Utshovঅধ্যায় 38
38.1
শিশুপাল উবাচ
বিভীষিকাভির্বহ্বীভির্ভীষয়ন্সর্বপার্থিবান্
ন ব্যপত্রপসে কস্মাদ্বৃদ্ধঃ সন্কুলপাংসনঃ
38.2
যুক্তমেতত্তৃতীয়ায়াং প্রকৃতৌ বর্ততা ত্বয়া
বক্তুং ধর্মাদপেতার্থং ত্বং হি সর্বকুরূত্তমঃ
38.3
নাবি নৌরিব সংবদ্ধা যথান্ধো বান্ধমন্বিয়াৎ
তথাভূতা হি কৌরব্যা ভীষ্ম যেষাং ত্বমগ্রণীঃ
38.4
পূতনাঘাতপূর্বাণি কর্মাণ্যস্য বিশেষতঃ
ত্বয়া কীর্তয়তাস্মাকং ভূয়ঃ প্রচ্যাবিতং মনঃ
38.5
অবলিপ্তস্য মূর্খস্য কেশবং স্তোতুমিচ্ছতঃ
কথং ভীষ্ম ন তে জিহ্বা শতধেয়ং বিদীর্যতে
38.6
যত্র কুত্সা প্রয়োক্তব্যা ভীষ্ম বালতরৈর্নরৈঃ
তমিমং জ্ঞানবৃদ্ধঃ সন্গোপং সংস্তোতুমিচ্ছসি
38.7
যদ্যনেন হতা বাল্যে শকুনিশ্চিত্রমত্র কিম্
তৌ বাশ্ববৃষভৌ ভীষ্ম যৌ ন যুদ্ধবিশারদৌ
38.8
চেতনারহিতং কাষ্ঠং যদ্যনেন নিপাতিতম্
পাদেন শকটং ভীষ্ম তত্র কিং কৃতমদ্ভুতম্
38.9
বল্মীকমাত্রঃ সপ্তাহং যদ্যনেন ধৃতোঽচলঃ
তদা গোবর্ধনো ভীষ্ম ন তচ্চিত্রং মতং মম
38.10
ভুক্তমেতেন বহ্বন্নং ক্রীডতা নগমূর্ধনি
ইতি তে ভীষ্ম শৃণ্বানাঃ পরং বিস্ময়মাগতাঃ
38.11
যস্য চানেন ধর্মজ্ঞ ভুক্তমন্নং বলীয়সঃ
স চানেন হতঃ কংস ইত্যেতন্ন মহাদ্ভুতম্
38.12
ন তে শ্রুতমিদং ভীষ্ম নূনং কথয়তাং সতাম্
যদ্বক্ষ্যে ত্বামধর্মজ্ঞ বাক্যং কুরুকুলাধম
38.13
স্ত্রীষু গোষু ন শস্ত্রাণি পাতয়েদ্ব্রাহ্মণেষু চ
যস্য চান্নানি ভুঞ্জীত যশ্চ স্যাচ্ছরণাগতঃ
38.14
ইতি সন্তোঽনুশাসন্তি সজ্জনা ধর্মিণঃ সদা
ভীষ্ম লোকে হি তত্সর্বং বিতথং ত্বয়ি দৃশ্যতে
38.15
জ্ঞানবৃদ্ধং চ বৃদ্ধং চ ভূয়াংসং কেশবং মম
অজানত ইবাখ্যাসি সংস্তুবন্কুরুসত্তম
গোঘ্নঃ স্ত্রীঘ্নশ্চ সন্ভীষ্ম কথং সংস্তবমর্হতি
38.16
অসৌ মতিমতাং শ্রেষ্ঠো য এষ জগতঃ প্রভুঃ
সংভাবয়তি যদ্যেবং ত্বদ্বাক্যাচ্চ জনার্দনঃ
এবমেতত্সর্বমিতি সর্বং তদ্বিতথং ধ্রুবম্
38.17
ন গাথা গাথিনং শাস্তি বহু চেদপি গায়তি
প্রকৃতিং যান্তি ভূতানি ভূলিঙ্গশকুনির্যথা
38.18
নূনং প্রকৃতিরেষা তে জঘন্যা নাত্র সংশয়ঃ
অতঃ পাপীয়সী চৈষাং পাণ্ডবানামপীষ্যতে
38.19
যেষামর্চ্যতমঃ কৃষ্ণস্ত্বং চ যেষাং প্রদর্শকঃ
ধর্মবাক্ত্বমধর্মজ্ঞঃ সতাং মার্গাদবপ্লুতঃ
38.20
কো হি ধর্মিণমাত্মানং জানঞ্জ্ঞানবতাং বরঃ
কুর্যাদ্যথা ত্বয়া ভীষ্ম কৃতং ধর্মমবেক্ষতা
38.21
অন্যকামা হি ধর্মজ্ঞ কন্যকা প্রাজ্ঞমানিনা
অম্বা নামেতি ভদ্রং তে কথং সাপহৃতা ত্বয়া
38.22
যাং ত্বয়াপহৃতাং ভীষ্ম কন্যাং নৈষিতবান্নৃপঃ
ভ্রাতা বিচিত্রবীর্যস্তে সতাং বৃত্তমনুষ্ঠিতঃ
38.23
দারয়োর্যস্য চান্যেন মিষতঃ প্রাজ্ঞমানিনঃ
তব জাতান্যপত্যানি সজ্জনাচরিতে পথি
38.24
ন হি ধর্মোঽস্তি তে ভীষ্ম ব্রহ্মচর্যমিদং বৃথা
যদ্ধারয়সি মোহাদ্বা ক্লীবত্বাদ্বা ন সংশয়ঃ
38.25
ন ত্বহং তব ধর্মজ্ঞ পশ্যাম্যুপচয়ং ক্বচিৎ
ন হি তে সেবিতা বৃদ্ধা য এবং ধর্মমব্রুবন্
38.26
ইষ্টং দত্তমধীতং চ যজ্ঞাশ্চ বহুদক্ষিণাঃ
সর্বমেতদপত্যস্য কলাং নার্হতি ষোডশীম্
38.27
ব্রতোপবাসৈর্বহুভিঃ কৃতং ভবতি ভীষ্ম যৎ
সর্বং তদনপত্যস্য মোঘং ভবতি নিশ্চয়াৎ
38.28
সোঽনপত্যশ্চ বৃদ্ধশ্চ মিথ্যাধর্মানুশাসনাৎ
হংসবত্ত্বমপীদানীং জ্ঞাতিভ্যঃ প্রাপ্নুয়া বধম্
38.29
এবং হি কথয়ন্ত্যন্যে নরা জ্ঞানবিদঃ পুরা
ভীষ্ম যত্তদহং সম্যগ্বক্ষ্যামি তব শৃণ্বতঃ
38.30
বৃদ্ধঃ কিল সমুদ্রান্তে কশ্চিদ্ধংসোঽভবত্পুরা
ধর্মবাগন্যথাবৃত্তঃ পক্ষিণঃ সোঽনুশাস্তি হ
38.31
ধর্মং চরত মাধর্মমিতি তস্য বচঃ কিল
পক্ষিণঃ শুশ্রুবুর্ভীষ্ম সততং ধর্মবাদিনঃ
38.32
অথাস্য ভক্ষ্যমাজহ্রুঃ সমুদ্রজলচারিণঃ
অণ্ডজা ভীষ্ম তস্যান্যে ধর্মার্থমিতি শুশ্রুম
38.33
তস্য চৈব সমভ্যাশে নিক্ষিপ্যাণ্ডানি সর্বশঃ
সমুদ্রাম্ভস্যমোদন্ত চরন্তো ভীষ্ম পক্ষিণঃ
38.34
তেষামণ্ডানি সর্বেষাং ভক্ষয়ামাস পাপকৃৎ
স হংসঃ সংপ্রমত্তানামপ্রমত্তঃ স্বকর্মণি
38.35
ততঃ প্রক্ষীয়মাণেষু তেষ্বণ্ডেষ্বণ্ডজোঽপরঃ
অশঙ্কত মহাপ্রাজ্ঞস্তং কদাচিদ্দদর্শ হ
38.36
ততঃ স কথয়ামাস দৃষ্ট্বা হংসস্য কিল্বিষম্
তেষাং পরমদুঃখার্তঃ স পক্ষী সর্বপক্ষিণাম্
38.37
ততঃ প্রত্যক্ষতো দৃষ্ট্বা পক্ষিণস্তে সমাগতাঃ
নিজঘ্নুস্তং তদা হংসং মিথ্যাবৃত্তং কুরূদ্বহ
38.38
তে ত্বাং হংসসধর্মাণমপীমে বসুধাধিপাঃ
নিহন্যুর্ভীষ্ম সংক্রুদ্ধাঃ পক্ষিণস্তমিবাণ্ডজম্
38.39
গাথামপ্যত্র গায়ন্তি যে পুরাণবিদো জনাঃ
ভীষ্ম যাং তাং চ তে সম্যক্কথয়িষ্যামি ভারত
38.40
অন্তরাত্মনি বিনিহিতে; রৌষি পত্ররথ বিতথম্
অণ্ডভক্ষণমশুচি তে; কর্ম বাচমতিশয়তে