UtshovChapter 37
37.1
वैशंपायन उवाच
ततः सागरसंकाशं दृष्ट्वा नृपतिसागरम्
रोषात्प्रचलितं सर्वमिदमाह युधिष्ठिरः
Vaishampayana uvacha
Tatah sagarasankasham drishtva nripatisagaram
Roshatprachalitam sarvamidamaha yudhishthirah
37.2
भीष्मं मतिमतां श्रेष्ठं वृद्धं कुरुपितामहम्
बृहस्पतिं बृहत्तेजाः पुरुहूत इवारिहा
Bhishmam matimatam shreshtham vriddham kurupitamaham
Brihaspatim brihattejah puruhuta ivariha
37.3
असौ रोषात्प्रचलितो महान्नृपतिसागरः
अत्र यत्प्रतिपत्तव्यं तन्मे ब्रूहि पितामह
Asau roshatprachalito mahannripatisagarah
Atra yatpratipattavyam tanme bruhi pitamaha
37.4
यज्ञस्य च न विघ्नः स्यात्प्रजानां च शिवं भवेत्
यथा सर्वत्र तत्सर्वं ब्रूहि मेऽद्य पितामह
Yagyasya cha na vighnah syatprajanam cha shivam bhavet
Yatha sarvatra tatsarvam bruhi medya pitamaha
37.5
इत्युक्तवति धर्मज्ञे धर्मराजे युधिष्ठिरे
उवाचेदं वचो भीष्मस्ततः कुरुपितामहः
Ityuktavati dharmagye dharmaraje yudhishthire
Uvachedam vacho bhishmastatah kurupitamahah
37.6
मा भैस्त्वं कुरुशार्दूल श्वा सिंहं हन्तुमर्हति
शिवः पन्थाः सुनीतोऽत्र मया पूर्वतरं वृतः
Ma bhaistvam kurushardula shva sinham hantumarhati
Shivah panthah sunitotra maya purvataram vritah
37.7
प्रसुप्ते हि यथा सिंहे श्वानस्तत्र समागताः
भषेयुः सहिताः सर्वे तथेमे वसुधाधिपाः
Prasupte hi yatha sinhe shvanastatra samagatah
Bhasheyuh sahitah sarve tatheme vasudhadhipah
37.8
वृष्णिसिंहस्य सुप्तस्य तथेमे प्रमुखे स्थिताः
भषन्ते तात संक्रुद्धाः श्वानः सिंहस्य संनिधौ
Vrishnisinhasya suptasya tatheme pramukhe sthitah
Bhashante tata sankruddhah shvanah sinhasya sannidhau
37.9
न हि संबुध्यते तावत्सुप्तः सिंह इवाच्युतः
तेन सिंहीकरोत्येतान्नृसिंहश्चेदिपुंगवः
Na hi sambudhyate tavatsuptah sinha ivachyutah
Tena sinhikarotyetannrisinhashchedipungavah
37.10
पार्थिवान्पार्थिवश्रेष्ठ शिशुपालोऽल्पचेतनः
सर्वान्सर्वात्मना तात नेतुकामो यमक्षयम्
Parthivanparthivashreshtha shishupalolpachetanah
Sarvansarvatmana tata netukamo yamakshayam
37.11
नूनमेतत्समादातुं पुनरिच्छत्यधोक्षजः
यदस्य शिशुपालस्थं तेजस्तिष्ठति भारत
Nunametatsamadatum punarichchhatyadhokshajah
Yadasya shishupalastham tejastishthati bharata
37.12
विप्लुता चास्य भद्रं ते बुद्धिर्बुद्धिमतां वर
चेदिराजस्य कौन्तेय सर्वेषां च महीक्षिताम्
Vipluta chasya bhadram te buddhirbuddhimatam vara
Chedirajasya kaunteya sarvesham cha mahikshitam
37.13
आदातुं हि नरव्याघ्रो यं यमिच्छत्ययं यदा
तस्य विप्लवते बुद्धिरेवं चेदिपतेर्यथा
Adatum hi naravyaghro yam yamichchhatyayam yada
Tasya viplavate buddhirevam chedipateryatha
37.14
चतुर्विधानां भूतानां त्रिषु लोकेषु माधवः
प्रभवश्चैव सर्वेषां निधनं च युधिष्ठिर
Chaturvidhanam bhutanam trishu lokeshu madhavah
Prabhavashchaiva sarvesham nidhanam cha yudhishthira
37.15
इति तस्य वचः श्रुत्वा ततश्चेदिपतिर्नृपः
भीष्मं रूक्षाक्षरा वाचः श्रावयामास भारत
Iti tasya vachah shrutva tatashchedipatirnripah
Bhishmam rukshakshara vachah shravayamasa bharata