অধ্যায় 44

44.1

শকুনিরুবাচ
দুর্যোধন ন তেঽমর্ষঃ কার্যঃ প্রতি যুধিষ্ঠিরম্
ভাগধেয়ানি হি স্বানি পাণ্ডবা ভুঞ্জতে সদা

অনেকৈরভ্যুপায়ৈশ্চ ত্বয়ারব্ধাঃ পুরাসকৃৎ
বিমুক্তাশ্চ নরব্যাঘ্রা ভাগধেয়পুরস্কৃতাঃ

তৈর্লব্ধা দ্রৌপদী ভার্যা দ্রুপদশ্চ সুতৈঃ সহ
সহায়ঃ পৃথিবীলাভে বাসুদেবশ্চ বীর্যবান্

লব্ধশ্চ নাভিভূতোঽর্থঃ পিত্র্যোংঽশঃ পৃথিবীপতে
বিবৃদ্ধস্তেজসা তেষাং তত্র কা পরিদেবনা

ধনংজয়েন গাণ্ডীবমক্ষয্যৌ চ মহেষুধী
লব্ধান্যস্ত্রাণি দিব্যানি তর্পয়িত্বা হুতাশনম্

তেন কার্মুকমুখ্যেন বাহুবীর্যেণ চাত্মনঃ
কৃতা বশে মহীপালাস্তত্র কা পরিদেবনা

অগ্নিদাহান্ময়ং চাপি মোক্ষয়িত্বা স দানবম্
সভাং তাং কারয়ামাস সব্যসাচী পরংতপঃ

তেন চৈব ময়েনোক্তাঃ কিংকরা নাম রাক্ষসাঃ
বহন্তি তাং সভাং ভীমাস্তত্র কা পরিদেবনা

যচ্চাসহায়তাং রাজন্নুক্তবানসি ভারত
তন্মিথ্যা ভ্রাতরো হীমে সহায়াস্তে মহারথাঃ

দ্রোণস্তব মহেষ্বাসঃ সহ পুত্রেণ ধীমতা
সূতপুত্রশ্চ রাধেয়ো গৌতমশ্চ মহারথঃ

অহং চ সহ সোদর্যৈঃ সৌমদত্তিশ্চ বীর্যবান্
এতৈস্ত্বং সহিতঃ সর্বৈর্জয় কৃত্স্নাং বসুংধরাম্

দুর্যোধন উবাচ
ত্বয়া চ সহিতো রাজন্নেতৈশ্চান্যৈর্মহারথৈঃ
এতানেব বিজেষ্যামি যদি ত্বমনুমন্যসে

এতেষু বিজিতেষ্বদ্য ভবিষ্যতি মহী মম
সর্বে চ পৃথিবীপালাঃ সভা সা চ মহাধনা

শকুনিরুবাচ
ধনংজয়ো বাসুদেবো ভীমসেনো যুধিষ্ঠিরঃ
নকুলঃ সহদেবশ্চ দ্রুপদশ্চ সহাত্মজৈঃ

নৈতে যুধি বলাজ্জেতুং শক্যাঃ সুরগণৈরপি
মহারথা মহেষ্বাসাঃ কৃতাস্ত্রা যুদ্ধদুর্মদাঃ

অহং তু তদ্বিজানামি বিজেতুং যেন শক্যতে
যুধিষ্ঠিরং স্বয়ং রাজংস্তন্নিবোধ জুষস্ব চ

দুর্যোধন উবাচ
অপ্রমাদেন সুহৃদামন্যেষাং চ মহাত্মনাম্
যদি শক্যা বিজেতুং তে তন্মমাচক্ষ্ব মাতুল

শকুনিরুবাচ
দ্যূতপ্রিয়শ্চ কৌন্তেয়ো ন চ জানাতি দেবিতুম্
সমাহূতশ্চ রাজেন্দ্রো ন শক্ষ্যতি নিবর্তিতুম্

দেবনে কুশলশ্চাহং ন মেঽস্তি সদৃশো ভুবি
ত্রিষু লোকেষু কৌন্তেয়ং তং ত্বং দ্যূতে সমাহ্বয়

তস্যাক্ষকুশলো রাজন্নাদাস্যেঽহমসংশয়ম্
রাজ্যং শ্রিয়ং চ তাং দীপ্তাং ত্বদর্থং পুরুষর্ষভ

ইদং তু সর্বং ত্বং রাজ্ঞে দুর্যোধন নিবেদয়
অনুজ্ঞাতস্তু তে পিত্রা বিজেষ্যে তং ন সংশয়ঃ

দুর্যোধন উবাচ
ত্বমেব কুরুমুখ্যায় ধৃতরাষ্ট্রায় সৌবল
নিবেদয় যথান্যায়ং নাহং শক্ষ্যে নিশংসিতুম্