UtshovChapter 36
36.1
वैशंपायन उवाच
एवमुक्त्वा ततो भीष्मो विरराम महायशाः
व्याजहारोत्तरं तत्र सहदेवोऽर्थवद्वचः
Vaishampayana uvacha
Evamuktva tato bhishmo virarama mahayashah
Vyajaharottaram tatra sahadevorthavadvachah
36.2
केशवं केशिहन्तारमप्रमेयपराक्रमम्
पूज्यमानं मया यो वः कृष्णं न सहते नृपाः
Keshavam keshihantaramaprameyaparakramam
Pujyamanam maya yo vah krishnam na sahate nripah
36.3
सर्वेषां बलिनां मूर्ध्नि मयेदं निहितं पदम्
एवमुक्ते मया सम्यगुत्तरं प्रब्रवीतु सः
Sarvesham balinam murdhni mayedam nihitam padam
Evamukte maya samyaguttaram prabravitu sah
36.4
मतिमन्तस्तु ये केचिदाचार्यं पितरं गुरुम्
अर्च्यमर्चितमर्चार्हमनुजानन्तु ते नृपाः
Matimantastu ye kechidacharyam pitaram gurum
Archyamarchitamarcharhamanujanantu te nripah
36.5
ततो न व्याजहारैषां कश्चिद्बुद्धिमतां सताम्
मानिनां बलिनां राज्ञां मध्ये संदर्शिते पदे
Tato na vyajaharaisham kashchidbuddhimatam satam
Maninam balinam ragyam madhye sandarshite pade
36.6
ततोऽपतत्पुष्पवृष्टिः सहदेवस्य मूर्धनि
अदृश्यरूपा वाचश्चाप्यब्रुवन्साधु साध्विति
Tatopatatpushpavrishtih sahadevasya murdhani
Adrishyarupa vachashchapyabruvansadhu sadhviti
36.7
आविध्यदजिनं कृष्णं भविष्यद्भूतजल्पकः
सर्वसंशयनिर्मोक्ता नारदः सर्वलोकवित्
Avidhyadajinam krishnam bhavishyadbhutajalpakah
Sarvasanshayanirmokta naradah sarvalokavit
36.8
तत्राहूतागताः सर्वे सुनीथप्रमुखा गणाः
संप्रादृश्यन्त संक्रुद्धा विवर्णवदनास्तथा
Tatrahutagatah sarve sunithapramukha ganah
Sampradrishyanta sankruddha vivarnavadanastatha
36.9
युधिष्ठिराभिषेकं च वासुदेवस्य चार्हणम्
अब्रुवंस्तत्र राजानो निर्वेदादात्मनिश्चयात्
Yudhishthirabhishekam cha vasudevasya charhanam
Abruvanstatra rajano nirvedadatmanishchayat
36.10
सुहृद्भिर्वार्यमाणानां तेषां हि वपुराबभौ
आमिषादपकृष्टानां सिंहानामिव गर्जताम्
Suhridbhirvaryamananam tesham hi vapurababhau
Amishadapakrishtanam sinhanamiva garjatam
36.11
तं बलौघमपर्यन्तं राजसागरमक्षयम्
कुर्वाणं समयं कृष्णो युद्धाय बुबुधे तदा
Tam balaughamaparyantam rajasagaramakshayam
Kurvanam samayam krishno yuddhaya bubudhe tada
36.12
पूजयित्वा तु पूजार्हं ब्रह्मक्षत्रं विशेषतः
सहदेवो नृणां देवः समापयत कर्म तत्
Pujayitva tu pujarham brahmakshatram visheshatah
Sahadevo nrinam devah samapayata karma tat
36.13
तस्मिन्नभ्यर्चिते कृष्णे सुनीथः शत्रुकर्षणः
अतिताम्रेक्षणः कोपादुवाच मनुजाधिपान्
Tasminnabhyarchite krishne sunithah shatrukarshanah
Atitamrekshanah kopaduvacha manujadhipan
36.14
स्थितः सेनापतिर्वोऽहं मन्यध्वं किं नु सांप्रतम्
युधि तिष्ठाम संनह्य समेतान्वृष्णिपाण्डवान्
Sthitah senapatirvoham manyadhvam kim nu sampratam
Yudhi tishthama sannahya sametanvrishnipandavan
36.15
इति सर्वान्समुत्साह्य राज्ञस्तांश्चेदिपुंगवः
यज्ञोपघाताय ततः सोऽमन्त्रयत राजभिः
Iti sarvansamutsahya ragyastanshchedipungavah
Yagyopaghataya tatah somantrayata rajabhih