Utshovঅধ্যায় 43
43.1
বৈশংপায়ন উবাচ
বসন্দুর্যোধনস্তস্যাং সভায়াং ভরতর্ষভ
শনৈর্দদর্শ তাং সর্বাং সভাং শকুনিনা সহ
43.2
তস্যাং দিব্যানভিপ্রায়ান্দদর্শ কুরুনন্দনঃ
ন দৃষ্টপূর্বা যে তেন নগরে নাগসাহ্বয়ে
43.3
স কদাচিত্সভামধ্যে ধার্তরাষ্ট্রো মহীপতিঃ
স্ফাটিকং তলমাসাদ্য জলমিত্যভিশঙ্কয়া
43.4
স্ববস্ত্রোত্কর্ষণং রাজা কৃতবান্বুদ্ধিমোহিতঃ
দুর্মনা বিমুখশ্চৈব পরিচক্রাম তাং সভাম্
43.5
ততঃ স্ফাটিকতোয়াং বৈ স্ফাটিকাম্বুজশোভিতাম্
বাপীং মত্বা স্থলমিতি সবাসাঃ প্রাপতজ্জলে
43.6
জলে নিপতিতং দৃষ্ট্বা কিংকরা জহসুর্ভৃশম্
বাসাংসি চ শুভান্যস্মৈ প্রদদূ রাজশাসনাৎ
43.7
তথাগতং তু তং দৃষ্ট্বা ভীমসেনো মহাবলঃ
অর্জুনশ্চ যমৌ চোভৌ সর্বে তে প্রাহসংস্তদা
43.8
নামর্ষয়ত্ততস্তেষামবহাসমমর্ষণঃ
আকারং রক্ষমাণস্তু ন স তান্সমুদৈক্ষত
43.9
পুনর্বসনমুত্ক্ষিপ্য প্রতরিষ্যন্নিব স্থলম্
আরুরোহ ততঃ সর্বে জহসুস্তে পুনর্জনাঃ
43.10
দ্বারং চ বিবৃতাকারং ললাটেন সমাহনৎ
সংবৃতং চেতি মন্বানো দ্বারদেশাদুপারমৎ
43.11
এবং প্রলম্ভান্বিবিধান্প্রাপ্য তত্র বিশাং পতে
পাণ্ডবেয়াভ্যনুজ্ঞাতস্ততো দুর্যোধনো নৃপঃ
43.12
অপ্রহৃষ্টেন মনসা রাজসূয়ে মহাক্রতৌ
প্রেক্ষ্য তামদ্ভুতামৃদ্ধিং জগাম গজসাহ্বয়ম্
43.13
পাণ্ডবশ্রীপ্রতপ্তস্য ধ্যানগ্লানস্য গচ্ছতঃ
দুর্যোধনস্য নৃপতেঃ পাপা মতিরজায়ত
43.14
পার্থান্সুমনসো দৃষ্ট্বা পার্থিবাংশ্চ বশানুগান্
কৃত্স্নং চাপি হিতং লোকমাকুমারং কুরূদ্বহ
43.15
মহিমানং পরং চাপি পাণ্ডবানাং মহাত্মনাম্
দুর্যোধনো ধার্তরাষ্ট্রো বিবর্ণঃ সমপদ্যত
43.16
স তু গচ্ছন্ননেকাগ্রঃ সভামেবানুচিন্তয়ন্
শ্রিয়ং চ তামনুপমাং ধর্মরাজস্য ধীমতঃ
43.17
প্রমত্তো ধৃতরাষ্ট্রস্য পুত্রো দুর্যোধনস্তদা
নাভ্যভাষত্সুবলজং ভাষমাণং পুনঃ পুনঃ
43.18
অনেকাগ্রং তু তং দৃষ্ট্বা শকুনিঃ প্রত্যভাষত
দুর্যোধন কুতোমূলং নিঃশ্বসন্নিব গচ্ছসি
43.19
দুর্যোধন উবাচ
দৃষ্ট্বেমাং পৃথিবীং কৃত্স্নাং যুধিষ্ঠিরবশানুগাম্
জিতামস্ত্রপ্রতাপেন শ্বেতাশ্বস্য মহাত্মনঃ
43.20
তং চ যজ্ঞং তথাভূতং দৃষ্ট্বা পার্থস্য মাতুল
যথা শক্রস্য দেবেষু তথাভূতং মহাদ্যুতে
43.21
অমর্ষেণ সুসংপূর্ণো দহ্যমানো দিবানিশম্
শুচিশুক্রাগমে কালে শুষ্যে তোয়মিবাল্পকম্
43.22
পশ্য সাত্বতমুখ্যেন শিশুপালং নিপাতিতম্
ন চ তত্র পুমানাসীত্কশ্চিত্তস্য পদানুগঃ
43.23
দহ্যমানা হি রাজানঃ পাণ্ডবোত্থেন বহ্নিনা
ক্ষান্তবন্তোঽপরাধং তং কো হি তং ক্ষন্তুমর্হতি
43.24
বাসুদেবেন তত্কর্ম তথায়ুক্তং মহত্কৃতম্
সিদ্ধং চ পাণ্ডবেয়ানাং প্রতাপেন মহাত্মনাম্
43.25
তথা হি রত্নান্যাদায় বিবিধানি নৃপা নৃপম্
উপতিষ্ঠন্তি কৌন্তেয়ং বৈশ্যা ইব করপ্রদাঃ
43.26
শ্রিয়ং তথাবিধাং দৃষ্ট্বা জ্বলন্তীমিব পাণ্ডবে
অমর্ষবশমাপন্নো দহ্যেঽহমতথোচিতঃ
43.27
বহ্নিমেব প্রবেক্ষ্যামি ভক্ষয়িষ্যামি বা বিষম্
অপো বাপি প্রবেক্ষ্যামি ন হি শক্ষ্যামি জীবিতুম্
43.28
কো হি নাম পুমাঁল্লোকে মর্ষয়িষ্যতি সত্ত্ববান্
সপত্নানৃধ্যতো দৃষ্ট্বা হানিমাত্মন এব চ
43.29
সোঽহং ন স্ত্রী ন চাপ্যস্ত্রী ন পুমান্নাপুমানপি
যোঽহং তাং মর্ষয়াম্যদ্য তাদৃশীং শ্রিয়মাগতাম্
43.30
ঈশ্বরত্বং পৃথিব্যাশ্চ বসুমত্তাং চ তাদৃশীম্
যজ্ঞং চ তাদৃশং দৃষ্ট্বা মাদৃশঃ কো ন সংজ্বরেৎ
43.31
অশক্তশ্চৈক এবাহং তামাহর্তুং নৃপশ্রিয়ম্
সহায়াংশ্চ ন পশ্যামি তেন মৃত্যুং বিচিন্তয়ে
43.32
দৈবমেব পরং মন্যে পৌরুষং তু নিরর্থকম্
দৃষ্ট্বা কুন্তীসুতে শুভ্রাং শ্রিয়ং তামাহৃতাং তথা
43.33
কৃতো যত্নো ময়া পূর্বং বিনাশে তস্য সৌবল
তচ্চ সর্বমতিক্রম্য স বৃদ্ধোঽপ্স্বিব পঙ্কজম্
43.34
তেন দৈবং পরং মন্যে পৌরুষং তু নিরর্থকম্
ধার্তরাষ্ট্রা হি হীয়ন্তে পার্থা বর্ধন্তি নিত্যশঃ
43.35
সোঽহং শ্রিয়ং চ তাং দৃষ্ট্বা সভাং তাং চ তথাবিধাম্
রক্ষিভিশ্চাবহাসং তং পরিতপ্যে যথাগ্নিনা
43.36
স মামভ্যনুজানীহি মাতুলাদ্য সুদুঃখিতম্
অমর্ষং চ সমাবিষ্টং ধৃতরাষ্ট্রে নিবেদয়