Utshovঅধ্যায় 41
41.1
ভীষ্ম উবাচ
নৈষা চেদিপতের্বুদ্ধির্যয়া ত্বাহ্বয়তেঽচ্যুতম্
নূনমেষ জগদ্ভর্তুঃ কৃষ্ণস্যৈব বিনিশ্চয়ঃ
41.2
কো হি মাং ভীমসেনাদ্য ক্ষিতাবর্হতি পার্থিবঃ
ক্ষেপ্তুং দৈবপরীতাত্মা যথৈষ কুলপাংসনঃ
41.3
এষ হ্যস্য মহাবাহো তেজোংশশ্চ হরের্ধ্রুবম্
তমেব পুনরাদাতুমিচ্ছত্পৃথুয়শা হরিঃ
41.4
যেনৈষ কুরুশার্দূল শার্দূল ইব চেদিরাট্
গর্জত্যতীব দুর্বুদ্ধিঃ সর্বানস্মানচিন্তয়ন্
41.5
বৈশংপায়ন উবাচ
ততো ন মমৃষে চৈদ্যস্তদ্ভীষ্মবচনং তদা
উবাচ চৈনং সংক্রুদ্ধঃ পুনর্ভীষ্মমথোত্তরম্
41.6
শিশুপাল উবাচ
দ্বিষতাং নোঽস্তু ভীষ্মৈষ প্রভাবঃ কেশবস্য যঃ
যস্য সংস্তববক্তা ত্বং বন্দিবত্সততোত্থিতঃ
41.7
সংস্তবায় মনো ভীষ্ম পরেষাং রমতে সদা
যদি সংস্তৌষি রাজ্ঞস্ত্বমিমং হিত্বা জনার্দনম্
41.8
দরদং স্তুহি বাহ্লীকমিমং পার্থিবসত্তমম্
জায়মানেন যেনেয়মভবদ্দারিতা মহী
41.9
বঙ্গাঙ্গবিষয়াধ্যক্ষং সহস্রাক্ষসমং বলে
স্তুহি কর্ণমিমং ভীষ্ম মহাচাপবিকর্ষণম্
41.10
দ্রোণং দ্রৌণিং চ সাধু ত্বং পিতাপুত্রৌ মহারথৌ
স্তুহি স্তুত্যাবিমৌ ভীষ্ম সততং দ্বিজসত্তমৌ
41.11
যয়োরন্যতরো ভীষ্ম সংক্রুদ্ধঃ সচরাচরাম্
ইমাং বসুমতীং কুর্যাদশেষামিতি মে মতিঃ
41.12
দ্রোণস্য হি সমং যুদ্ধে ন পশ্যামি নরাধিপম্
অশ্বত্থাম্নস্তথা ভীষ্ম ন চৈতৌ স্তোতুমিচ্ছসি
41.13
শল্যাদীনপি কস্মাত্ত্বং ন স্তৌষি বসুধাধিপান্
স্তবায় যদি তে বুদ্ধির্বর্ততে ভীষ্ম সর্বদা
41.14
কিং হি শক্যং ময়া কর্তুং যদ্বৃদ্ধানাং ত্বয়া নৃপ
পুরা কথয়তাং নূনং ন শ্রুতং ধর্মবাদিনাম্
41.15
আত্মনিন্দাত্মপূজা চ পরনিন্দা পরস্তবঃ
অনাচরিতমার্যাণাং বৃত্তমেতচ্চতুর্বিধম্
41.16
যদস্তব্যমিমং শশ্বন্মোহাত্সংস্তৌষি ভক্তিতঃ
কেশবং তচ্চ তে ভীষ্ম ন কশ্চিদনুমন্যতে
41.17
কথং ভোজস্য পুরুষে বর্গপালে দুরাত্মনি
সমাবেশয়সে সর্বং জগত্কেবলকাম্যয়া
41.18
অথ বৈষা ন তে ভক্তিঃ প্রকৃতিং যাতি ভারত
ময়ৈব কথিতং পূর্বং ভূলিঙ্গশকুনির্যথা
41.19
ভূলিঙ্গশকুনির্নাম পার্শ্বে হিমবতঃ পরে
ভীষ্ম তস্যাঃ সদা বাচঃ শ্রূয়ন্তেঽর্থবিগর্হিতাঃ
41.20
মা সাহসমিতীদং সা সততং বাশতে কিল
সাহসং চাত্মনাতীব চরন্তী নাববুধ্যতে
41.21
সা হি মাংসার্গলং ভীষ্ম মুখাত্সিংহস্য খাদতঃ
দন্তান্তরবিলগ্নং যত্তদাদত্তেঽল্পচেতনা
41.22
ইচ্ছতঃ সা হি সিংহস্য ভীষ্ম জীবত্যসংশয়ম্
তদ্বত্ত্বমপ্যধর্মজ্ঞ সদা বাচঃ প্রভাষসে
41.23
ইচ্ছতাং পার্থিবেন্দ্রাণাং ভীষ্ম জীবস্যসংশয়ম্
লোকবিদ্বিষ্টকর্মা হি নান্যোঽস্তি ভবতা সমঃ
41.24
বৈশংপায়ন উবাচ
ততশ্চেদিপতেঃ শ্রুত্বা ভীষ্মঃ স কটুকং বচঃ
উবাচেদং বচো রাজংশ্চেদিরাজস্য শৃণ্বতঃ
41.25
ইচ্ছতাং কিল নামাহং জীবাম্যেষাং মহীক্ষিতাম্
যোঽহং ন গণয়াম্যেতাংস্তৃণানীব নরাধিপান্
41.26
এবমুক্তে তু ভীষ্মেণ ততঃ সংচুক্রুধুর্নৃপাঃ
কেচিজ্জহৃষিরে তত্র কেচিদ্ভীষ্মং জগর্হিরে
41.27
কেচিদূচুর্মহেষ্বাসাঃ শ্রুত্বা ভীষ্মস্য তদ্বচঃ
পাপোঽবলিপ্তো বৃদ্ধশ্চ নায়ং ভীষ্মোঽর্হতি ক্ষমাম্
41.28
হন্যতাং দুর্মতির্ভীষ্মঃ পশুবত্সাধ্বয়ং নৃপৈঃ
সর্বৈঃ সমেত্য সংরব্ধৈর্দহ্যতাং বা কটাগ্নিনা
41.29
ইতি তেষাং বচঃ শ্রুত্বা ততঃ কুরুপিতামহঃ
উবাচ মতিমান্ভীষ্মস্তানেব বসুধাধিপান্
41.30
উক্তস্যোক্তস্য নেহান্তমহং সমুপলক্ষয়ে
যত্তু বক্ষ্যামি তত্সর্বং শৃণুধ্বং বসুধাধিপাঃ
41.31
পশুবদ্ঘাতনং বা মে দহনং বা কটাগ্নিনা
ক্রিয়তাং মূর্ধ্নি বো ন্যস্তং ময়েদং সকলং পদম্
41.32
এষ তিষ্ঠতি গোবিন্দঃ পূজিতোঽস্মাভিরচ্যুতঃ
যস্য বস্ত্বরতে বুদ্ধির্মরণায় স মাধবম্
41.33
কৃষ্ণমাহ্বয়তামদ্য যুদ্ধে শার্ঙ্গগদাধরম্
যাবদস্যৈব দেবস্য দেহং বিশতু পাতিতঃ