অধ্যায় 37

37.1

বৈশংপায়ন উবাচ
ততঃ সাগরসংকাশং দৃষ্ট্বা নৃপতিসাগরম্
রোষাত্প্রচলিতং সর্বমিদমাহ যুধিষ্ঠিরঃ

ভীষ্মং মতিমতাং শ্রেষ্ঠং বৃদ্ধং কুরুপিতামহম্
বৃহস্পতিং বৃহত্তেজাঃ পুরুহূত ইবারিহা

অসৌ রোষাত্প্রচলিতো মহান্নৃপতিসাগরঃ
অত্র যত্প্রতিপত্তব্যং তন্মে ব্রূহি পিতামহ

যজ্ঞস্য চ ন বিঘ্নঃ স্যাত্প্রজানাং চ শিবং ভবেৎ
যথা সর্বত্র তত্সর্বং ব্রূহি মেঽদ্য পিতামহ

ইত্যুক্তবতি ধর্মজ্ঞে ধর্মরাজে যুধিষ্ঠিরে
উবাচেদং বচো ভীষ্মস্ততঃ কুরুপিতামহঃ

মা ভৈস্ত্বং কুরুশার্দূল শ্বা সিংহং হন্তুমর্হতি
শিবঃ পন্থাঃ সুনীতোঽত্র ময়া পূর্বতরং বৃতঃ

প্রসুপ্তে হি যথা সিংহে শ্বানস্তত্র সমাগতাঃ
ভষেয়ুঃ সহিতাঃ সর্বে তথেমে বসুধাধিপাঃ

বৃষ্ণিসিংহস্য সুপ্তস্য তথেমে প্রমুখে স্থিতাঃ
ভষন্তে তাত সংক্রুদ্ধাঃ শ্বানঃ সিংহস্য সংনিধৌ

ন হি সংবুধ্যতে তাবত্সুপ্তঃ সিংহ ইবাচ্যুতঃ
তেন সিংহীকরোত্যেতান্নৃসিংহশ্চেদিপুংগবঃ

পার্থিবান্পার্থিবশ্রেষ্ঠ শিশুপালোঽল্পচেতনঃ
সর্বান্সর্বাত্মনা তাত নেতুকামো যমক্ষয়ম্

নূনমেতত্সমাদাতুং পুনরিচ্ছত্যধোক্ষজঃ
যদস্য শিশুপালস্থং তেজস্তিষ্ঠতি ভারত

বিপ্লুতা চাস্য ভদ্রং তে বুদ্ধির্বুদ্ধিমতাং বর
চেদিরাজস্য কৌন্তেয় সর্বেষাং চ মহীক্ষিতাম্

আদাতুং হি নরব্যাঘ্রো যং যমিচ্ছত্যয়ং যদা
তস্য বিপ্লবতে বুদ্ধিরেবং চেদিপতের্যথা

চতুর্বিধানাং ভূতানাং ত্রিষু লোকেষু মাধবঃ
প্রভবশ্চৈব সর্বেষাং নিধনং চ যুধিষ্ঠির

ইতি তস্য বচঃ শ্রুত্বা ততশ্চেদিপতির্নৃপঃ
ভীষ্মং রূক্ষাক্ষরা বাচঃ শ্রাবয়ামাস ভারত