অধ্যায় 40

40.1

ভীষ্ম উবাচ
চেদিরাজকুলে জাতস্ত্র্যক্ষ এষ চতুর্ভুজঃ
রাসভারাবসদৃশং রুরাব চ ননাদ চ

তেনাস্য মাতাপিতরৌ ত্রেসতুস্তৌ সবান্ধবৌ
বৈকৃতং তচ্চ তৌ দৃষ্ট্বা ত্যাগায় কুরুতাং মতিম্

ততঃ সভার্যং নৃপতিং সামাত্যং সপুরোহিতম্
চিন্তাসংমূঢহৃদয়ং বাগুবাচাশরীরিণী

এষ তে নৃপতে পুত্রঃ শ্রীমাঞ্জাতো মহাবলঃ
তস্মাদস্মান্ন ভেতব্যমব্যগ্রঃ পাহি বৈ শিশুম্

ন চৈবৈতস্য মৃত্যুস্ত্বং ন কালঃ প্রত্যুপস্থিতঃ
মৃত্যুর্হন্তাস্য শস্ত্রেণ স চোত্পন্নো নরাধিপ

সংশ্রুত্যোদাহৃতং বাক্যং ভূতমন্তর্হিতং ততঃ
পুত্রস্নেহাভিসংতপ্তা জননী বাক্যমব্রবীৎ

যেনেদমীরিতং বাক্যং মমৈব তনয়ং প্রতি
প্রাঞ্জলিস্তং নমস্যামি ব্রবীতু স পুনর্বচঃ

শ্রোতুমিচ্ছামি পুত্রস্য কোঽস্য মৃত্যুর্ভবিষ্যতি
অন্তর্হিতং ততো ভূতমুবাচেদং পুনর্বচঃ

যেনোত্সঙ্গে গৃহীতস্য ভুজাবভ্যধিকাবুভৌ
পতিষ্যতঃ ক্ষিতিতলে পঞ্চশীর্ষাবিবোরগৌ

তৃতীয়মেতদ্বালস্য ললাটস্থং চ লোচনম্
নিমজ্জিষ্যতি যং দৃষ্ট্বা সোঽস্য মৃত্যুর্ভবিষ্যতি

ত্র্যক্ষং চতুর্ভুজং শ্রুত্বা তথা চ সমুদাহৃতম্
ধরণ্যাং পার্থিবাঃ সর্বে অভ্যগচ্ছন্দিদৃক্ষবঃ

তান্পূজয়িত্বা সংপ্রাপ্তান্যথার্হং স মহীপতিঃ
একৈকস্য নৃপস্যাঙ্কে পুত্রমারোপয়ত্তদা

এবং রাজসহস্রাণাং পৃথক্ত্বেন যথাক্রমম্
শিশুরঙ্কে সমারূঢো ন তত্প্রাপ নিদর্শনম্

ততশ্চেদিপুরং প্রাপ্তৌ সংকর্ষণজনার্দনৌ
যাদবৌ যাদবীং দ্রষ্টুং স্বসারং তাং পিতুস্তদা

অভিবাদ্য যথান্যায়ং যথাজ্যেষ্ঠং নৃপাংশ্চ তান্
কুশলানাময়ং পৃষ্ট্বা নিষণ্ণৌ রামকেশবৌ

অভ্যর্চিতৌ তদা বীরৌ প্রীত্যা চাভ্যধিকং ততঃ
পুত্রং দামোদরোত্সঙ্গে দেবী সংন্যদধাত্স্বয়ম্

ন্যস্তমাত্রস্য তস্যাঙ্কে ভুজাবভ্যধিকাবুভৌ
পেততুস্তচ্চ নয়নং নিমমজ্জ ললাটজম্

তদ্দৃষ্ট্বা ব্যথিতা ত্রস্তা বরং কৃষ্ণময়াচত
দদস্ব মে বরং কৃষ্ণ ভয়ার্তায়া মহাভুজ

ত্বং হ্যার্তানাং সমাশ্বাসো ভীতানামভয়ংকরঃ
পিতৃষ্বসারং মা ভৈষীরিত্যুবাচ জনার্দনঃ

দদানি কং বরং কিং বা করবাণি পিতৃষ্বসঃ
শক্যং বা যদি বাশক্যং করিষ্যামি বচস্তব

এবমুক্তা ততঃ কৃষ্ণমব্রবীদ্যদুনন্দনম্
শিশুপালস্যাপরাধান্ক্ষমেথাস্ত্বং মহাবল

কৃষ্ণ উবাচ
অপরাধশতং ক্ষাম্যং ময়া হ্যস্য পিতৃষ্বসঃ
পুত্রস্য তে বধার্হাণাং মা ত্বং শোকে মনঃ কৃথাঃ

ভীষ্ম উবাচ
এবমেষ নৃপঃ পাপঃ শিশুপালঃ সুমন্দধীঃ
ত্বাং সমাহ্বয়তে বীর গোবিন্দবরদর্পিতঃ