অধ্যায় 39

39.1

শিশুপাল উবাচ
স মে বহুমতো রাজা জরাসংধো মহাবলঃ
যোঽনেন যুদ্ধং নেয়েষ দাসোঽয়মিতি সংয়ুগে

কেশবেন কৃতং যত্তু জরাসংধবধে তদা
ভীমসেনার্জুনাভ্যাং চ কস্তত্সাধ্বিতি মন্যতে

অদ্বারেণ প্রবিষ্টেন ছদ্মনা ব্রহ্মবাদিনা
দৃষ্টঃ প্রভাবঃ কৃষ্ণেন জরাসংধস্য ধীমতঃ

যেন ধর্মাত্মনাত্মানং ব্রহ্মণ্যমভিজানতা
নৈষিতং পাদ্যমস্মৈ তদ্দাতুমগ্রে দুরাত্মনে

ভুজ্যতামিতি তেনোক্তাঃ কৃষ্ণভীমধনংজয়াঃ
জরাসংধেন কৌরব্য কৃষ্ণেন বিকৃতং কৃতম্

যদ্যয়ং জগতঃ কর্তা যথৈনং মূর্খ মন্যসে
কস্মান্ন ব্রাহ্মণং সম্যগাত্মানমবগচ্ছতি

ইদং ত্বাশ্চর্যভূতং মে যদিমে পাণ্ডবাস্ত্বয়া
অপকৃষ্টাঃ সতাং মার্গান্মন্যন্তে তচ্চ সাধ্বিতি

অথ বা নৈতদাশ্চর্যং যেষাং ত্বমসি ভারত
স্ত্রীসধর্মা চ বৃদ্ধশ্চ সর্বার্থানাং প্রদর্শকঃ

বৈশংপায়ন উবাচ
তস্য তদ্বচনং শ্রুত্বা রূক্ষং রূক্ষাক্ষরং বহু
চুকোপ বলিনাং শ্রেষ্ঠো ভীমসেনঃ প্রতাপবান্

তস্য পদ্মপ্রতীকাশে স্বভাবায়তবিস্তৃতে
ভূয়ঃ ক্রোধাভিতাম্রান্তে রক্তে নেত্রে বভূবতুঃ

ত্রিশিখাং ভ্রুকুটীং চাস্য দদৃশুঃ সর্বপার্থিবাঃ
ললাটস্থাং ত্রিকূটস্থাং গঙ্গাং ত্রিপথগামিব

দন্তান্সংদশতস্তস্য কোপাদ্দদৃশুরাননম্
যুগান্তে সর্বভূতানি কালস্যেব দিধক্ষতঃ

উত্পতন্তং তু বেগেন জগ্রাহৈনং মনস্বিনম্
ভীষ্ম এব মহাবাহুর্মহাসেনমিবেশ্বরঃ

তস্য ভীমস্য ভীষ্মেণ বার্যমাণস্য ভারত
গুরুণা বিবিধৈর্বাক্যৈঃ ক্রোধঃ প্রশমমাগতঃ

নাতিচক্রাম ভীষ্মস্য স হি বাক্যমরিংদমঃ
সমুদ্ধূতো ঘনাপায়ে বেলামিব মহোদধিঃ

শিশুপালস্তু সংক্রুদ্ধে ভীমসেনে নরাধিপ
নাকম্পত তদা বীরঃ পৌরুষে স্বে ব্যবস্থিতঃ

উত্পতন্তং তু বেগেন পুনঃ পুনররিংদমঃ
ন স তং চিন্তয়ামাস সিংহঃ ক্ষুদ্রমৃগং যথা

প্রহসংশ্চাব্রবীদ্বাক্যং চেদিরাজঃ প্রতাপবান্
ভীমসেনমতিক্রুদ্ধং দৃষ্ট্বা ভীমপরাক্রমম্

মুঞ্চৈনং ভীষ্ম পশ্যন্তু যাবদেনং নরাধিপাঃ
মত্প্রতাপাগ্নিনির্দগ্ধং পতংগমিব বহ্নিনা

ততশ্চেদিপতের্বাক্যং তচ্ছ্রুত্বা কুরুসত্তমঃ
ভীমসেনমুবাচেদং ভীষ্মো মতিমতাং বরঃ