অধ্যায় 36

36.1

বৈশংপায়ন উবাচ
এবমুক্ত্বা ততো ভীষ্মো বিররাম মহায়শাঃ
ব্যাজহারোত্তরং তত্র সহদেবোঽর্থবদ্বচঃ

কেশবং কেশিহন্তারমপ্রমেয়পরাক্রমম্
পূজ্যমানং ময়া যো বঃ কৃষ্ণং ন সহতে নৃপাঃ

সর্বেষাং বলিনাং মূর্ধ্নি ময়েদং নিহিতং পদম্
এবমুক্তে ময়া সম্যগুত্তরং প্রব্রবীতু সঃ

মতিমন্তস্তু যে কেচিদাচার্যং পিতরং গুরুম্
অর্চ্যমর্চিতমর্চার্হমনুজানন্তু তে নৃপাঃ

ততো ন ব্যাজহারৈষাং কশ্চিদ্বুদ্ধিমতাং সতাম্
মানিনাং বলিনাং রাজ্ঞাং মধ্যে সংদর্শিতে পদে

ততোঽপতত্পুষ্পবৃষ্টিঃ সহদেবস্য মূর্ধনি
অদৃশ্যরূপা বাচশ্চাপ্যব্রুবন্সাধু সাধ্বিতি

আবিধ্যদজিনং কৃষ্ণং ভবিষ্যদ্ভূতজল্পকঃ
সর্বসংশয়নির্মোক্তা নারদঃ সর্বলোকবিৎ

তত্রাহূতাগতাঃ সর্বে সুনীথপ্রমুখা গণাঃ
সংপ্রাদৃশ্যন্ত সংক্রুদ্ধা বিবর্ণবদনাস্তথা

যুধিষ্ঠিরাভিষেকং চ বাসুদেবস্য চার্হণম্
অব্রুবংস্তত্র রাজানো নির্বেদাদাত্মনিশ্চয়াৎ

সুহৃদ্ভির্বার্যমাণানাং তেষাং হি বপুরাবভৌ
আমিষাদপকৃষ্টানাং সিংহানামিব গর্জতাম্

তং বলৌঘমপর্যন্তং রাজসাগরমক্ষয়ম্
কুর্বাণং সময়ং কৃষ্ণো যুদ্ধায় বুবুধে তদা

পূজয়িত্বা তু পূজার্হং ব্রহ্মক্ষত্রং বিশেষতঃ
সহদেবো নৃণাং দেবঃ সমাপয়ত কর্ম তৎ

তস্মিন্নভ্যর্চিতে কৃষ্ণে সুনীথঃ শত্রুকর্ষণঃ
অতিতাম্রেক্ষণঃ কোপাদুবাচ মনুজাধিপান্

স্থিতঃ সেনাপতির্বোঽহং মন্যধ্বং কিং নু সাংপ্রতম্
যুধি তিষ্ঠাম সংনহ্য সমেতান্বৃষ্ণিপাণ্ডবান্

ইতি সর্বান্সমুত্সাহ্য রাজ্ঞস্তাংশ্চেদিপুংগবঃ
যজ্ঞোপঘাতায় ততঃ সোঽমন্ত্রয়ত রাজভিঃ