্ধৃতিস্তুষ্টিঃ পুষ্টিশ্চ নিয়তাচ্যুতে

35.20

তমিমং সর্বসংপন্নমাচার্যং পিতরং গুরুম্
অর্চ্যমর্চিতমর্চার্হং সর্বে সংমন্তুমর্হথ

35.21

ঋত্বিগ্গুরুর্বিবাহ্যশ্চ স্নাতকো নৃপতিঃ প্রিয়ঃ
সর্বমেতদ্ধৃষীকেশে তস্মাদভ্যর্চিতোঽচ্যুতঃ

35.22

কৃষ্ণ এব হি লোকানামুত্পত্তিরপি চাপ্যয়ঃ
কৃষ্ণস্য হি কৃতে ভূতমিদং বিশ্বং সমর্পিতম্

35.23

এষ প্রকৃতিরব্যক্তা কর্তা চৈব সনাতনঃ
পরশ্চ সর্বভূতেভ্যস্তস্মাদ্বৃদ্ধতমোঽচ্যুতঃ

35.24

বুদ্ধির্মনো মহান্বায়ুস্তেজোঽম্ভঃ খং মহী চ যা
চতুর্বিধং চ যদ্ভূতং সর্বং কৃষ্ণে প্রতিষ্ঠিতম্

35.25

আদিত্যশ্চন্দ্রমাশ্চৈব নক্ষত্রাণি গ্রহাশ্চ যে
দিশশ্চোপদিশশ্চৈব সর্বং কৃষ্ণে প্রতিষ্ঠিতম্

35.26

অয়ং তু পুরুষো বালঃ শিশুপালো ন বুধ্যতে
সর্বত্র সর্বদা কৃষ্ণং তস্মাদেবং প্রভাষতে

35.27

যো হি ধর্মং বিচিনুয়াদুত্কৃষ্টং মতিমান্নরঃ
স বৈ পশ্যেদ্যথাধর্মং ন তথা চেদিরাডয়ম্

35.28

সবৃদ্ধবালেষ্বথ বা পার্থিবেষু মহাত্মসু
কো নার্হং মন্যতে কৃষ্ণং কো বাপ্যেনং ন পূজয়েৎ

35.29

অথেমাং দুষ্কৃতাং পূজাং শিশুপালো ব্যবস্যতি
দুষ্কৃতায়াং যথান্যায়ং তথায়ং কর্তুমর্হতি

Contains text from DharmicData, made available under the Open Database License (ODbL). Simple meanings are written by AI and can contain mistakes.