Utshovঅধ্যায় 42
42.1
বৈশংপায়ন উবাচ
ততঃ শ্রুত্বৈব ভীষ্মস্য চেদিরাডুরুবিক্রমঃ
যুয়ুত্সুর্বাসুদেবেন বাসুদেবমুবাচ হ
42.2
আহ্বয়ে ত্বাং রণং গচ্ছ ময়া সার্ধং জনার্দন
যাবদদ্য নিহন্মি ত্বাং সহিতং সর্বপাণ্ডবৈঃ
42.3
সহ ত্বয়া হি মে বধ্যাঃ পাণ্ডবাঃ কৃষ্ণ সর্বথা
নৃপতীন্সমতিক্রম্য যৈররাজা ত্বমর্চিতঃ
42.4
যে ত্বাং দাসমরাজানং বাল্যাদর্চন্তি দুর্মতিম্
অনর্হমর্হবত্কৃষ্ণ বধ্যাস্ত ইতি মে মতিঃ
ইত্যুক্ত্বা রাজশার্দূলস্তস্থৌ গর্জন্নমর্ষণঃ
42.5
এবমুক্তে ততঃ কৃষ্ণো মৃদুপূর্বমিদং বচঃ
উবাচ পার্থিবান্সর্বাংস্তত্সমক্ষং চ পাণ্ডবান্
42.6
এষ নঃ শত্রুরত্যন্তং পার্থিবাঃ সাত্বতীসুতঃ
সাত্বতানাং নৃশংসাত্মা ন হিতোঽনপকারিণাম্
42.7
প্রাগ্জ্যোতিষপুরং যাতানস্মাঞ্জ্ঞাত্বা নৃশংসকৃৎ
অদহদ্দ্বারকামেষ স্বস্রীয়ঃ সন্নরাধিপাঃ
42.8
ক্রীডতো ভোজরাজন্যানেষ রৈবতকে গিরৌ
হত্বা বদ্ধ্বা চ তান্সর্বানুপায়াত্স্বপুরং পুরা
42.9
অশ্বমেধে হয়ং মেধ্যমুত্সৃষ্টং রক্ষিভির্বৃতম্
পিতুর্মে যজ্ঞবিঘ্নার্থমহরত্পাপনিশ্চয়ঃ
42.10
সৌবীরান্প্রতিপত্তৌ চ বভ্রোরেষ যশস্বিনঃ
ভার্যামভ্যহরন্মোহাদকামাং তামিতো গতাম্
42.11
এষ মায়াপ্রতিচ্ছন্নঃ করূষার্থে তপস্বিনীম্
জহার ভদ্রাং বৈশালীং মাতুলস্য নৃশংসকৃৎ
42.12
পিতৃষ্বসুঃ কৃতে দুঃখং সুমহন্মর্ষয়াম্যহম্
দিষ্ট্যা ত্বিদং সর্বরাজ্ঞাং সংনিধাবদ্য বর্ততে
42.13
পশ্যন্তি হি ভবন্তোঽদ্য ময্যতীব ব্যতিক্রমম্
কৃতানি তু পরোক্ষং মে যানি তানি নিবোধত
42.14
ইমং ত্বস্য ন শক্ষ্যামি ক্ষন্তুমদ্য ব্যতিক্রমম্
অবলেপাদ্বধার্হস্য সমগ্রে রাজমণ্ডলে
42.15
রুক্মিণ্যামস্য মূঢস্য প্রার্থনাসীন্মুমূর্ষতঃ
ন চ তাং প্রাপ্তবান্মূঢঃ শূদ্রো বেদশ্রুতিং যথা
42.16
এবমাদি ততঃ সর্বে সহিতাস্তে নরাধিপাঃ
বাসুদেববচঃ শ্রুত্বা চেদিরাজং ব্যগর্হয়ন্
42.17
ততস্তদ্বচনং শ্রুত্বা শিশুপালঃ প্রতাপবান্
জহাস স্বনবদ্ধাসং প্রহস্যেদমুবাচ হ
42.18
মত্পূর্বাং রুক্মিণীং কৃষ্ণ সংসত্সু পরিকীর্তয়ন্
বিশেষতঃ পার্থিবেষু ব্রীডাং ন কুরুষে কথম্
42.19
মন্যমানো হি কঃ সত্সু পুরুষঃ পরিকীর্তয়েৎ
অন্যপূর্বাং স্ত্রিয়ং জাতু ত্বদন্যো মধুসূদন
42.20
ক্ষম বা যদি তে শ্রদ্ধা মা বা কৃষ্ণ মম ক্ষম
ক্রুদ্ধাদ্বাপি প্রসন্নাদ্বা কিং মে ত্বত্তো ভবিষ্যতি
42.21
তথা ব্রুবত এবাস্য ভগবান্মধুসূদনঃ
ব্যপাহরচ্ছিরঃ ক্রুদ্ধশ্চক্রেণামিত্রকর্ষণঃ
স পপাত মহাবাহুর্বজ্রাহত ইবাচলঃ
42.22
ততশ্চেদিপতের্দেহাত্তেজোঽগ্র্যং দদৃশুর্নৃপাঃ
উত্পতন্তং মহারাজ গগনাদিব ভাস্করম্
42.23
ততঃ কমলপত্রাক্ষং কৃষ্ণং লোকনমস্কৃতম্
ববন্দে তত্তদা তেজো বিবেশ চ নরাধিপ
42.24
তদদ্ভুতমমন্যন্ত দৃষ্ট্বা সর্বে মহীক্ষিতঃ
যদ্বিবেশ মহাবাহুং তত্তেজঃ পুরুষোত্তমম্
42.25
অনভ্রে প্রববর্ষ দ্যৌঃ পপাত জ্বলিতাশনিঃ
কৃষ্ণেন নিহতে চৈদ্যে চচাল চ বসুংধরা
42.26
ততঃ কেচিন্মহীপালা নাব্রুবংস্তত্র কিংচন
অতীতবাক্পথে কালে প্রেক্ষমাণা জনার্দনম্
42.27
হস্তৈর্হস্তাগ্রমপরে প্রত্যপীষন্নমর্ষিতাঃ
অপরে দশনৈরোষ্ঠানদশন্ক্রোধমূর্ছিতাঃ
42.28
রহস্তু কেচিদ্বার্ষ্ণেয়ং প্রশশংসুর্নরাধিপাঃ
কেচিদেব তু সংরব্ধা মধ্যস্থাস্ত্বপরেঽভবন্
42.29
প্রহৃষ্টাঃ কেশবং জগ্মুঃ সংস্তুবন্তো মহর্ষয়ঃ
ব্রাহ্মণাশ্চ মহাত্মানঃ পার্থিবাশ্চ মহাবলাঃ
42.30
পাণ্ডবস্ত্বব্রবীদ্ভ্রাতৄন্সত্কারেণ মহীপতিম্
দমঘোষাত্মজং বীরং সংসাধয়ত মা চিরম্
তথা চ কৃতবন্তস্তে ভ্রাতুর্বৈ শাসনং তদা
42.31
চেদীনামাধিপত্যে চ পুত্রমস্য মহীপতিম্
অভ্যষিঞ্চত্তদা পার্থঃ সহ তৈর্বসুধাধিপৈঃ
42.32
ততঃ স কুরুরাজস্য ক্রতুঃ সর্বসমৃদ্ধিমান্
যূনাং প্রীতিকরো রাজন্সংবভৌ বিপুলৌজসঃ
42.33
শান্তবিঘ্নঃ সুখারম্ভঃ প্রভূতধনধান্যবান্
অন্নবান্বহুভক্ষ্যশ্চ কেশবেন সুরক্ষিতঃ
42.34
সমাপয়ামাস চ তং রাজসূয়ং মহাক্রতুম্
তং তু যজ্ঞং মহাবাহুরা সমাপ্তের্জনার্দনঃ
ররক্ষ ভগবাঞ্শৌরিঃ শার্ঙ্গচক্রগদাধরঃ
42.35
ততস্ত্ববভৃথস্নাতং ধর্মরাজং যুধিষ্ঠিরম্
সমস্তং পার্থিবং ক্ষত্রমভিগম্যেদমব্রবীৎ
42.36
দিষ্ট্যা বর্ধসি ধর্মজ্ঞ সাম্রাজ্যং প্রাপ্তবান্বিভো
আজমীঢাজমীঢানাং যশঃ সংবর্ধিতং ত্বয়া
কর্মণৈতেন রাজেন্দ্র ধর্মশ্চ সুমহান্কৃতঃ
42.37
আপৃচ্ছামো নরব্যাঘ্র সর্বকামৈঃ সুপূজিতাঃ
স্বরাষ্ট্রাণি গমিষ্যামস্তদনুজ্ঞাতুমর্হসি
42.38
শ্রুত্বা তু বচনং রাজ্ঞাং ধর্মরাজো যুধিষ্ঠিরঃ
যথার্হং পূজ্য নৃপতীন্ভ্রাতৄন্সর্বানুবাচ হ
42.39
রাজানঃ সর্ব এবৈতে প্রীত্যাস্মান্সমুপাগতাঃ
প্রস্থিতাঃ স্বানি রাষ্ট্রাণি মামাপৃচ্ছ্য পরংতপাঃ
তেঽনুব্রজত ভদ্রং বো বিষয়ান্তং নৃপোত্তমান্
42.40
ভ্রাতুর্বচনমাজ্ঞায় পাণ্ডবা ধর্মচারিণঃ
যথার্হং নৃপমুখ্যাংস্তানেকৈকং সমনুব্রজন্
42.41
বিরাটমন্বয়াত্তূর্ণং ধৃষ্টদ্যুম্নঃ প্রতাপবান্
ধনংজয়ো যজ্ঞসেনং মহাত্মানং মহারথঃ
42.42
ভীষ্মং চ ধৃতরাষ্ট্রং চ ভীমসেনো মহাবলঃ
দ্রোণং চ সসুতং বীরং সহদেবো মহারথঃ
42.43
নকুলঃ সুবলং রাজন্সহপুত্রং সমন্বয়াৎ
দ্রৌপদেয়াঃ সসৌভদ্রাঃ পার্বতীয়ান্মহীপতীন্
42.44
অন্বগচ্ছংস্তথৈবান্যান্ক্ষত্রিয়ান্ক্ষত্রিয়র্ষভাঃ
এবং সংপূজিতাস্তে বৈ জগ্মুর্বিপ্রাশ্চ সর্বশঃ
42.45
গতেষু পার্থিবেন্দ্রেষু সর্বেষু ভরতর্ষভ
যুধিষ্ঠিরমুবাচেদং বাসুদেবঃ প্রতাপবান্
42.46
আপৃচ্ছে ত্বাং গমিষ্যামি দ্বারকাং কুরুনন্দন
রাজসূয়ং ক্রতুশ্রেষ্ঠং দিষ্ট্যা ত্বং প্রাপ্তবানসি
42.47
তমুবাচৈবমুক্তস্তু ধর্মরাণ্মধুসূদনম্
তব প্রসাদাদ্গোবিন্দ প্রাপ্তবানস্মি বৈ ক্রতুম্
42.48
সমস্তং পার্থিবং ক্ষত্রং ত্বত্প্রসাদাদ্বশানুগম্
উপাদায় বলিং মুখ্যং মামেব সমুপস্থিতম্
42.49
ন বয়ং ত্বামৃতে বীর রংস্যামেহ কথংচন
অবশ্যং চাপি গন্তব্যা ত্বয়া দ্বারবতী পুরী
42.50
এবমুক্তঃ স ধর্মাত্মা যুধিষ্ঠিরসহায়বান্
অভিগম্যাব্রবীত্প্রীতঃ পৃথাং পৃথুয়শা হরিঃ
42.51
সাম্রাজ্যং সমনুপ্রাপ্তাঃ পুত্রাস্তেঽদ্য পিতৃষ্বসঃ
সিদ্ধার্থা বসুমন্তশ্চ সা ত্বং প্রীতিমবাপ্নুহি
42.52
অনুজ্ঞাতস্ত্বয়া চাহং দ্বারকাং গন্তুমুত্সহে
সুভদ্রাং দ্রৌপদীং চৈব সভাজয়ত কেশবঃ
42.53
নিষ্ক্রম্যান্তঃপুরাচ্চৈব যুধিষ্ঠিরসহায়বান্
স্নাতশ্চ কৃতজপ্যশ্চ ব্রাহ্মণান্স্বস্তি বাচ্য চ
42.54
ততো মেঘবরপ্রখ্যং স্যন্দনং বৈ সুকল্পিতম্
যোজয়িত্বা মহারাজ দারুকঃ প্রত্যুপস্থিতঃ
42.55
উপস্থিতং রথং দৃষ্ট্বা তার্ক্ষ্যপ্রবরকেতনম্
প্রদক্ষিণমুপাবৃত্য সমারুহ্য মহামনাঃ
প্রয়য়ৌ পুণ্ডরীকাক্ষস্ততো দ্বারবতীং পুরীম্
42.56
তং পদ্ভ্যামনুবব্রাজ ধর্মরাজো যুধিষ্ঠিরঃ
ভ্রাতৃভিঃ সহিতঃ শ্রীমান্বাসুদেবং মহাবলম্
42.57
ততো মুহূর্তং সংগৃহ্য স্যন্দনপ্রবরং হরিঃ
অব্রবীত্পুণ্ডরীকাক্ষঃ কুন্তীপুত্রং যুধিষ্ঠিরম্
42.58
অপ্রমত্তঃ স্থিতো নিত্যং প্রজাঃ পাহি বিশাং পতে
পর্জন্যমিব ভূতানি মহাদ্রুমমিবাণ্ডজাঃ
বান্ধবাস্ত্বোপজীবন্তু সহস্রাক্ষমিবামরাঃ
42.59
কৃত্বা পরস্পরেণৈবং সংবিদং কৃষ্ণপাণ্ডবৌ
অন্যোন্যং সমনুজ্ঞাপ্য জগ্মতুঃ স্বগৃহান্প্রতি
42.60
গতে দ্বারবতীং কৃষ্ণে সাত্বতপ্রবরে নৃপ
একো দুর্যোধনো রাজা শকুনিশ্চাপি সৌবলঃ
তস্যাং সভায়াং দিব্যায়ামূষতুস্তৌ নরর্ষভৌ